Read Car_Nicobarese INLAHEN 16 Bible Online

INLAHEN 16 - Car_Nicobarese bible

INLAHEN 16

¹Yihtöre ngaich anga-aṅ nö i Törpī, Listra inrē. Ngaich hĕng tak ök mahaköp umuh, Timòti ök minë-eny ò; Yahūti ök kikānö yöng ò.

²Tö-eūka tök māṅ i Listra, Ikôniöm inrē.

³Ngaich hòṅ ngôṅ an Pôl nö holre; kēḵ an ngaich anga-aṅ nö tunyinyngen ò, kūö yik Yahūti mu-umuh; pòn ṙòkhöre cha-a nö akahalōn tök yöng ò kikōnyö nö tahëng mihëṅrö.

⁴Ngaich hē cha nö kiröönngöre nö lök i nup panam, ngaich cha-a nö nö kē-ĕkūö cha, tök hachöngten yik tanīnöṙô, yik mā inrē i Yerūsalem.

⁵Ngaich nuk māṅ nö ngëḵ nö im mikah; öt hĕng hang sumkam ṙanūölö ṙôngö.

⁶Lök i nup chīṙö Pruki cha-a, Kalatī inrē; pòn tahayö tö ngam töhet Fanöinylö nö ṙô-òv tö ngam ṙô nö i Asi.

⁷Ngaich hē cha nö yih nö i Musi; ngaich hòṅ kalah cha-a nö chuh Pitunī; ngaich pöri ngam Fanöinylö aṅ in Yēsū nö öt halöngten cha.

⁸Chööḵngö Musi cha-a, ngaich yihtöre nö i Trô-as.

⁹Ngaich meūkö tö Pôl tö hatööm, nö i heūvö, ök hĕng tak tarik aṅ Maketònī, samökhaka; vame-eṅkūö ò, nö ngö ṙô, Ta-ih, yihtöre i Maketòni; hayööken ih.

¹⁰Keuheūthëmat anga-aṅ nö meuk nö im heūvö, ilööṙen ngaich īhö hòṅ chuh Maketòni; ngaich tö lōn ih, ngam Tēv nö havëken ih, ahangken cha tö ngam tölöök inhānga.

¹¹Hatēhĕre īhö ngaich, ṙā-ang Trô-as, hachipkūöre ku-ötö Samòtrakī; ngaich im huṙöich īhö i Neapòli.

¹²Ngaich ṙā-ang umuh, öi chuh Filippī, ök tökiröng panam nö umuh i Maketònī, tö iyöngö tö aṅ Rōma. Rĕh tum sumkam īhö höngngöh im panam.

¹³Ngaich hē el töhet sakāmö ihö kunyī-inyre, lā-uk kinlōngö, i kui ap tahël, i chūök ök chūök vine-eṅkūötēv, tö lōn ih. Ūichngöre ihö ngaich, ngaich ve-ekūö yik kikānö mahamūl yanihihre.

¹⁴Ngaich hĕng tak ök kikānö, Litiā ök mine-eny ò, mī-inyihkö tö pōi ṙāi tö huṙing hilā, aṅ ap panam Tuatirā, mahayönglenre nö im Tēv, hamāngö ih; ök tö löpnyukūö ellōn tö ngam Mā, nö hangihtöre tö ṙô Pôl.

¹⁵Ngaich hē ò nö vōkö, tö yik aṅ patī ò inrē; ngaich ve-ekūö ih anga-aṅ, nö ngö ṙô, Yē chu öich ngaich tökô-en i ngam Mā Tēv, tö lōn yīö; ta-a, yih yin i patī chu, öi höngngöh. Ngaich līpten ih anga-aṅ.

¹⁶Ngaich hē ih chuh ip chūök vine-eṅkūötēv, ngaich hĕng taka ök kikānö mahalanṙen, tömilūönö, mameukkūö ih. Pōyen kanôlò tī anga-aṅ tö yik yöngṙenre, nö lökten i vine-eny mu-unôich.

¹⁷Anga-aṅ tamömkörit ih, īhö Pôl; ngaich hūḵa, nö ngö ṙô, Mahalanṙen ngam Lamātulöng Tēv, yin vē tarik; ma-ahangken yīö tö ngam talöökö inyööken.

¹⁸Ṙōl sumkam anga-aṅ nö ngatī; ngaich pöri ang Pôl nö uhā-en, havöölökūöre ngaich anga-aṅ, ngaich ngö ṙô tök sī-ö, Tölṙô meh chin, i Mine-eny Yēsū Kristū, öm meutnyi ṙā-ang in ò. Ngaich iṙūö meutnyi anga-aṅ hē e.

¹⁹Ngaich hē yik yöngṙen ò nö akahalōn tö chanuhngen kanôlòre min; ngaich cha-a nö kē-ĕ nā Sailes nāṅ Pôl; ngaich tūökten cha nö elpanam, i kūö yik mahayöng.

²⁰Ngaich hē kinëtö cha nö i yik kamhôṅka; ngaich ngö ṙô cha-a, Yahūti nan nāṅ tarik, töpōyen tī nö hakihten ngih panam.

²¹Vītö fālen nan tö kô nö kahëḵ ih, öt rēhĕn nö haköpö, pò ih aṅ Rōma.

²²Choholre yik tömaṙôngö nö lā-al cha; ngaich nak yöngṙen nö chilulngö kinṙum cha; ngaich hōten cha nö nyahaṅ tö chōn nö fōhoh.

²³Ngaich hē cha nö keuheūtö tī nö fōhoh cha nö ṙōl höt; ngaich kalonghöt cha nö el kinlōngö. Tölṙô ök yōm kinlōngö nö haköpngen cha,

²⁴Ngaich hē ò nö ngatī tinöölô, kalonghöt cha ngaich anga-aṅ nö latuhēt takô; ngaich halökngö kalröön cha tö chōn,

²⁵Ngaich im chūöl hatööm nā Pôl nāṅ Sailes nö ve-ekūötēv, tikökṙôre inrē; hang ṙô cha yik tökē-ĕ.

²⁶Ngaich nönglūk ök yöng kumyeūnö; ngaich kalöka röönti ök kinlōngö, ngaich löpnyörekūö nuk inkūp, ngaich aluh köṅny nuk nyanëk cha nö ṙòkhöre.

²⁷Ngaich ök yōm kinlōngö nö rötlö nö mahaṙòh, ngaich meuk nuk inkūp ök kinlōngö nö luve-akkūö, hōknyö sanëtre ngaich anga-aṅ, nö hòṅ fëlngöre, pò yik tökē-ĕ nö meutnyöre, tö lōn ò.

²⁸Pōitô pöri Pôl nö hūḵa, nö ngö ṙô. Uh man chökhu tī töre; ṙòkhöre in ihih.

²⁹Ngaich havëtö ëāṅvö anga-aṅ, tisòkhötre ngaich nö lātuhĕt, kichëyöre, pòn pa-ekūö. Afukngöre nö i kūö nā Pôl, nāṅ Sailes;

³⁰Ngaich kēḵnyen cha, ngaich ngö ṙô, Mā! Asuh ap la-en chu, hòṅ chu hayöökaṙen?

³¹Ngaich ngö ṙô cha-a, Ṙātö ellōnre im Mā Yēsū; ngaich hayöökaṙen min me-eṅ, yip aṅ patī meh inrē.

³²Ngaich cha-a nö ṙô tö ṙô ngam Mā Tēv nö in ò, i yik aṅ patī ò inrē nö ṙòkhöre.

³³Ngaich hē e anga-aṅ nö ngô-òṅ cha, im hatööm; söichlökūö nuk nyāhaṅ cha ngaich. Ngaich iṙūö vōkö anga-aṅ; ṙòkhöre inrē yik aṅ patī ò.

³⁴Ngôṅten cha ngaich anga-aṅ nö i patīre, ngaich ha-aṅlen cha; ngaich pōi ṙanāmölōn, pò cha nö ṙòkhöre nö ngaich nö ṙātö ellōnre nö im Tēv, tö yik aṅ patī ò.

³⁵Ngaich hē e nö peuheū, ngaich nak yöngṙen nö tīnngö tösökhaka, nö ngö ṙô, Luhlö nap tarik ngaich.

³⁶Ngaich ök yōm kinlōngö nö ve-eny minë ṙô nö in Pôl; nö ngö ṙô, Tīntö ṙô nap yöngṙen nö hōten nāṅ ngaich luhlöngö. Lökten nan ngaich kunyī-inyrel kumchikngenre an kiröönngöre.

³⁷Ngö ṙô pöri Pôl tö cha, Hangāṅlnyö tīre nap yih nö fōhoh ai, öt kahòkkaṙen, ai aṅ Rōma ai tarik; ngaich kalonghöt ai el kinlōngö; ngaich hòng töngamuh cha-a nö ulāikenre nö luhnyen ai? Höng rö-ö; hökten cha nö hakôtenre nö yih, nö ngôṅnyen ai.

³⁸Ngaich yik tösökhaka nö ve-eny minë ṙô nö i nak yöngṙen; pa-ekūö cha-a ngaich, hē cha nö hāngö cha nö aṅ Rōma.

³⁹Yihtöre cha-a ngaich nö ve-ekūö cha; ngaich hē cha nö ngaich nö ngôṅnyen cha, hōten cha ngaich nö kiröönngöre, nö ṙā-ang ap panam.

⁴⁰Kunyī-inyre cha-a, nö ṙā-ang el kinlōngö; ngaich yihtöre nö i patī Litiā, Ngaich hē cha nö meuk yik holre, ngaich ṙūhöl alaha cha, ngaich kiröönngöre.