Read Car_Nicobarese INLAHEN 23 Bible Online

INLAHEN 23 - Car_Nicobarese bible

INLAHEN 23

¹Ngaich Pôl nö haköpmatre nö Ngëichkökūö yik kamhôṅka, ngaich ngö ṙô, Kahōlö; söl ing töngamuh chin sakāmö, öich lök i nup chöngö ngam Tēv, holtö lanöökö kuilōn, örheūheu.

²Ngaich Anga-aṅ nö hōtö yik samökhak nö ranghen ò, nö fatāk kūö ò.

³Ngaich ngö ṙô Pôl tö ò, Fëlö man min tö ngam Tēv, me-eṅ tö mi-isohnyu kaha; me-eṅ amūichhak kahòkken chu, asā ngam chöngö; ngaich hōten chu fohoh, harīkiyö töm chöngö.

⁴Ngaich yik samökhak nö ngö ṙô, Ötlēkôre ömeh tö ngam mākūö kūönṙô ngam Tēv?

⁵Ngaich ngö ṙô Pôl, Kahōlö; öt akahalōn chin tö ò nö mākūö kūönṙô; pòn ngö kinūichngö, Uh man chōchö ṙô tö yip mahayöng yip tarik meh.

⁶Hē Pôl nö meuk yik Satuki nö hĕng lā, hĕng lā yik Feresī inrē, ngaich ngö ṙô anga-aṅ tö yik kamhôṅka, Feresī chin kòl chu-ö, kūön Feresī inrē. Kūö mineūkkö ngam invanlö tö kapah chin kahòkkaṙen.

⁷Keuheūthë ṙô anga-aṅ nö ngatī ṙô, ngaich yik Feresī, tö yik Satuki inrē, nö lā-alkūöre, ngaich yik tömaṙôngö nö harēvöre.

⁸Pò yik Satukī nö rö-öv ṙô tö invanlö tökapah, öt ma-ahāngavö, öt rēhĕn ma-alaha; kö ve-eny u pöri yik Feresī.

⁹Ngaich taṙōla ṙô cha-a; rēvre yik kamūich aṅ i yik Feresī samöklöre, ngaich kilṙô, nö ngö ṙô, Öt kôtökūö in tö tötlöök i ngòh tarik. Sitih öre yĕn ma-alaha, hēk yĕn ma-ahānga vame-eṅkūö Ò?

¹⁰Ngaich hē cha nö lā-alkūöre, ök mākūö kumyung nö hōten yik kumyung nö kēḵngen ò, nö ṙā-ang in cha, ngaich kēhöt ò nö el chūök kumyung; pò ò nö pa-ekūö tö chinṙësö Pôl tö cha.

¹¹Ngaich im hatööm ngam Mā nö sökhaka nö ranghen ò, ngaich ngö ṙô, Um pa-ekūö; sā meh ngaich eūken Chu i Yerūsalem, ngatī man inrē eūken Chu i Rōma.

¹²Peuheū-eulre ngam peuheū, ngaich yik Yahūti nö ulāikenre nö hamūlöre, rūtngövahre cha-a, yē cha nö nyā, òk inrē, hanöng saha tī cha nö fëlngen Pôl.

¹³Saṙaklöng tum tak yik, tö tö fën anāi, yik töngatī.

¹⁴Ngaich yihtöre cha-a nö i yik mākūö kūönṙô, i yik mā inrē, nö ngö ṙô, Rūtngövahre in īhö, yēi nyā, òk inrē hanöng saha tī ih fëlngen Pôl.

¹⁵Lökten yin holtö yip kamhôṅka, mikah tö lōn ap mākūö kumyung, hòṅ ò nö kēten ò nö in yīö, öi sā tö hòṅ kahòkken ò, öi halöökṙenre. Ngaich īhö, yē ò nö öl nö röhta, öi iṙū fëlngen ò min.

¹⁶Hāngö cha pöri ök kūön kanānö Pôl, nö hòṅ hayūnan; yihtöre anga-aṅ nö el chūök kumyung, ngaich ve-eny nang Pôl.

¹⁷Ngaich hĕng tak havëti ang Pôl, tö yöngṙen yik töhēngòng kumyung; ngaich ngö ṙô, Kētö ngòh man tarik, ip mākūö kumyung; tön yô-òv ap ṙô ò nö in ò.

¹⁸Ngaich ngô-òṅ anga-aṅ tö ò; ngaich kētu nö ik mākūö kumyung; ngaich ngö ṙô ök yöngṙen yik töhēngòng kumyung, Havëtu chin taheui tö Pôl, ap tö kē-ĕ; ngaich ve-ekūö chu anga-aṅ, nö hōten chu, kētö ngòh tarik nö in meh.

¹⁹Ngaich ök mākūö kumyung nö kēḵ kël ò, ngaich ṙūöngen ò, ulāikenre ngaich nö hatönan, nö ngö ṙô, Asuh ap ṙô meh, ve-eny nang chu?

²⁰Ngaich ngö ṙô anga-aṅ, Halēnöre yip Yahūti nö hòṅ ve-ekūö meh, öm kēten Pôl huṙöich, i yip kamhôṅka, nö sā tö hòṅ hēk nö halöökṙenre nö hatönan.

²¹Uh man lökten hōḵo ṙô cha; tön saṙaklöng tum tak yip tarik tö tö fën anāi tö hòṅ hayūnan, yip ramūtngö vahre yē cha nö nyā, òk inrē, hanöng saha tī cha nö fëlngen Pôl. Lēn yip nö ngaich töngamuh, hökkö ap ṙô aṅ in meh.

²²Ngaich ök mākūö kumyung nö hökngen ök tarik nö kiröönngöre; sōten ò nö vahënyu nang tö tarik, tö ò nö hameuktö e nö in ò.

²³Nët tak havëti ngaich anga-aṅ, töyöngṙen tö hēngòng kumyung, ngaich, ngö ṙô, Nëtòng halēn nan tö kumyung nö kiröönngöre tölngö Kaisarī, sat anāi aṅ uk kōra, nëtòng yip tövöiyu, ip tömachūötör köṅny ṙô, tö hatööm.

²⁴Ngaich hōten cha anga-aṅ inrē nö meuk chūök Pôl tö kōra, hòṅ cha nö kēten ò, nö öt pinlānguṙen nö ip mahayöng Filik.

²⁵Ngötī anga-aṅ nö kūichngö līpöre,

²⁶Salām, ngam tölngö tö-akaha mahayöng Filik, ang Klòtiös, Lusīös.

²⁷Tö kē-ĕ ön ngòh tarik tö yip Yahūti; ngaich nö hòṅ fëlngen ò cha-a; hē chu yihtöre in cha, holtö kumyung, ngaich kēḵ an; pò chu ngaich akahalōn tö ò nö aṅ Rōma.

²⁸Ngaich hòṅ akahalōn chū-ö töp lökten cha nö vënyen ò, ngaich kēten ò i yip kamhôṅka.

²⁹Ngaich kôtökūö chū-ö tö ò nö vënyu nöng i inlahen ap kui cha; öt fāluṙen pöri anga-aṅ töp löktenre nö kumpaha, hēk kalonghötvö.

³⁰Ngaich hē chu vënyu nang tö yip tarik nö hòṅ fëlngen ò, iṙūö tīnngen ò chū-ö nö in meh; tölṙô yip vamënyen ò inrē, nö yihtöre nö i kūö meh. Salām.

³¹Ngaich yik kumyung nö kē-ĕ Pôl, nö sā tinöölô cha; ngaich kēten ò, tö hatööm, nö i Antipatrīs,

³²Ngaich im huṙöich, yik aṅ uk kōra nö ṙā-ai nö söömngen ò; ngaich havantöre cha-a nö i chūök kumyung.

³³Chalô cha-a nö i Kaisarī; ngaich kētö ök līpöre nö ik mahayöng; kēten Pôl inrē nö i kūö ò.

³⁴Keuheūthëṙô anga-aṅ nö ve-ekūö e, ngaich hatönan tö panam ò.

³⁵Ngaich hē ò nö akahalōn tö ò nö aṅ Kilikī; ngaich ngö ṙô, Hòṅ hang falngen meh chin min, yē yip vamënyen meh nö yih. Ngaich hōten ò anga-aṅ nö aṅtu nö el ök patī Heròt.