Read Car_Nicobarese INLAHEN 26 Bible Online

INLAHEN 26 - Car_Nicobarese bible

INLAHEN 26

¹Ngaich ngö ṙô Akrippā tö Pôl, Halöngtuṙen man kahngôre.

²Hateutnyö këlre ngaich Pôl, ngaich ṙô lanaklöre: Rācha Akrippā; ṙāmölōn chin, ṙô lanaklöre: i kūö meh, töngamuh, i inlahen nup taṙòkhöre fālen, vinënyö chu tö yip Yahūti.

³Pò meh öm tö-akahalōn takô tö nup kui i yip Yahūti, inhôṅngô inrē.

⁴Lökten chin hōten meh aṙē-ĕlōn hang ṙô chu. Ngam inlahen chu hēten tö nyinī-öṅ chu, urĕh sin nö i vē tarik chu, i Yerūsalem inrē, akahalōn yin vē Yahūti nö ṙòkhöre.

⁵Akahalōn yin tö chu hēten tö raneh, yē cha öre nö hòṅ hameukhöti, tö chu öt hanāṅtuṙen inlahen i ngam kui ih, öich sā Feresī.

⁶Ngaich chin yih sökhak töngamuh, kahòkkaṙen pò kūö mineūkkö ngam kinlēḵngô ngam Tēv nö i yik muvöhngö ih.

⁷Ngam kinlēḵngô maheūṅkkö inteungten yik tö nët sīön miyöngö, kalēḵĕlōn nö lök la-en ngam Tēv, nö peuheū harap. Kūö ngih mineūka chin vënyu tö yip Yahūti; me-eṅ rācha.

⁸Kūö yòh öi öt kô ṙātö ellōnre, yē ngam Tēv nö hachohlö tökapah.

⁹Tö ngö lōn chin chū-ö inrē, öich hòṅ pōihölö lā-al ngam Mine-eny Yēsū aṅ Nāsaret.

¹⁰Ngatī tī chin i Yerūsalem; maṙôngö kalonghöt chū-ö tö yip töhet, i chöngö yip mākūö kūönṙô, ngaich yē cha nö kumpaha, höng hōḵ-o e chū-ö inrē.

¹¹Ṙōl heuh chū-ö hakôlò cha el nup chūök vine-eṅkūötēv. Hōḵngen cha nö töt lamëkôre; ngaich öich tainy tö cha, öt hakôlò cha öich i tahëng pumnāmö.

¹²Ngaich angū-ö la-en chu, kiröönngöre i Tāmöskös, öich chönguvö, tölô inrē tö yik mākūö kūönṙô.

¹³Me-eṅ rācha; ik sakāmö chū-ö el talöökö, öich meuk ök töyang aṅ el halīöngö, yang nö havīlen chu, yik hol chu inrē kumröönngöre.

¹⁴Ngaich hē ih fukngö el tumlat, ngaich hang ök ṙô chū-ö tö ngö ṙô tö chu, i ëlô Heprāi, Sôl Sôl, kūöyòh öm öt hakôlò Chu? Chök man, röönngö kūö ngam töchökhukūö.

¹⁵Ngaich ngö ṙô chu-ö, Mā! Achīö Öm Me-eṅ? Ngaich ngam Mā nö ngö ṙô, Yēsū Chin, Öich töt hakôlöngṙô tö meh.

¹⁶Choholre pöri me-eṅ, söklöre; tön ngih ön lökten Chu meūkö tö meh, Öich vamīlen meh mameukṙen, ameūkö në inrē, minë maheuṅk meh ngaich nup mineūkö Chu min inrē tö meh.

¹⁷Katöllen meh Chin, ṙā-ang i yip tarik meh, ṙā-ang i Yip Tahëng Mihëṅṙö inrē yip chūök meh tīntu tö Chu;

¹⁸Löpnyökūö mat cha inrē, im hanātö, ṙā-ang im sinngūlö, havöötökūö cha inrē im Tēv, ṙā-ang ngam minhôiṅyö Sātan; hòṅ cha nö teūngen tö inṙē-ĕl tökööl, ngaich amīnu nö i yip tö-ahetlöngö lökten im mikah in Chu.

¹⁹Lökten chin, me-eṅ rācha Akrippā, öich öt kô öthang ṙô ngam tömeūkö aṅ el halīöngö.

²⁰Ngaich öich ahangkö yip aṅ Tāmāskös urĕh, i Yerūsalem, keuheūtngöre chūök i panam Yūtā, i yip Tahëng Mihëṅṙö inrē; hòṅ cha nö havöötö ellōnre, havöötö kūöre inrē nö im Tēv; la-evṙen inrē tö nup la-en invöötö ellōn.

²¹Angū-ö an lökten yip Yahūti nö kē-ĕ chu, el ap töhet chūök; ngaich hòṅ fëlngen chu.

²²Hōluṙen pöri chū-ö tö ngam Tēv öich sökhaka töngamuh, hameukhömat tökūöṅnö, töpōyö inrē, öt inrēṙu ṙô, höng nup ṙô yik pròfĕt, Môsös inrē,

²³Tö Kristū nö tö hòṅ kihngen, tö Ò inrē nö urĕh, lökten im invanlö tökapah, nö ahangkö ngam hanātö i yip tarik ih, yip Tahëng Mihëṅṙö inrē.

²⁴Ngaich hē Pôl nö ngati ṙô, nö laklöre; ngaich pōitô Festös nö ngö ṙô, Pôl; kulō-ov man; tökūö ṙôken haköpre.

²⁵Ngaich ngö ṙô anga-aṅ, Rö-ö chin kulō-ov; me-eṅ tölngö tö-akaha Festös; ṙô tö tökô-en chin, öt hapōiluvö.

²⁶Akahalōn an ngam rācha tö u tö nup tö hayunngöre tö lōn chu, nö in ò; pò u nö töthayunkaṙen kinëken.

²⁷Me-eṅ rācha Akrippā,, ṙātö ellōnre ömeh, i nup ṙô yip pròfĕt? Akahalōn chin tö meh ṙātö ellōnre.

²⁸Ngaich ngö ṙô Akrippā tö Pôl, Rahëchyen ṙô man hōten chu vītuṙen Kristīön.

²⁹Ngaich ngö ṙô ang Pôl, Rö-ö man höng me-eṅ, rahūtten chu i kūö ngam Tēv, tön ṙòkhöre inrē vē hamang ṙô chu töngamuh, yĕn rahëchyen, yĕn pōyen nup ṙô, öi sā chu, uh pöri nyëkö.

³⁰Choholre ngaich ök rācha, tök mahayöng, Pörnikē inrē, ṙòkhöre yik hamòl cha nö ūichhaka inrē.

³¹Hē cha nö ngaich nö kiröönngöre, ngaich ve-ekūöre nö ngö ṙô, Öt fāluṙen ön ngòh tarik, töp lökten kinpaha, hēk nyinëkö.

³²Ngaich ngö ṙô Akrippā tö Festös, Ṙā-ayö an öre ngam tarik, yĕn öt hòṅ asöltöre ang nö in Kaisöör.