Read Car_Nicobarese INLAHEN 20 Bible Online

INLAHEN 20 - Car_Nicobarese bible

INLAHEN 20

¹Keuheūthëṙen ngam tinṙōlen, ngaich tīnngö mahavëkö yik mahaköp ang Pôl, ngaich ṙuhöl alaha cha; ngaich have-engritre nö in cha; ngaich kiröönngöre nö chuh Makētòni.

²Ngaich hē ò nö lök muh, pōihöl ṙô anga-aṅ, nö ṙuhöl alaha cha inrē, yihtöre anga-aṅ nö i Akayā.

³Lūöi chumngëṅtö anga-aṅ nö umuh; ngaich yik Yahūti nö ulāikenre nö hòṅ chökhuṙen tö ò, hē ò nö chuh Siriā, höng hòṅ havantöre ngaich anga-aṅ nö lök Makētòni.

⁴Hōlu anga-aṅ, nö tölngö Asī, tö hēḵ Sôpatör, ök aṅ Pīrīā, kūön Purhös, Sekuntös inrē, aṅ Tösalònikē; Kē-ös, Timòtī inrē aṅ Törpī, Tikikös, Tròfimös inrē, aṅ Asi.

⁵Urēhĕngrit pöri cha-a, ngaich hökken ih nö i Trô-as.

⁶Chuh ngaich īhö öi ṙā-ang Filippi, unôichrit nuk sakāmö Tötaföhlöng Ròtī; ngaich yihtöre öi in cha, i Trô-as, unôichrit tö taneui sumkam. Ngaich höngngöh īhö umuh, sat sumkam.

⁷Im töhet sakāmö, hē ih hamūlöre, fòk ròtī, ngaich ve-ekūö cha anga-aṅ Pòn hòṅ ngaich im huṙöich, söl chūöl hatööm rô-òtö ṙô anga-aṅ.

⁸Ṙōl nuk ëāṅvö el ök lātulöng urôhò, i chūök ih hamūlöre.

⁹Ngaich hĕng tak ök tarik, amūichhak nö i kūö lökhöt kuföt inkūp, Yutikös minënyö mahaṙòhlö; ngaich kūö Pôl nö marô-òtö ṙô nö iṙuhö ṙô, suktöre ngaich anga-aṅ, nöng haṙòh, ṙā-ang ël ök linūöi kölchap urôhò; ngaich kē-ĕ anga-aṅ nöng kapah.

¹⁰Yòhngö ngaich ang Pôl, ngaich afukngöre nö in ò, fūölan inrē; ngaich ngö ṙô, Ui ayôṙa; ṙòngmö nômu an.

¹¹Ngaich hē ò ngaich nö yòhlö, ngaich fòkròtī, ngaich nyā; ngaich ve-ekūö cha nö marô-òten, söl minlīlö peuheū, kiröönngöre ngaich anga-aṅ.

¹²Ngaich kētö ök nyīö cha-a nö aṅ; ngaich pōyen ṙanāmölōn.

¹³Urēhĕngrit īhö chuh el chōng, ngaich hatēhĕre öi chuh Asòs. In e öi hòṅ kē-ĕ Pôl; pòn ngatī inlēnngen angū-ö; pò ò anga-aṅ nö hòṅ kiröön nö lök el tanyô.

¹⁴Ngaich hē ih meukkūö ò i Asòs, ngaich kēḵ an īhö; ngaich yihtöre i Mitulēnī,

¹⁵Hatēhĕre ihö, ṙā-ang umuh; ngaich im huṙöich sakāmö öi kamtö Kī-òs; im, tahëng sakāmö öi sökngöre i Samòs; hēk im unôich sakāmö öi yihtöre i Milĕtös.

¹⁶Höng hòṅ chöḵökūöre ang Pôl tö Efisös; pòn sōḵnö marô-òten nö i Asī; pò ò nö kurāten, nö hòṅ i Yerūsalem, yĕn kô, im sakāmö Pentēkòstē.

¹⁷I Milĕtös anga-aṅ, nö tīnngö chamuh Efisös, nö havëtö yik mākūö ngam māṅ, nö in ò.

¹⁸Chalô cha-a nö in ò, ngaich ngö ṙô anga-aṅ tö cha, Akahalōn yin yī-ö, hēten tök raneh sakāmö chu yih i Asī, tö inlahen chu in yīö, ngih rô-òten.

¹⁹Lök la-en ngam Mā Tēv, holtö inyāichngö ellōn, holtö makmat, holtö kanihngen inrē, tī yip Yahūti nö ulāikenre nö chökuṙen tö chu.

²⁰Öt ma-īn ṙôre chin ve-eny nup tökôlò tī tö yīö; hangāṅlkenre inrē haköpten yīö, yē yīö mūlhaka, i patī yīö inrē.

²¹Hameukhömat yip Yahūti chin, Tahëng Mihëṅṙö inrē tö ngam invöötö ellōn tökū-ötö im Tēv, ngam mikah inrē im Mā hī, Yēsū Kristū.

²²Ngaich chin yih töngamuh, öt maninngenlōn, chuh Yerūsalem; öt akahalōn min tö lāinyngenre öich umuh;

²³Höng ngam vahënyö ngam Töhet Fanöinylö nö in chu, i në taṙòkhöre panam, nö ngö ṙô tö inkövö, kanihngen inrē, nöng höngö chu.

²⁴Rö-ö ön ngih nômö chu nö tö pōi ṙāi tö lōn chu, öt tökôlò inrē nö in chu; höng yē chu keuheūten tö ngam la-en, taneūngen chu aṅ im Mā Yēsū, ngam inhangkö ngam tölöök inhānga, ngam inlōnti aṅ im Tēv.

²⁵Yĕh meuk; akahalōn chin tö yīö ṙòkhöre yī-ö, chūök ṙô chu ahangkö ngam pūlngö, öi öt meukkūö chu min hēk.

²⁶Lökten chin ve-eny nang yīö, tö chu ngaich keuheūten in yīö; kahngenre yin yī-ö ngaich.

²⁷Öt ma-iṅhiṅv chin tö ṙôre in yīö, tö nup tökeuheūtöre inlēnö aṅ im Tēv.

²⁸Aṅtöre yin; aṅtö minë pököre inrē, minë hayöng yīö, i tī ngam Töhet Fanöinylö, nö vīlen yīö mameukken, hòṅ yīö ha-aṅlö ngam Māṅ ngam Tēv, ngam havah Ò nö ṙāi tö mahāmre.

²⁹Akahalōn chin tö chu min höng chuhhë, ngaich nup tö tainy am min tö yihtöre nö in yīö, öt ṙāḵlö në pököre.

³⁰Hĕnghöre löklö in yīö yip min tarik, tö ṙôtö tötlöök, nö hòṅ hachōḵngen yip mahaköp nö asīnken cha.

³¹Lökten yin aṅhaṅti; köpölōn tö chu lūöi samyeūheu öt ṙākenre haköpten yīö nyöre, peuheū harap, holtö pineūnyö.

³²Ngaich chin töngamuh kēten yīö im Tēv, im ṙô ngam inlōnti aṅ in Ò, ngam tökô-òren nö ṙūölen yīö, kētö amin yīö inrē i nup taṙòkhöre tö ahetlöng.

³³Öt yikngö rupīö holre chin, humlum, hilā inrē.

³⁴Akahalōn yin yī-ö, tö në kuntī chu nö meukṙen chu, vē hol chu inrē.

³⁵I tö keuheūttöre chin hachōten yīö, hòṅ yīö ngatī meukṙen yip tötkalēḵ alaha; köpölōn inrē tö në ṙô ngam Mā Yēsū, nö ngö ṙô, Mötlö kanôlò an ngam kinëḵeṅti, tö ngam kinëḵeṅ.

³⁶Keuheūthë ṙô anga-aṅ nö ngatī ṙô, simngöre ngaich anga-aṅ, ngaich ve-ekūötēv, nö holten cha.

³⁷Ṙòkhöre cha-a ngaich nö peuiny, ngaich fahalre nö elranôṙö ò, ngaich hāmkūö ò.

³⁸Möthë miṙivlōn tök ṙô ò, tö cha nö öt meukkūö ò min nö hēk. Ngaich söömngen ò cha-a nö ik chōng.