Read Car_Nicobarese INLAHEN 2 Bible Online

INLAHEN 2 - Car_Nicobarese bible

INLAHEN 2

¹Hē sanölta ngam sakāmö Pentĕkòstē nö yih, hamūlöre cha-a nö hĕng kang chūök,

²Ngaich hönglūk ök ṙô löktö el halīöngö, tö sā tökumtö tökalēḵ kuföt; hatööḵlö ngam patī angū-ö i chūök cha nö ūichhaka.

³Ngaich meūkö tö cha nuk litāk kö kahĕng, nö sā tameūyö; kö teungtöre anū-ö nö i kui cha.

⁴Ngaich tööḵlö cha-a tö ngam Töhet Fanöinylö, ngaich kaknyöre tö ṙô tahëng ëlô, sā tī ngam Töhet Fanöinylö nö kētö ṙô cha.

⁵Yahūti yik umuh, tö pa-ekūö tö ngam Tēv, aṅ i nup taṙòkhöre panam elkatòh ngam halīöngö, mī-iyöng Yerūsalem.

⁶Ngaich hē ngih ṙô nö hāngö, yihtöre ngaich yik tömaṙôngö, ngaich uṙeh; pò cha nö kö hang ṙô cha, nö ṙôtö ëlô cha.

⁷Ngaich ṙôkhöre cha-a nö pōyen pinngangkūö nö ngö ṙô. Röh aich vē nö tö ṙô tö ëlô, aṅ Kelelī?

⁸Sitih öi hang ṙô cha, nö kö ṙô tö ëlô hī;

⁹Aṅ Pārtī, Mīt, Ēlam, mi-iyöng Mesapotamī, Yūtā, Kapatosiā inrē; aṅ Pòntös, Asi inrē;

¹⁰Pruki, Pampuli, Aikup, aṅ Lipyā lā Kurĕnī, mi-iyöng Rōma, Yahūti, tö vītu nö Yahūti inrē,

¹¹Aṅ Krētĕ, Arapī inrē, hang ṙô cha in, nö ṙôtö ëlô hī, minhôiṅyö la-en ngam Tēv.

¹²Ṙòkhöre cha-a nö ureh, öt akahalōn inrē; ngö ṙô cha-a tö höö, Asuh öng ngih töngatī?

¹³Rēvre pöri yik tömiyëḵṙô, nö ngö. Tööḵngen yin tö tufömngöre vāin.

¹⁴Söklöre pöri ang Pītör, nö holtö yik tö kahuk sīön; ngaich hūḵnyôre nö ve-ekūö cha, nö ngö ṙô, Yī-ö tarik aṅ Yūtā, yī-ö taṙòkhöre inrē mī-i Yerūsalem; akahalōn yin yēḵ tö ngih; hangihtöre inrē tö ṙô chu.

¹⁵Tön rö-ö yin vē nö mihiyōi, nö sā lōn yīö; ṙòngmö machūötörköṅny ṙô ön ing sakāmö.

¹⁶Tön ngih ṙô ök pròfĕt ön ngih, Yôĕl,

¹⁷Ngö ṙô An ngam Tēv, Ip manā-aṅ sakāmö min ṙöstö ngam Töhet Fanöinylöre Chin min i kuī-taṙòkhöre tarik; ngaich yip kūön yīö, kikōnyö kikānö inrē min nö mikahten; yip tö-ayal tarik yīö min nö meuk tö meūkö; yip tö köiny tarik yīö min inrē nö heūv haneūvö.

¹⁸I kui yip töhakövö, mahalanṙen Chu, kikōnyö kikānö inrē, ṙöstö ngam Töhet Fanöinylö min Chu-ö, i nup sakāmö anū-ö: ngaich cha-a min nö mikahten.

¹⁹Ngaich Chū-ö min hameuk tö pinngangkūö, lātulöng el halīöngö; minkahngö inrē, lātaṙeū ing panam, mahām, tameūyö inrē, lul, hahanusngö inrē.

²⁰Vīngöre min ngam tavūöi nö sinngūlö; vīngöre ngam chingëṅt inrē nö mahām, urēhĕkūö yanihih ngam sakāmö ngam Mā, ngam tökiröng tö-eūnyu sakāmö.

²¹Ngaich mīnö yip mahavëkö Mine-eny ngam Mā Tēv nö hayöökaṙen,

²²Yī-ö tarik aṅ Israĕl; hang ṙô chu yin; tö Yēsū ngam aṅ Nāsaret, ngam tarik tö hameuktuvö tö ngam Tēv nö in yīö, lökten i nup minhôiṅyö la-en, pinngangkūö, minkahngö inrē, tī ngam Tēv nö lökten in Ò, el ṙôngö yīö, sā mikahlōn yīö.

²³Anga-aṅ tökē-ĕ, sā ngam töha-ehangen inlēnngenre tö ngam Tēv; ngaich harātu tö yīö, fëlö inrē, nö lökngö eltī yip tötlöök tarik;

²⁴Ngam töhachohlöngö tö ngam Tēv, ṙānyuvö ṙā-ang im chanökö kinpaha; pò Ò nö öt haköpö tö e.

²⁵Pò Tāvit nö ngö ṙô tö inlahen Ò, Meuk ngam Mā Tēv Chin nö örheūheu nö i kūö Chu; pò Ò nö lāhāmö Chu, lökten Chu öt hanlöinyken.

²⁶Lökten Chu ngaich ṙāmö ellōn; ṙôtö ṙanāmölōnre inrē ngih litāk Chu. Ngih alaha Chu min inrē nöngngöh nö im mineūka.

²⁷Pò Meh öt ṙāngö ngih nômö Chu nö el Chūök Tökapah; ötrēhĕn Öm halöngngen ngam Töhet Meh nö meuk chinhūngö.

²⁸Mikahtö lōn Chu Man ngaich tö ngam talöökö nômö; hatööḵngen Chu min inrē tö ṙanāmölōn i kūö Meh.

²⁹Kahōlö; kô-òren chin öt piyū-u ṙô tö yīö tö ök muvöhngö hī, Tāvit; tö ò nö ngaich nö kapah, ūliyö inrē: holtöṙah hī ngam anūlö ò inrē, ing töngamuh.

³⁰Pò ò nö pròfĕt, akahalōn inrē tö ngam Tēv nö kilēḵngôre nö in ò, tö öp lamökngörit ò min nö ha-ūichlöngö nö el kantēra ò;

³¹Meuk ngih mū-unôich anga-aṅ; ngaich ṙôtö invanlö Kristū, tö Ò nö öt ṙā-ayö nö el chūök tökapah; öt rēhĕn ök alaha Ò nö chahū-uyö.

³²Anga-aṅ ngòh Yēsū töhacholöngö tö ngam Tēv; ṙòkhöre in ihö vamënyen Ò.

³³Ngaich yih töngamuh nö hapōilöngö nö lāhāmö ngam Tēv; ngaich nö teūngen tö ṙô ngam Yöng, nö kilēḵngôre tö ngam Töhet Fanöinylö; ṙösten Ò Anga-aṅtöngamuh, ngam maheuṅk yīö, ahang yīö inrē.

³⁴Rö-ö an nö Tāvit yamônlö nö el halīöngö; pò ò anga-aṅ nö ngö ṙô, Ngö ṙô An ngam Mā Tēv tö ngam Mā chu, Ūichngöre Man lāhāmö Chu;

³⁵Hanöng saha tī Chu vītö yip tökunyahaṅelmat tö Meh, nö ranöönö röön Meh.

³⁶Lökten hökngen vē taṙòkhöre aṅ patī Israĕl nö akahalōn takô tö ngam Tēv nö vīlen Ò, nö hĕnghöre Mā, Kristū inrē, ngòh Yēsū harātö yīö.

³⁷Ngaich hē cha nö hāngö e, ngaich lòkngöre ellōn cha-a; ngaich ngö ṙô tö Pītör, tö yik tahëng inrē tanīnöṙô, Kahōlö; Sitih öi min?

³⁸Ngaich ngö ṙô Pītör tö cha. Havöötö ellōnre yin vōkö inrē, yī-ö ṙòkhöre, i Minë-eny Yēsū Kristū, nö inṙēlö nup tökööl yīö, ngaich yī-ö min teūngen tö ngam inlōnti aṅ i ngam Töhet Fanöinylö.

³⁹Pòn lamöö in yīö ngam kinlēḵngô, i yip kūön yīö inrē, i yip taṙòkhöre inrē, yip töhavëtu min tö ngam Mā Tēv hī, nö in Ò.

⁴⁰Ṙōlö ṙô inrē Pītör nö iṙuhöṙô, nö ngö ṙô tö cha, Hayöökenre yin i ngih tötlöök tūmö.

⁴¹Ngaich yik hamôḵòṅ ṙô ò nö vōkö; ngaich hē ök sakāmö angū-ö; nö lūöi köṅny yik tarik töṙūötuṙen nö in cha.

⁴²Ngaich cha-a nö kamnipkūö nö im inköphöti tö yik tanīnöṙô, i innôlö, i finòkö rôti, i vine-eṅkūötēvinrē.

⁴³Ngaich ṙòkhöre cha-a nö pa-ekūö: pōyen nuk inrē pinngangkūö, minkahngö inrē, tī yik tanīnöṙô.

⁴⁴Ṙòkhöre yik ṙamātö ellōnre nöng mūl, höng hēngö inlānen inrē.

⁴⁵Inyihngö nuk inlānenre cha-a, ngaich katölhö kūöre nö ṙòkhöre, sālōn ngòh tö hĕng tak tarik.

⁴⁶Örheūheu nö kamnipkūö nö hamūlöre, nö el ngam töhet chūök; fòk ròtī inrē nö i patī; nya-aṅvkūö cha-a nö holtö ṙanāmölōnre, hēngö lōn inrē.

⁴⁷Ha-öiny ngam Tēv; aheukhuvö tö taṙòkhöre tarik. Ngaich ngam Mā Tēv nö ṙūötö ṙôngö cha, i tum sumkam, yik mī-im inyööken.