Read Car_Nicobarese INLAHEN 25 Bible Online

INLAHEN 25 - Car_Nicobarese bible

INLAHEN 25

¹Yih ngaich Festös nö im panam, ngaich unôichrit tö lūöi sumkam, nö chuh Yerūsalem, nö ṙā-ang Kaisarī.

²Ngaich yik mākūö kūönṙô, yik yöngṙen yik Yahūti inrē, nö ve-eny fālen Pôl nö in ò.

³Ngaich ve-ekūö ò cha-a, nö havëtôre nö hōten ò nö tīnngö mahavëten Pôl nö i Yerūsalem; pò cha nö hòṅ hayūnan nö el talöökö, nö hòṅ fëlngen ò.

⁴Ngö ṙô pöri Festös, tö Pôl nö kalonghötvö nö i Kaisarī; tö ò inrē anga-aṅ nö öt ṙôktörevö nö chuh in e.

⁵Ngaich ngö ṙô anga-aṅ, Lökten, hökngen cha yip aṅ in yīö, mā, nö hol chu nö kiröönngöre; ngaich yĕn töchōchuvö min ip tarik, hökngen cha nö vënyen ò.

⁶Ngaich hē ò nöngngöh nö in cha, öt saṙaklöngkūö sumkam, tö tö hëvhöre, hēk söm; ngaich im huṙöich nö ūichhaka nö el chūök kamhôṅka; ngaich hōten Pôl nö kētu.

⁷Chalô anga-aṅ; ngaich yik Yahūti, yik yamih nö ṙā-ang Yerūsalem, nö havīlen ò; pōyen ṙô nö ve-eny tökiröng fālen ò, nuk töthanmeukten tö cha,

⁸Ngaich ngö ṙô Pôl, nö laklöre, Öt rēhĕn chin fāluṙen im chöngö vē Yahūti; öt rēhĕn im töhet chūök, öt rēhĕn in Kaisöör.

⁹Ngaich pöri Festös nö ngö ṙô tö Pôl, Röh öm hòṅ chuh Yerūsalem, öm kahòkkaṙen tö chu in e tö u? pò ò nö hòṅ hanghuṙen tö yik Yahūti.

¹⁰Ngö ṙô pöri Pôl, Ngaich chin sökhaka i kūö ngam chūök Kaisöör nö kahôka, i chūök chu hòṅ kahòkkaṙen, Rö-ö chin chōchö fālen i vē Yahūti, sā mikahlōn meh takô.

¹¹Yē chu öich tötlöökö la-en, öich fāluṙen inrē töp löktenre kumpaha, öt sōḵ chin kapah. Yē u pöri nö tötkô-en, nup ṙô cha nö ve-eny fālen chu, öt hĕng tak tökô nö kēten chu in cha, Asöltöre chin in Kaisöör.

¹²Keuheūthëṙô Festös nö ve-ekūö yik kamhôṅka, ngaich ngö ṙô, Ngaich man hòṅ asöltöre in Kaisöör; chuh in Kaisöör man min ngaich.

¹³Haroh tum hang sumkam, ngaich ök rācha Akrippā, Pörnikē inrē nö yih nö i Kaisarī, nö salāmö Festös.

¹⁴Ngaich pò cha nö ṙōl sumkam nöngngöh, ngaich Festös nö ve-eny inlahen Pôl, nö ik rācha, nö ngö ṙô Hĕng taka öp ihih tarik, tökē-ĕ; ngaich nöng ṙā-ayö tö Filik.

¹⁵Öp tövënyu tö yik mākūö kūönṙô, yip yöngṙen yip Yahūti, nö in chu, hē chu i Yerūsalem; havëtôre cha-a nö öthakôlò ò.

¹⁶Ngaich sapṙô cha chū-ö tö e nö öt fālen aṅ Rōma, nö kētö tarik, yĕn öl nö kôtaṙô yip vame-eny, töp tövënyu inrē, nö i kūö höö; ngaich hökiṙen nö laklöre tö nup vine-eny fālenre.

¹⁷Ngaich hē cha nö yih nö ihih, öt ahāṅkenre chu-ö; im huṙöich pöri öich ūichhaka el chūök kamhôṅka, ngaich hōtöp tarik nö kētu.

¹⁸Hē yik vamënyen ò nö söklöre, ngaich nöng öt vahënyu töp tötlöök la-en ip tarik, sā lōn chu sin.

¹⁹Höng inlahen öp kui cha, inlahen ök tö hĕng tak tarik inrē, Yēsū, ök tökapah; ngaich vënyu tö Pôl nö aṅ.

²⁰Ngaich chū-ö örheuveū-en kahòkken töngatī; ngaich hatönan yĕn hōḵ nö chuh Yerūsalem; ngaich in e nö kahòkkaṙen tö u.

²¹Ngaich pöri Pôl nö hòṅ asöltöre nö ip yöng rācha; ngaich hōten ò chū-ö nö haköpö hanöng saha chu tīnngen ò nö in Kaisöör.

²²Ngaich ngö ṙô Akrippā tö Festös, Hòṅ hang ṙô öp tarik chin öre chu-ö. Huṙöich man yēḵ hang ṙô ò, ngö ang Festös.

²³Ngaich im huṙöich, nāṅ Akrippā, nāṅ Pörnikē nö yih, nö holtö kanôlò, holtö yik mākūö kumyung, yik mā tarik inrē aṅ ik panam; kuhēthötre nö el ök chūök hamang; ngaich i chöngö Festös, ang Pôl nö kētu.

²⁴Ngaich ngö ṙô Festös, Rācha Akrippā, yī-ö inrē tarik mi-ihih; meuk ngòh tarik yin; ngòh tövënyu tö yip tömaṙôngö Yahūti nö in chu, i Yerūsalem ihih inrē; sōtu anga-aṅ nö aṅ, tö cha.

²⁵Öt kanôtuvökūö pöri chu-ö, töp lökten kinpaha ò; ngaich pò ò inrē nö hòṅ asöltöre nö ip yöng rācha, ngaich hòṅ tīnngen ò chu-ö.

²⁶Öt huveū-eu tī chin kūichtö līpöre ap mā chu; lökten chin kēten ò nö i kūö yīö, möthë i kūö meh, me-eṅ rācha Akrippā; hòn keuheūthëṙen intönö, ngaich kahūchuvö chū-ö min.

²⁷Pò e nöng sā kumlō-ov, tö lōn chu, ngam sinöömngö tökē-ĕ, nöng öt vënyu fālen.