Read Car_Nicobarese INLAHEN 19 Bible Online

INLAHEN 19 - Car_Nicobarese bible

INLAHEN 19

¹Ngaich hē Apôlös nö i Kòrin, ngaich lök i nup tulöng panam ang Pôl; ngaich yihtöre nö i Efisös, ngaich kôtökūö tö yik haroh tum tak mahaköp.

²Ngaich ngö ṙô anga-aṅ tö cha; Ngaich öi yī-ö teūngen tö ngam Töhet Fanöinylö, hē yīö ngaich ṙātö ellōnre? Ngaich ngö ṙô cha-a, tö ò, Hö-ö; öt rēhĕn in höng hang, yē ngam Töhet Fanöinylö nö kētu nö ngaich.

³Ngaich ngö ṙô anga-aṅ, Asuh apri vinôkö yīö?

⁴Ngaich ngö ṙô cha-a, Ngam tī Yôhan vinôkö. Ngaich ngö ṙô Pôl, Vōk ök Yôhan nö aṅtī tö ngam vinôkö invöötö ellōn; ngö ṙô anga-aṅ tö yik tarik, hōten cha nö ṙātö ellōnre nö in Ò, Öp mu-unôichrit ò, Ang Yēsū.

⁵Ngaich hē cha nö hāngö e, vōkö cha-a ngaich, nö i Mine-eny ngam Mā Yēsū.

⁶Ngaich hē Pôl nö ṙēptö eltīre nö i kui cha, teungtöre ngaich ngam Töhet Fanöinylö nö in cha; ngaich huveū-eu ṙô cha-a tö tahëng ëlô; ngaich ahānga.

⁷Lohten yik nö nët sīön taka nö ṙòkhöre.

⁸Kuhēthötre ngaich anga-aṅ nö el chūök vinë-eṅkūötēv, lūöi chumngëṅtö rô-òten nö ötpinheṅeṅvkūö ṙô nö ve-ekūö, ane inrē hōten cha nö haköp nup aṅ im pūlngö ngam Tēv.

⁹Hē yik rēvre pöri töt vane-ekūö, sōḵ inrē, chōchö ṙô tö ngam Talöökö nö i kūö yik tömaṙôngö; kiröönngöre ngaich anga-aṅ nö ṙāngen cha; ngaich haköhngen yik mahaköp; öt hĕng hang sumkam nö ve-ekūöre nö el iskūl Turanös.

¹⁰Nët samyeūheu angū-ö nö ngatī; ngaich nöng ṙòkhöre yik mī-iyöng Asī nö hang ngam ṙô ngam Mā Tēv, hĕnghöre Yahūti, Tahëng mihëṅṙö inrē.

¹¹Tī-iv ngam Tēv, nö lökten in Pôl, tö töt ha-eh minhôiṅyö;

¹²Lökten nö kē-ĕyö nö i yik tövahvö nuk kun hilā, hēk chanūt vang, nö ṙā-ang i alaha ò; ngaich nuk invah nö ṙāngen cha, kunyī-inyre inrē yik tötlöök sī-ö.

¹³Rēvre pöri yik Yahūti, töng mahavöt, ma-ahōngö sī-ö; kalahtenre cha-a nö ṙôtö Mine-eny ngam Mā Yēsū, nö i yik tö sī-u aṅ in, Yēsū ngam ahangkö Pôl.

¹⁴Sat tak yik kūön Sakēva, ök Yahūti, mākūö kūönṙô, töngatī.

¹⁵Ngaich ngam tötlöök sī-ö nö ngö ṙô, nö sapṙô cha. Akahakūö chin tö Yēsū akahkūö tö Pôl inrē; achīö öi yī-ö?

¹⁶Ngaich ök tarik ök tö īnu tö tötlöök sī-ö, nö tisòktöre nö in cha, ngaich mihôiṅ tö cha; lökten cha nö falnyöre nö ṙā-ang el patī, nöng öt hilāṙu, ngaich palā-aiṙen.

¹⁷Akahalōn ngaich nö ṙòkhöre yik Yahūti, Tahëng mihëṅṙö inrē, yik mī-iyöng Efisös; ngaich pa-ekūö cha-a nö ṙòkhöre, ngaich hapōilöngö ngam mine-eny ngam Mā Yēsū.

¹⁸Maṙôngö yik aṅ i yik ṙamātö ellōnre nö yihtöre nö ve-eny, ane inrē hameuktö nup la-en cha.

¹⁹Rēvre yik tömilūönö kamëtö nuk līpöre, ngaich föngngö u nö i kūö taròkhöre; ngaich kaheuk nuk ṙāi u cha-a, ngaich kôtökūö tö u nö taneui anāi köṅny rupīö.

²⁰Yöng pinrātngö ngam ṙô ngam Mā Tēv, nö mihôiṅ.

²¹Keuheūthëṙen anū-ö, ngaich Pôl nö halēnngö ellōnre nö hòṅ chuh Yerūsalem, hē ò nö ngaich nö lök Maketònī, Akayā inrē; nö ngö ṙô, Keuheūthëṙen chū-ö umuh, ngaich hòṅ chöhkö Rōma inrē.

²²Ngaich nët tak tahīnngö anga-aṅ nö i Maketòni, tö aṅ i yik hamòlṙen ò, nā Timòti, nāṅ Erāstös. Höngngöh anga-aṅ nö Asī, nö rĕh ṙô-òten.

²³Ngaich hē e, ök yöng tinṙōllen tökūö ngam Talöökö.

²⁴Hĕng taka ök tarik, Tēmetriös minënyö, ramöm rupīö, vamī insā chūök Artēmis, töpōyen la-en tī tö yik töla-evṙen,

²⁵Yik töhamūlö tö ò, tö yik töngatī la-en inrē; ngaich ngö ṙô, Mah! Akahlōn yin tö hī öi kôlò tökūö ngih la-en.

²⁶Ngaich yih yī-ö meuk, hang inrē, öt höng i Efisös, tön öhten nö keuheūtngöre chūök nö i Asi ngòh Pôl nö hōten tarik, ane inrē maṙôngö havööngökūö, nö ngö ṙô, Rö-ö nun nö tēv, në vāhī tarik.

²⁷Rö-ö an nöng ngih la-en hī tökôlò, tön ngam chūök ngam kikānö tēv hī inrē, Artēmis, nöng tö rö-övö; ngaich anga-aṅ mīnö nö kē-ĕyö inpōilö, ngam ha-öiny yip aṅ Asī, ngih panam nö ṙòkhöre inrē.

²⁸Hē cha nö hāngö e, ngaich tööḵlö tö tanānyöre, ngaich hūḵa, nö ngö ṙô, Yöng ṙôkö Artēmsi aṅ Efisös.

²⁹Ngaich ngam panam nö taṙōlaṙen; faltöre cha-a ngaich nö hĕngtum nö el ök patī chūök kumṙīöm; ngaich kē-ĕ Kai-ös, Aristākös inrē, nak tarik aṅ Maketòni, hol Pôl nö kiröönngöre.

³⁰Ngaich hē Pôl nö hòṅ kuhēthötre nö i yik tömaṙôngö tarik, öt halöngtuṙen pöri tö yik mahaköp.

³¹Rēvre inrē yik mākūö panam i Asī, yik hol ò, tamīnngö vame-eṅkūö ò, sōten ò nö kuhēthötre nö ël ök patī chūök kumṙīöm.

³²Höng kö ṙôre cha-a nö hūḵa, tahëngö ṙô yik inrē; pò yik tömaṙôngö nö ngaich nö kalūöichöre. Pōyen yik töng ötakahlōn töp lökten cha nö hamūlöre.

³³Ngaich rēvre yik aṅ in cha nö halānyen Aleksantör, yik Yahūti tötī-iv tö ò nö lākūö. Halöinykö këlre anga-aṅ, nö hòṅ ṙô-òv nö i yik tömaṙôngö.

³⁴Hē cha pöri nö akahalōn tö ò nö Yahūti, ṙòkhöre cha-a nö hĕng tum ṙô nö hūḵa, nët köṅny ṙô rô-òten, nö ngö ṙô, Yöng ṙôkö Arētmis, aṅ Efisös.

³⁵Ngaich hē ök kamhôṅka nö hachēvngö yik tömaṙôngö; nö ngö ṙô, Yī-ö tarik aṅ Efisös; achīö öp tarik tötakahalōn tö ngih panam vē aṅ Efisös, nö amahtö ngam chūök ngam yöng Artēmis, ngam insā inrē tö suktöre nö ṙā-ang el halīöngö.

³⁶Yē u nö tötmanahngen, hòṅ hachēvngenre yin; ui kësen.

³⁷Pò yīö kētö vē tarik, vē töt rēhĕn nö mu-ulāingen nup töthet chūök, öt rēhĕn nö ötlamëkôre tö ngam kikānö tēv hī.

³⁸Lökten yē Tēmĕtriös, yip töla-evṙen inrē hol ò, nö kumnyahaṅvlōn nö i tarik, sakāmu hē nun në kinṙôka, kamhôṅka inrē yip umuh. Hökngen cha yēḵ nö ve-eny fālen höö.

³⁹Yē e pöri nö tahëng nö fālen, ngaich halöökö min angū-ö tö yip kamhôṅka.

⁴⁰Pò hī ngaich ötkôlò öi hatönö min tö lāinyngen ngih tinṙōlen, ngih töng öt löknyu chööḵnyi. Ngaich ayī-ö mīnö öt huvē-eu ṙô ve-eny ngam tinṙōlen.

⁴¹Anū-ö ṙô ò; ngaich piyāingö yik tömaṙôngö.