Read Car_Nicobarese INLAHEN 17 Bible Online

INLAHEN 17 - Car_Nicobarese bible

INLAHEN 17

¹Ngaich hē cha nö lök Ampipòlis, Apôlòni inrē, yihtöre cha-a ngaich nö i Tösalònikē, i chūök ök chūök vinë-eṅkūötēv yik Yāhūti.

²Ngaich sāre, ang Pôl nö yihtöre nö in cha; ngaich lūöi töhet sakāmö rô-òten ò nö ve-ekūö cha, löknyö i mat nup töhet līpöre.

³Hameukhöti, ane inrē mikahtö elmat cha, tö Kristū nö tö hòṅ kihngen, ngaich chōholre hēk, nö ṙā-ang i yip tökapah. Anga-aṅ ön ngòh Yēsū nö Kristū, ngam ṙô chu ahangken yīö.

⁴Ngaich rēvre tö cha; yik ṙamātö ellōnre, ngaich hamūltöre nö in nā Pôl, nāṅ Sailes, yik tahëng mihëṅṙö töpa-ekūö tö ngam Mā Tēv, ane inrē yik tökôlò kikānö nö maṙôngö.

⁵Ngaich pöri yik Yahūti nö kunyahaṅlōn; ngaich ngôṅ yik tötlöök tarik, mī-i chūök mī-inyih; hamūlöre ngaich, ngaich tiṙōllen ngam panam. Yihtöre nö i patī Yāsön, ngaich lukkenre; nö hòṅ kēḵnyen cha nö i yik kamhôṅka.

⁶Ngaich hē cha nö öt kôtökūö tö cha, tūökö Yāsön cha-a, haroh tum tak yik tahëng inrē, nö i yik makūö panam; ngö ṙô nö hūḵa,

⁷Yih yip tarik nö ihih, yip tumṙōllen ngih panam, yip ahōḵo Yāsön. Ṙòkhöre yip nö harīkngö fālenre, tö chöngö Kaisöör; ngö ṙô, töp tahëng rācha, ang Yēsū.

⁸Ngaich yik tömaṙôngö, tö yik mākūö, nö harunlöng alaha tö cha; hē cha nö hāngö u.

⁹Ngaich hē Yāsön, tö yik tahëng mā inrē, nö acha-a töhōtu tö cha nö tö-akahalōn; ngaich hökiṙen cha-a nö kiröönngöre.

¹⁰Ngaich im hatööm yik mā nö tīnngen nā Pôl, nāṅ Sailes, nö i Pĕröiya. Chalô cha-a nö umuh; ngaich yihtöre nö el chūök vine-eṅkūötēv yik Yahūti,

¹¹Töakaha yik cha-a tö yik aṅ Tösalònikē; pò cha nö lēnö ellōn nö hōḵo ngam ṙô, örhĕnghang sumkam nö ngëichkö mat līpöre, yē u anū-ö nö tökô-en.

¹²Lökten nö maṙôngö yik aṅ in cha nö ṙātö ellōnre; yik Tahëng Mihëṅṙö kikānö tökôlò, kikōnyö inrē nö pōyen.

¹³Ngaich hē yik Yahūti aṅ Tösalònikē, nö akahalōn tö aṅ Tösalònikē, nö akahalōn tö ngam ṙô ngam Mā Tēv nö ahangka tö Pôl nö i Pīrīa; yihtöre cha-a ngaich nö umuh, ngaich haruhlö alaha yik tömaṙôngö.

¹⁴Ilööṙen ngaich yik māṅ nö tīnngen Pôl nö tölngö kūö mai; ngaich höngngöh nāṅ Saīles, nāṅ Timòtī, nö umuh.

¹⁵Tölngö Aten pöri yik samöömngen Pôl; ngaich kilēḵngen cha ang Pôl, nö tölṙô nā Sailes, nāṅ Timòtī, nö ka-eūyen nö yihtöre nö in ò, ngaich kiröönngöre cha-a.

¹⁶Ngaich hē Pôl nö hökken cha nö i Ĕtën, ngaich halöinyöre ellōn anga-aṅ, hē ò nö meuk ngam panam nö tööḵlö tö insā tēv.

¹⁷Ve-ekūö yik Yahūti anga-aṅ, yik tö pa-ekūö inrē tö ngam Tēv, nö el chūök vine-eṅkūötēv; ör hĕnghang sumkam inrē nö el panam, nö ve-ekūö yik maheuṅkre tarik.

¹⁸Rēvre inrē yik Epikuri, Sato-iki inrē, yik töpōi haköp, nö kil ṙô ò. Rēvre yik tö ngö ṙô, Asuh ap tinkākö ṙô ngòh tarik? Rēvre yik tahëng, tö ngö ṙô, Sā ma-ahangkö tēv an tötohtöre; pò ò nö ahangken Yēsū, invanlö tökapah inrē.

¹⁹Ngaich cha-a nö kēḵ an, ngaich ngôṅten ò nö i kui ap rung Arĕs nö ngö ṙô, Kô-òren öi akahalōn tö ngih tumfömngöre inköphöti ngam ṙô meh?

²⁰Tön rötlö elnang in tö në tötohtöre kum meh. Hòṅ akahalōn in lökten, tö manah u.

²¹Pòn ṙòkhöre yik aṅ Ĕten, yik aṅ tahëng inrē umuh, nö öt inrēṙu la-en, höng ve-eny, hēk hang, nup tufömngöre.

²²Söklöre ngaich Pôl nö ellōn ap rung Arĕs, ngaich ngö ṙô, Yī-ö tarik aṅ Ĕten, i tökeuheūttöre chin meūkö yīö öi tököp tö kuire.

²³Pò chu meuk nup ha-öiny yīö, hē chu lök hih; ngaich kôtömat inrē töp tahāklö, tö ngö kinūichö aṅ in, Tahāklö ngam Tötmikahkūö Tēv. Ngam ha-öiny yīö, öi i ötmikahre, Anga-aṅ An ahangkö chu in yīö.

²⁴Ngam Mā Tēv, vamīlö ngih panam, nup taṙòkhöre inrē mi-in e; Anga-aṅ An Mā ngam halīöngö, panam inrē, öt iyöng el patī An në vahī-il tarik.

²⁵Öt rēhĕn An nö hòṅ meūken tö tarik, nö sā tö hanāṅtuṙen; pòn Anga-aṅ kamëtö nômö taṙòkhöre, unhôṅmö, taṙòkhöre chehen inrē.

²⁶Ngaich Anga-aṅ nö vīlö ngòh tarik nöng hĕng, nö iyöng kūö në taṙòkhöre panam; halöök ṙētak hē cha, nup tölngökūö elyöngö cha inrē.

²⁷Vīten cha Anga-aṅ nö chöh Tēv yē cha nö hòṅ kôtökūö tö līöthen Ò, chöhan inrē. Rö-ö Anri nö marôvat tö hī nyöre.

²⁸Pò hī höng in Ò öi aṅ, halöinyköre, ngaich öi tarik. Sā ṙô yik rēvre vamī tinkökö yīö, nö ngö ṙô, Ṙòkhöre in öi kūön Ò.

²⁹Kūön ngam Tēv in; uh in ngö lōn tö ngam Tēv nö tö sā humlum, rupīö, ihong, nup tömilichngen vinī-i tö tarik, sā lōn cha.

³⁰Hökiṙen an sin ngam ṙētak ötmikah, tö ngam Tēv; ngaich pöri Anga-aṅ töngamuh nö chönguvö tö tarik nö keuheūtngöre chūök nö havöötö ellōnre.

³¹Pòn sakāmu hē Anga-aṅ öp hē Ò min nö kahòkken ngih panam, im ötmichūṙen, lökten im tarik ngam vahīten Ò. Ngaich kētö minkahngö Anga-aṅ i taṙòkhöre tarik, i tī Ò nö hachohlen Ò nö ṙā-ang yip tökapah.

³²Ngaich hē cha nö hang invanlö tö kapah, rēvre yik tö miyëḵṙô; ngö ṙô pöri yik tahëng, Hòṅ hang ṙô meh in īhö hēk, tö inlahen e.

³³Ngaich Pôl nö kiröönngöre nö ṙāngen cha.

³⁴Haroh tum tak pöri yik mahaköpngöre nö in ò, ngaich ṙātö ellōnre; hēḵ Tīōnīsiös, aṅ i yik kamhôṅka, hĕng tak ök kikānö, Tāmaris minënyö, tahëng inrē yik hol cha.