Read Car_Nicobarese INLAHEN 3 Bible Online

INLAHEN 3 - Car_Nicobarese bible

INLAHEN 3

¹Ngaich nāṅ Pītör, nāṅ Yôhan, nö chuh el ngam töhet chūök, hē el ṙētak vine-eṅkūötēv, i tö lūöi köṅny ṙô.

²Ngaich hĕng taka ök umuh tarik tökeuntu, tökaròk ök nö ṙā-ang ellōn yöngre, ök töṙātu nö i kūö inkūp ngam töhet chūök; öp Tövai ngö invëka; nö havëkökūö yip kumhēthötre nö el ngam töhet chūök.

³Ngaich meūkö nāṅ Pītör anga-aṅ, nāṅ Yôhan, nö ṙòngmö kuhēthötre nö ël ngam töhet chūök; ngaich havëkökūö cha.

⁴Ngaich Pītör nö haköpmatre nö in ò, Yôhan inrē, ngaich ngö ṙô, Ngëichkökūö ai.

⁵Ngaich ngam tarik nö hangihtöre, meukkenre nö teūngen nö in cha.

⁶Ngö ṙô pöri Pītör, Öt īnu chin tö rupīö, humlum inrē; kē-ĕkūö meh pöri chū-ö töp mī-in chu. Choholre man, kiröönngöre i Mine-eny Yēsū Kristū, ngam aṅ Nāsaret.

⁷Ngaich kēḵ ök lāhāmö anga-aṅ kël ò; ngaich hachohlen ò. Ilööṙen ngaich nuk kalröön ök tarik, tö nuk linkölngö ò inrē, nö ngëḵ.

⁸Ngaich tisòklöre anga-aṅ, söklöre, ngaich kiröönngöre. Ngaich kuhēthötre nö hol cha, nö ël ngam töhet chūök; kiröönngöre, tisôköre inrē, nö ha-öiny ngam Tēv.

⁹Ṙòkhöre yik tarik nö meūkan nö kiröönngöre, nö ha-öiny ngam Tēv.

¹⁰Ngaich akahakūö cha-a tö ò nö amūichhak sin nö i kūö öp Tövai Inkūp ngam töhet chūök, nö havë-a; ngaich cha-a nö uṙeh, pingangkūö inrē, tö inlahen ò nö ngaich.

¹¹Ngaich haköpngöre anga-aṅ nö in nā Pītör, nāṅ Yôhan; ngaich ṙòkhöre yik tarik nö faltöre nö in cha, nö ël ök rittūi, ök tö Sòlòmön invëka, nö pōi pinngangkūö

¹²Ngaich hē Pītör nö meūkö e, ngaich ngö ṙô anga-aṅ tö yik tarik, Yī-ö tarik aṅ Israĕl, kūöyòh öi pingangkūö i ngòh tarik? Kūöyòh öi inrē haköpmatre tö ai, ai sā mī-ip kanô-òṅre, lanöököre inrē, ai tī-iv tö ngòh tarik nö kiröönngöre?

¹³Ngam Tēv Aprahām, Tēv Isak, Tēv Yāköp, Tēv yik muvöhngö hī inrē, nö hapōilö ngam Kūönre Yēsū, ngam tö kē-ĕyö tö yīö, ngaich mahayö nö i kūö Pailĕt, hē ò nö ṙāngen Ò lang.

¹⁴Ngaich pöri yī-ö mahngen ngam Töhet, ngam Tölöök inrē; ngaich havëkö ök famël tarik nö kētu nö in yīö.

¹⁵Ngaich fëlngö ngam löknnyö nômö, ngam tö hachohlöng nö ngaich tö ngam Tēv; ihö in ṙòkhöre mameūkö e.

¹⁶Ngaich lökten imikah im mine-eny ò nö ngëḵ ngòh tarik, ngòh maheuṅk yīö töngamuh, mikahlōn yīö inrē. Ngam mikah lamökten in Ò, kamëtö lanööken ò takô, nö i kūö yīö ṙòkhöre.

¹⁷Kahōlö; akahalōn chin tö yīö, kūö ötmikahre, öi ngatī la-en; ngatī inrē yip mākūö yīö.

¹⁸Ngaich ngam Tēv nö ngatī nö hateungngö ngam hameuktö Ò nö lā-urĕh, nö löktö elvāng yik pròfĕt, tö ngam Kristū Ò nö tökihngen.

¹⁹Lökten yin havöötö ellōnre, havantöre inrē; hòṅ nup tökööl yīö nö sīchiyö, hòn ṙāngö i kūö ngam Mā Tēv nö yih öp ṙētak munfōvö.

²⁰Hòṅ Ò nö tīnten Kristū, ngam hachöngten Ò tö pòkūö yīö, Ang Yēsū,

²¹Ngam kahëḵ ngam halīöngö, hanöng saha inlööktö nup taṙòkhöre, nup ṙô ngam Tēv, nö löktö elvāng yik töhet pròfĕt Ò, hēten tö ranehlö ngih panam.

²²Ngö ṙô inrē Môsös, Hĕng taka öp min pròfĕt vahīlö ngam Mā Tēv nö in yīö, aṅ i yip hol yīö, tö sā chu. Anga-aṅ min ahang ṙô yīö, i nup taṙòkhöre, töng ṙô Ò min tö yīö.

²³Ngaich ngòh töthamang ṙô öp pròfĕt min, fëli mīnö nö ṙā-ang i yip tarik.

²⁴Ṙòkhöre yip pròfĕt, löktökūö in Samuĕl, söl i yik mū-unôich inrē, i tum tak ṙô yik tö ṙô-òv; ahangkö inlahen në sakāmö, cha-a.

²⁵Yī-ö yin, kūön yik pròfĕt, kūön ngam kinlēḵngô ngam Tēv inrē, nö i yik muvöhngö yīö, nö ngö ṙô tö Aprahām, Ip kūön meh yin min nö kôlò, vē taṙòkhöre aṅ ngih panam.

²⁶Pò ngam Tēv nö vīlö ngam Kūönre, ngaich tīnten Ò nö urĕh nö in yīö, nö hakôlò yīö nö havööngökūö yīö, ṙā-ang i nup tökööl yīö.