Read Car_Nicobarese INLAHEN 4 Bible Online

INLAHEN 4 - Car_Nicobarese bible

INLAHEN 4

¹Ngaich hē cha nö ṙònghöichṙô nö ve-ekūö yik tarik; ngaich yihtöre nö in cha yik mākūö kūönṙô, ök yōm ök töhet chūök, yik Satukī inrē;

²Kunyahaṅlōn cha-a; pò cha nö haköp tö yik tarik, ngaich ahānga inrē tö ngam invanlö ṙā-ang i yip tökapah, nö lökten in Yēsū.

³Ngaich öpngökūö cha, söl im huṙöich; pò e nö ngaich nö harap.

⁴Maṙôngö pöri yikhamang ṙô yik tanīnöṙô, ngaich ṙātö ellōnre; ngaich yik tarik lohten nö taneui köṅny tum tak.

⁵Ngaich im huṙöich, yik yöngṙen, yik mākūö, tö yik kamūich inrē, hamūlöre nö i Yerūsalem.

⁶Umuh inrē Annas, ök mākūö kūönṙô, Kaifas, Yôhan, Aleksantör inrē, yik töng mak alaha ök mākūö kūönṙô inrē.

⁷Ngaich hē cha nö asöklen cha nö ellōn, ngaich ngö ṙô nö hatön, Asuh ap chöngö yīö? Hēk, i mine-eny chīö, öi la-evṙen tö u?

⁸Ngaich īnu Pītör, tö ngam Töhet Fanöinylö; ngaich ngö ṙô tö cha, Yī-ö yöngṙen vē tarik, yī-ö mākūö inrē;

⁹Yē ai töngamuh kahòkkaṙen kūö ngam tölöök la-en ai, i ngam tötkalēḵ alaha inrē, töp lökten ngam tarik nö lööken;

¹⁰Akahalōn yin yēḵ ṙòkhöre, yī-ö inrē taṙòkhöre aṅ Israĕl; tö ò nö lökten i Mine-eny Yēsū Kristū aṅ Nāsaret, ngam harātö yīö, ngam töhachohlöngö tö ngam Tēv nö ṙā-ang i yip tökapah, lökten in Ò ön ngòh tarik nö sökhaka nö i kūö yīö, nö lööken.

¹¹Anga-aṅ An ihong tö sōḵovö tö yīö, yī-ö mamānö; ngam tövītu nö yöngkūö sinkeukngö.

¹²Öt tahëngu chūök inyööken; pòn öt rēhĕn nö tahëng Mine-eny, elkatòh ngam halīöngö, tö kētu nö i tarik öp löklen hī hayöökaṙen.

¹³Ngaich hē cha nö meuk ötpinhë-eṅkūö nā Pītör, nāṅ Yôhan; ngaich akahalōn tö cha nö tötmahaköp, tötakaha inrē nö tarik; ngaich uṙeh cha-a; ngaich cha-a nö akahalōn tö cha nö mī-in Yēsū sin.

¹⁴Ngaich meuk ök tarik cha-a nö sökhaka nö in cha, ök tölööken nö ngaich; ngaich öt huveū-eu ṙô cha-a tö e.

¹⁵Hē cha pöri nö kunyī-inyre, nö ṙā-ang i yik kamhôṅka ngaich ve-ekūöre cha-a, nö ngö ṙô,

¹⁶Sitih tī öi min tö nāṅ tarik? Tön kô ngam minkahngö la-en cha, nö hameuktuvö nö i vē taṙòkhöre mī-i Yerūsalem; öt kô in mahngö e.

¹⁷Hòṅ e pöri nö öt ṙūhöinyre nö i vē tarik; ta-a, töi pinheṅ-eṅlkūö cha, hòṅ cha nö töngamuhangen nö öt mumkahten tarik tö ngih Mine-eny.

¹⁸Ngaich cha-a nö havëten cha, ngaich tahngen cha nö mumkahten, un rēhĕn nö haköphöti nö i Mine-eny Yēsū.

¹⁹Ngö ṙô pöri nā Pītör, nāṅ Yôhan, nö sapṙô cha, Öp yòh öp töhuveū nö i kūö ngam Tēv, ngam hinang ṙô yīö, nö mötlö tö hinangṙô ngam Tēv; ngëichken e yin yēk.

²⁰Tön rö-övö in ihö kô öt ṙô-òv tö nuk maheuṅkre, ahangre inrē.

²¹Ngaich hē cha nö ṙūönyôre nö pinheṅeṅlkūö cha; ngaich hökiṙen cha-a nö kiröönngöre, öt kôtökūö töp tīre nö öt hakôlò cha, kūö tarik; pòn ṙòkhöre yik tarik nö ha-öiny ngam Tēv, pòkūö ök töngaichngen.

²²Pò ök tarik nö saṙaklöngkūö samyeūheu tö töfën anāi, ök töhalankaṙen.

²³Hökiṙen cha-a nö kiröönngöre, ngaich yihtöre nö i yik holre; ngaich eūkö el nang cha nö ṙòkhöre tö ṙô yik mākūö kūönṙô, yik mā inrē tö cha.

²⁴Ngaich hē cha nö hāngö e, hamūlṙôre ngaich cha-a nö ve-ekūötēv, nö ngö ṙô, Ō Mā Tēv, vamīlö ngam halīöngö, panam, mai, nup taṙòkhöre mī-in u inrē;

²⁵Me-eṅ lamökten im Töhet Fanöinylö, Öm ngö ṙô, löknyö elvāng ök muvöhngö ih, Tāvit, ök kūön Meh, Kūöyòh aich vē tahëng mihëṅṙö nö tainy? Kūöyòh aich vē tarik nö lōntö chanök alaha?

²⁶Hatöököre yin vē rāchakūö ngih panam, hamūltöre inrē vē yöngṙen, nö lā-al ngam Mā, lā-al ngam Kristū Ò inrē.

²⁷Pòn kô nö i ngih panam nö lā-al ngam töhet Kūön Meh Yēsū, ngam töhachāmö kui tö Meh, hĕnghöre Heròt, Pailĕt inrē, nö hol yip Tahëng mihëṅṙö, vē tarik Israĕl inrē, nö hamūlöre,

²⁸Nö kahang tīre tö ngam töhalēniṙen tö Meh, nö lā-urĕh.

²⁹Mā Tēv; ngëichkö tī cha nö pnë-elkūö, kē-ĕkūö vē kūönre Me-eṅ, hòṅ cha nö öt pinë-elkūö nö ṙô tö ngam ṙô Meh;

³⁰Hateutnyö këlre Me-eṅ inrē; halanken, hòn lökten i Mine-eny ngam Kūön Meh, Yēsū, nup minkahngö, pinngangkūö inrē.

³¹Hē cha nö keuheūtô nö ve-ekūötēv, ngaich ök chūök cha nö hamūlöre, nö kayīna; ngaich ṙòkhöre cha-a nö tööḵlö tö ngam Töhet Fanöinylö; ngaich ötpa-ekūö nö ṙôtö nup ṙô ngam Tēv.

³²Ngaich ṙòkhöre yik ṙamātö ellōnre nö hēngö ellōn, lōn inrē; öt hĕng tak tö cha tö ṙô-òv tö nup chehen nö chehen ò; ṙòkhöre pöri cha-a nöng hēngö inlānen.

³³Ngaich holtö minhôiṅyö yik tanīnöṙô nö eūkö invanlö ngam Mā Yēsū; pōyen inlōnti aṅ in cha-a inrē nö ṙòkhöre.

³⁴Öt hĕng tak tö cha tö hāṅten; pò yik tötaṙeū-euv, hēk yik töpatī-iv inrē nö inyihngö u; ngaich kētö nuk ṙāi nuk tö-inyihiyö;

³⁵Ṙātö u ngaich nö i röön yik tanīnöṙô; ngaich kö katölhökūö höö, sālōn ngòh tö hĕng tak.

³⁶Ngaich ang Yôsĕf, ök tökaheūkö tö yik tanīnöṙô, Parnapas, ngam töngö manah, Kūön Inṙamlōn; Lēvi ök nö tarik; aṅ Kuprös.

³⁷Panô-òṅvö anga-aṅ, inyihngö e ngaich; ngaich kētö nuk rupīö; ngaich ṙātö u nö i röön yik tanīnöṙô.