Read Car_Nicobarese INLAHEN 27 Bible Online

INLAHEN 27 - Car_Nicobarese bible

INLAHEN 27

¹Ngaich hē ih hōtu öi chuh Italī, ngaich kētu ang Pôl, tö yik rēvre tökē-ĕ tahëng, nö ik yöngṙen tö hēngòng kumyung, Yūli minënyö, aṅ i yik amahten Òköstös invëka.

²Yôklö ihö ngaich el ök chōng aṅ Etramutti, ök chamuh i nup panam i kūö mai i Asi; ngaich elmai ihö. Hol ih Aristakös ök aṅ Tösalònikē.

³Sökngöre ihö i Sītōn im huṙöich; ngaich Yūli nö ṙūötökūö tö Pôl; halöngten ò nö kuhēt nö in yik holre, ngaich meūken tö cha.

⁴Ṙā-ang umuh ihö hēk elmai, ngaich lökngö elkatòh Saiprös/Kuprös ihö, pò ngam kuföt nö asaha ih.

⁵Ngaich hē ih havāngngö el ap mai Kiliki, Pampuli inrē, yih ihö ngaich i Mūra, ap tö kiröng elpanam i Lūki.

⁶In e ök yöngṙen tö hēngòng kumyung nö kôtökūö tök chōng aṅ Aleksanri, chamuh Itali; ngaich hayôklen ih anga-aṅ ël ò.

⁷Ngaich ṙōl sumkam īhö höng öt yih; höng pītnyöre ihö öi kamtö Nitös; öt halöngtuṙen tö ngam kuföt, ngaich lökngö elkatòh Krĕtē ihö, kamtö Salmôni.

⁸Ngaich höng pītnyöre öi haröshötre, ngaich yihtöre öi i Tölöök Chūök Chōng; röhta angū-ö nö ip panam Lasīa.

⁹Marô-òten ihö, kihngen kinröönngö; pò ngam Inhīkö nö ngaich nö keuheūten. Ngaich ve-ekūö cha Pôl, nö ngö ṙô,

¹⁰Mah! Akahalōn chin tö hī min palā-aiṙen; ngaich pōihangen yanëḵngen inrē, öt höng ngòh chōng; tön nup aṅ ò inrē, ayī-ö inrē tarik.

¹¹Ök yöngkūö chōng pöri, ök töchōngu inrē, ahang ṙô, ök yöngṙen tö hēngòng kumyung, nö mötlö tö nup ṙô Pôl.

¹²Ngaich pöri ngam chūök chōng nö öt tölöök nö chūök innyatlö hē el sūng, ṙōl tak yik hamôten ih, ṙā-ang umuh, öi hōtu tö cha tölngö Fòinik, yēi kô; ngaich in e höngngöh hē ngam sūng; ök chūök chōng i Krĕtē, tö kū-ötö kapā chuhöt, lòhngö chuhöt inrē.

¹³Ngaich hē ök tölahööṙa kuföt. Löklö lā lòhngö, ngaich teūngen cha-a, tö lōnre; tūöklö sanumti kirap cha-a ngaich; ngaich hatēhĕre, nö haröshötre nö i Krĕtē.

¹⁴Rĕh rô-òten ngaich ök yöng kuföt, ök lamöklö kapā chuhöt, töng chavīṙa.

¹⁵Ngaich ngam chōng nö kô-òngvah; öt kô tö ngam kuföt; ngaich höng hökngenre ihö, ngaich heuingö.

¹⁶Lökngö elkatòh öp kun panam ihö, Kôtā minënyö; ngaich haköpngö ök kupòk ihö, öi höng pītnyöre.

¹⁷Ngaich hē cha nö hatūöilen ò; ip tölngö kanô-òṅre cha-a nö nyëkṙat ök chōng. Ngaich pa-ekūö cha-a tö lanönhötre nö i Surtis, hatūöitö nuk intĕhre cha-a, ngaich höng heuingö.

¹⁸Kilöönö ihö tök yöng chanôchö; ngaich im tahëng sakāmö cha-a nö kavalngö aṅre.

¹⁹Ngaich im linūöi sumkam cha-a nö hakôtö tīre nö sukngö nuk chehen ngam chōng.

²⁰Öt tavūöiyu, öt taneūsuvö mat nö rēhĕn nö ṙōl hang sumkam; ngaich ngam yöng chanôchö nöng in ih; öt lōnuvö ihö ngaich, töre, öi tö aṅ.

²¹Hē cha nö ngaich nö marô-angen nö öt nyā, söklöre ngaich Pôl nö ellōn cha, ngaich ngö ṙô; Mah! Hang ṙô chu yin öre ngaich, ui ṙāngö Krĕtē, ngaich yih töngamuh öi palā-aiṙen, yëḵngen inrē.

²²Hōten yīö pöri chu-ö, öt pa-ekūö, öt hĕng tak min nö in yīö töpalā-aiṙen, höng ngòh chōng.

²³Pòn hĕng tak, amòh tö hatööm; ök ma-ahānga aṅ im Tēv, nö sökhaka nö in chu, ngam tö īnu tö chu, ngam lahök la-en chu inrē.

²⁴Ngaich ngö ṙô ök ma-ahānga. Um pa-ekūö, Pôl; hòṅ sökhak man I kūö Kaisöör; kē-ĕkūö meh An inrē ngam Tēv, tö yip hol aṅ meh.

²⁵Lökten ui pa-ekūö; tön ṙātö ellōnre chin im Tēv, tö e min nö ngatī, sā ṙô Ò tö chu.

²⁶Höng lönhöt in min, ip tö hĕng kun panam.

²⁷Finënsīön mitööm ngam chanôchö, ngaich im chūöl hatööm yik yōm chōng nö röhta nö i panam, tö lōnre, hē ih ël ap mai Atriā, öi höng kalūka.

²⁸Ngaich kalah kūö panam cha-a; ngaich kôtökūö tö e nö nët anāi tum tasöm. Rĕh rô-òten, hēk cha-a nö kalah kūö panam; ngaich taneui sīön tasöm.

²⁹Ngaich pa-ekūö īhö tö lanönhötre, öi lökhöt kui ihong; fënö sahumngö cha-a ngaich tö sanumti nö lā rit; ngaich rūttö peuheū.

³⁰Ngaich hē yik yōm chōng nö hòṅ ṙāngö ök chōng; ngaich hatūöitö kupòk nö el mai, nö hanyatkölōn re nö sā tö hòṅ sumngö sanumti nö lā kuilö;

³¹Ngaich ngö ṙô Pôl tö ök yöngṙen tö hēngòng kumyung, yik kumyung inrē, yē vē nö öt ngöh nö el ngòh chōng, öt aṅ min ayī-ö.

³²Ngaich yik kumyung nö rökngö ök pisik ök kupòk; ngaich hökngen ò nö suktöre.

³³Ngaich hòṅ peuheū-eulre ngam peuheū, ngaich ve-ekūö cha Pôl, nö hōten cha nö nya-aṅvkūö, nö ngö ṙô, Finën sīön sumkam yīö ön ngih, öi höng öl nya-aṅvkūö.

³⁴Lökten chin hōten yīö nyā; angū-ö an anāhaṅ yīö. Öt hĕng hang milöichö keūyö yin min tö töpalā-aiṙen.

³⁵Keuheūthëṙô anga-aṅ tö e; ngaich kēḵ ròti, ngaich ha-öiny ngam Tēv nö i kūö cha nö ṙòkhöre; fôkö e ngaich, ngaich kētöre nö nyā.

³⁶Ngaich cha-a nö ĕhten nö öt pa-ekūö, ngaich nya-aṅvkūö cha-a inrē.

³⁷Nëtòng sat anāi tafūöl tak īhö el ök chōn, öi ṙòkhöre.

³⁸Keuheūthëkūö cha-a nö nyā, ahöhlö ngam chōngcha-a ngaich nö sukngö nuk sāiny nö el mai.

³⁹Ngaich hē e nö ngaich nö hat; öt akahakūö cha-a tök panam; meuk ök tö hĕng pöri cha-a, tö kilūhötre nö i kuyāyö; ngaich ve-ekūöre cha-a, yē cha nö kô nö lökhöt in e tī tök chōng.

⁴⁰Ngaich rökngö nuk sanumti cha-a; ngaich nö ṙāngö u nö el mai; luhlö nyanëk nuk kanëḵritlö cha-a inrē; ngaich kū-ötö kuyāyö.

⁴¹Lökhöt ök chūök nuk mai pöri cha-a, nö fatahhen höö kūö; ngaich aseūtlö ök chōng; ngaich köp ök kuilö öt hanlöinyken; ngaich pöri ök ritlö nö oh tökūö kumlēḵ mahūṅvö.

⁴²Ngaich ve-ekūöre yik kumyung, nö hòṅ fëlngö yik tökē-ĕ; pòn sōten cha nö yööhöt, ngaich meutngö.

⁴³Sōtu pöri cha-a tö ök yöngṙen kumyung; pò ò nö ma-iṅ nômö Pôl; ngaich hōtö yik tökô anga-aṅ, nö yöö, nö sūḵungre nö el mai; ngaich urēhöt nö el tanyô.

⁴⁴Ngaich yik tahëng, rēvre nö el savaich, rēvre yik el nuk töng aṅ ök chōng. Ngatī inlahen cha-a, ngaich ṙòkhöre nö el tanyô.