Read Car_Nicobarese INLAHEN 28 Bible Online

INLAHEN 28 - Car_Nicobarese bible

INLAHEN 28

¹Hē ih ngaich ṙòkhötre, ngaich möl öi akahakūö tök kun panam nö Malta invëka.

²Ngaich yik aṅ ök kun panam nö aheūkölōn tö ih, hameuilökūö tameūyö cha-a, ngaich kē-ĕ ih öi ṙòkhöre, kūö ök kumṙah, laneūchö inrē.

³Hē Pôl nö hamūl ngòh, ngaich chaphöt u nö i kūö tameūyö; hĕng nòng ök pēch mameutlö, tökūö ṙanācha; nöng köp nö i kël Pôl.

⁴Ngaich hē yik aṅ ngam panam nö meūkan nö kilölhaka nö i kël Pôl; ngö ṙô cha-a tö höö, Kô ön ngòh tarik ngòh, nö famël tarik. Öt kô-òngvah lang anga-aṅ nö el mai; sön nö öt halöngtuṙen nö aṅ, tö ngam kinṙôka.

⁵Kichenyngö ök pēch pöri ang Pôl, nö i kūö tameūyö; ngaich nöng öt chök.

⁶Ngaich anga-aṅ nö tö-aṅhaṅ alaha, tö lōn cha; hēk hönglūk nöng fukngö nö kapah. Hē cha pöri nö ngaich nö marô-òten nö hatīönken ò, nöng öt fehevṙen; ngaich haṙī-ing ellōnre cha-a, tö ò nö tēv, tö ṙô cha.

⁷Röhta nö in e, ök panam ök mākūö ök kun panam, Pupliös ök minënyö ò, ök kamëḵeṅ ih, ngaich lūöi sumkam nö haṙūötken ih, nö aheūkölōn.

⁸Ngaich ök yöng ò nö vahavö, vūöi, sôḵòiny sāṙen inrē. Yihtöre ang Pôl nö in ò, ngaich löökentī tö ò.

⁹Keuheūthëṙen angū-ö, ngaich yik tahëng aṅ ök kun panam, nö kētö yik tövahavö nö in Pôl, ngaich lööken cha-a.

¹⁰Yik tö pōyen tī nö hakôlò ih; ngaich hē ih chuh, ngaich chaplö aṅ ih cha-a, tö nuk hanāṅten ih.

¹¹Unôichrit tö lūöi chumngëṅtö īhö, öi chuh, lökngö ël ök chōng aṅ Aleksanri, ök mu-umuh hē ök sūng; ök töminkahnguvö tö Tumnëtö.

¹²Sökngöre īhö i Surakūsa; ngaich lūöi sumkam öi höngngöh.

¹³Ngaich ṙā-ang in e ihö, öi hatô-òre; ngaich yihtöre i Rēkīöm. Hĕng hang sumkam; ngaich ök kuföt nö löklö lā lòhngö; ngaich im innët sumkam ihö yih i Putīöli.

¹⁴In e ihö kôtökūö tö yik māṅ; ngaich hōten ih cha-a, öi sat sumkam höngngöh in cha; ngaich chuh Rōma ihö.

¹⁵Ngaich in e yik māṅ, hē cha nö hāngö ih, nö yihtöre nö höngkūö ih; nö tölngö ök Chūök Mi-inyih Appi, i nuk Tölūöi Talīkö inrē. Ngaich ha-öiny ngam Tēv ang Pôl, hē ò nö meukkūö cha, ngaich ṙūölöre alaha anga-aṅ.

¹⁶Chalô ihö i Rōma, ngaich Pôl, nöng hökiṙen nöng kahngenre, höng ök kumyung amahten ò mi-in ò.

¹⁷Unôichrit tö lūöi sumkam anga-aṅ nö havëtö yik mā Yahūti nö in ò. Ngaich hē cha nö yih, ngaich ngö ṙô anga-aṅ tö cha; Kahōlö; pòrô chin öt fāluṙen i yip tarik hī, hēk i nup kui yik muvöhngö hī, ngaich öich kētu, öich tö kē-ĕ, ṙā-ang Yerūsalem, eltī vē aṅ Rōma.

¹⁸Vē kamhòṅkken chu nö hòṅ ṙāngen chu lang; pò cha nö öt kanôtukūö tö kinpaha nö in chu.

¹⁹Hē yik Yahūti pöri nö sōtö e, ngaich hòṅ asöltöre chū-ö in Kaisöör; öt kūö chu vahënyuvö tö fālen yip tarikre.

²⁰Angū-ö an lökten chu havëten yīö, pò chu hòṅ meukkūö yīö, ve-ekūö yīö inrē. Pò chu kūö ngih maheūṅkkö Israĕl, öich nyëkö tö ngih sayōk.

²¹Ngaich ngö ṙô cha-a tö ò, Öt rēhĕn yip yamih nö ihih nö vahënyuvö tö tötlöök in meh.

²²Hòṅ hang ṙô meh pöri ihö, yē ap lōn meh. Akahlōn inri ṙòkhöre, tö ngam māṅ nö keuheūtngöre chūök nö chōchö vinënyö.

²³Ngaich hē cha nö sakāmu ṙô tö ò, yihtöre cha-a nö in ò, nö el ök chūök ò, nö maṙôngö. Mikahtu elmat cha-a tö ò, eūkö ngam pūlngö ngam Tēv; löknyö im chöngö Môsös ṙô i nup ṙô yik pròfĕt inrē, anga-aṅ nö löktökūö peuheū, söl hatööm.

²⁴Rēvre yik ṙamātö ellōnre tö ṙô ò; rēvre yik tö sōḵ.

²⁵Ngaich hē cha nö öt hōḵen höö, ngaich kiröönngöre cha-a, ngaich ngö ṙô Pôl nö unôich, kô-òṙô an ngam Töhet Fanöinylö, nö lökten in Isayā, ök pròfĕt, nö i yik muvöhngö yīö, nö ngö ṙô,

²⁶Kuṙòh, yihtöre man i vē tarik, ngö ṙô, I hināngö yin min hang; öt akaha elnang pöri. I mineūkö yin min meuk, öt akaha elmat pöri.

²⁷Pò vē tarik, nö kufëilöre ellōn; ṙahata elnang cha-a inrē; pòn sōḵ nö akaha elmat nö meuk, sōḵ nö hāngö elnang inrē, ngaich havöötökūöre; ngaich halanken cha Chu-ö.

²⁸Akahalōn yin yēḵ, lökten tö e, ngih inyööken aṅ im Tēv, nö söömi nö i Tahëng Mihëṅṙö tarik; ngaich cha-a min nö hang.

²⁹Keuheūthë ṙô anga-aṅ tö u, ngaich kiröönngöre yik Yahūti, nöng kil ṙô höö.

³⁰Nët samyeūheuhöre ang Pôl nö iyöng el ök chūök töhaṙāyö tö ò; ngaich höktö yik taṙòkhöre tö hòṅ yihtöre nö in ò.

³¹Ahangkö ngam pūlngö ngam Tēv, haköphöti inrē i nuk inlahen ngam Mā Yēsū Kristū, nöng öt pa-ekūö; öt hĕng tak tamahngö inrē.