Read Car_Nicobarese INLAHEN 18 Bible Online

INLAHEN 18 - Car_Nicobarese bible

INLAHEN 18

¹Unôichrit u anga-aṅ nö ṙā-ang Ĕten, ngaich yihtöre nö i Kòrin.

²Hĕng tak ök kanôtökūö ò Yahūti, Akula minënyö, töfötnyu nö i Pòntu, tufömtöre yihih nö ṙā-ang Italī, hol tök pihöre Prisilā; pò Klòtīös nö hōtö yik taṙòkhöre Yahūti nö ṙāngö Rōma.

³Yihtöre ngaich Pôl nö in cha; ngaich kūö ò inrē nö tö sā la-en ò, ngaich iyöng in cha anga-aṅ, ngaich la-evṙen cha-a; vamī inrūkui nak.

⁴Örheūheu hē el töhet sakāmö ang Pôl, nö el chūök vine-eṅkūötēv, nö ve-ekūö, ane inrē hōten yik Yahūti, Tahëng Mihëṅṙö inrē.

⁵Hē nāṅ Sailes, nāṅ Timòtī nö ṙā-ang Makētònī ngaich höng ngam ṙô lanūöichlen Pôl, nö eū-a nö i yik Yahūti tö Yēsū nö Kristū.

⁶Hē cha nö lā-alkūö ò, miyëḵṙô inrē, piyònglö hilāre ngaich Pôl; ngaich ngö ṙô tö cha, Pòkūöre yin ötkôlò, öt pô-òvkūö chin chu-ö; töngamuhöten chin ngaich chuh i yip Tahëng Mihëṅṙö.

⁷Ṙā-ang umuh ngaich anga-aṅ, ngaich yihtöre nö i patī ök töhĕng tak tarik, Taitös Yustös minënyö, ök töpa-ekūö tö ngam Tēv, ök töröhta patī nö ik chūök vine-eṅkūötēv.

⁸Ngaich Krispös, ök yöngṙen chūök vine-eṅkūötēv, nö ṙātö ellōnre nö i ngam Mā, holtö yik aṅ patī ò nö ṙòkhöre. Maṙôngö inrē yik aṅ Kòrin hamang, ngaich ṙātö ellōnre; ngaich vōkö.

⁹Ngaich ngam Mā nö ngö ṙô tö Pôl, tö hatööm, lökten ik maheūṅk ò Uh man pa-ekūö; iṙuhöṙô; um ṙāngôre.

¹⁰Tön holtöṙah meh Chin; öt tarīku min kumlöönö meh nö chökhutī; pò Chu pōyen tarik i ngih panam.

¹¹Ngaich iyöng muh anga-aṅ, hĕng samyeūheu, tafūöl chumngëṅtö; haköpten cha tö ṙô ngam Mā Tēv.

¹²Hē Kalīō pöri nö mahayöng Akayā, hĕng tum yik Yahūti nö choholre nö lā-al Pôl; ngaich kēten ò nö i chūök kamhôṅka, nö ngö ṙô,

¹³Hōtö tarik ön ngòh nö harīkngöre inlahen töm chöngö, nö ve-ekūö ngam Tēv.

¹⁴Ngaich hē Pôl nö hòṅ kaknyöre ngaich ngö ṙô Kalīō tö yik Yahūti, Yē e öre nö töchōich, hēk yĕn tötlöök nö huneū-en. Ngaich hōḵöre chū-ö.

¹⁵Yē ngam fālen pöri nöng ṙô, minënyö inrē, ane inrē kui yīö, kahngenre yin tö e; ṙö-ö chin chū-ö hòṅ kahòkken töngatī.

¹⁶Ahōngen cha ngaich anga-aṅ, nö ṙā-ang i chūök kamhôṅka.

¹⁷Ngaich kē-ĕ Sòstēnös cha-a, ök mākūö ök chūök vine-eṅkūötēv, ngaich fōhan, nö i kūö ök chūök kamhôṅka; ngaich Kalīō nöng ötchumkūöṙen tö e.

¹⁸Ṙōl sumkam ang Pôl nöngngöh, unôichrit e ngaich havëḵengritre nö i yik māṅ; ngaich hatēhĕngre nö chuh i Siriā, hol ò nāṅ Prisilā, nāṅ Akula; kuhāki anga-aṅ nö i Kenkörai, pò ò nö kilēḵngôre.

¹⁹Chalô cha-a nö i Efisös, ngaich ṙāngen cha anga-aṅ nö umuh; kuhēthötre pöri anga-aṅ nö el chūök vine-eṅkūötēv, ngaich ve-ekūö yik Yahūti.

²⁰Ngaich hē cha nö ve-ekūö ò, hōten ò nö rahëchtöre rô-òten nöngngöh; ngaich sōḵ anga-aṅ.

²¹Havëḵengritre anga-aṅ nö in cha; ngaich ngö ṙô, Hēk chin min havantöre in yīö, yē lōn ngam Tēv. Ngaich hatēhĕngre anga-aṅ nö ṙā-ang Efisös.

²²Ngaich hē ò nö ṙāhötvö nö i Kaisarī, chuh Yerūsalem ngaich anga-aṅ; ngaich salām ap māṅ. Ngaich chuh Anti-òk.

²³Ngaich rĕh rô-òten anga-aṅ nö umuh; ngaich kiröönngöre, lök chīṙö Kalati, Prūki inrē; hangëkö yik taṙòkhöre mahaköp.

²⁴Hĕng taka ök Yahūti, Apòlös minënyö, töfötnyu nö i Aleksanria, tö pōi haköp nö tarik; yih anga-aṅ nö i Efisös. Tökeuheūt anga-aṅ tö nup töhet līpöre;

²⁵Töhaköptu anga-aṅ tö talöökö ngam Mā Tēv; ngaich haköphöti anga-aṅ, nö haṙēmngenre tö inlahen Yēsū, pò ò nö tökalēḵĕ ellōn; pòrô nöng ngam vinôkö tī Yôhan mikahlōn ò.

²⁶Kētöre anga-aṅ nö ahānga nö el chūök vine-eṅkūötēv. Hē nāṅ Prisilā, nāṅ Akula, nö hāngan, ngôṅten ò cha-a ngaich nö in cha; ngaich halööktö mikah ò tö talöökö ngam Tēv, nö ṙūötö mikahlōn ò.

²⁷Ngaich hē ò nö chuh Akayā, ṙuhöl alaha ò yik māṅ, ngaich kūichtö līpöre yik mahaköp, nö höngkūö ò. Chalô anga-aṅ, ngaich pōihöl nö lökten im inlōnti aṅ im Mā Tēv.

²⁸Pò ò nö kalēḵĕ ṙô tö yik Yahūti nö vaich; hangāṅlnyôre, hameukhöti inrē, lökten i nup töhet līpöre, tö Yēsū nö Kristū.