Read Car_Nicobarese INLAHEN 5 Bible Online

INLAHEN 5 - Car_Nicobarese bible

INLAHEN 5

¹Hĕng taka ök umuh tarik, Ananī ök mine-eny ò, tök pihö ò inrē, Sappīra; i nyihngö inlānenre cha-a;

²Ngaich ròngti hayunngö tö nuk ṙāi; (ök pihö ò, ök tö-akahalōn tö e;) ngaich kētö nup töròngti cha-a; ṙātö u ngaich nö i röön yik tanīnöṙô.

³Ngaich ngö ṙô Pītör tö ò, Ananī; Sitih ang ngam Sātān nö hatööklö ellōn meh, öm hōtu minyôinyaṅ i ngam Töhet Fanöinylö, ngaich ròngti hayunngö tö ṙāi ök taṙeū?

⁴Hē e nöngngöh, öt inlānen meh hòng angū-ö? Keuheūthë tī me-eṅ inyihngö e öt kanahanglōn meh hòng? Sītih ömeh ngatī lōn ellōnre?

⁵Rö-ö man minyôinyaṅ i tarik, tön im Tēv. Höng hangtöre Ananī tö minë ṙô, fukngö ngaich nö kapah. Ngaich pa-ekūö cha-a nö ṙòkhöre, yik hamāngö e.

⁶Ngaich yik ṙāl tarik nö haṙungngen ò; keūnan ngaich, nö ulngen ò.

⁷Lūöi köṅny ṙô rô-angen, hē ök pihö ò nö kuhēthötre, öt akahalōn tök töngaichngen.

⁸Ngaich ngö ṙô Pītör tö ò, Ve-eny nang chu man, yē nāṅ höng ngatī ṙôken ṙāitī inyihngö ök taṙeū. Ngaich ngö ṙô anga-aṅ, Hôṅ; höng ngatī.

⁹Ngaich ngö ṙô Pītör tö ò, Kūöyòh an hĕngrelōn kalah ngam Töhet Fanöinylö ngam Mā Tēv? Yĕh meuk röön yip amulngö ök pihö meh, nö i kūö inkūp. Keunnyu man min tö cha.

¹⁰Fukngö ngaich anga-aṅ nö ilööṙen, nö i röön Pītör; ngaich kapah. Kuhēthötre yik ṙāl tarik; ngaich kôtökūö tö ò nö kapah. Keunnyen ò cha-a ngaich, ngaich ulngen ò nö ranghö ök pihö ò.

¹¹Ngaich pōi pinheṅ-eṅkūö ngam māṅ; yik taṙòkhöre inrē hamāngö u.

¹²Löktö eltī yik tanīnöṙô, nuk töpōyen minkahngö, pinngangkūö inrē, tī cha nö i yik tarik. Ngaich cha-a nö ṙòkhöre nö hēng mūl nö el ök rittūi Sòlòmön.

¹³Öt hĕng tak pöri i yik tahëng tö hòṅ kalah nö hamūltöre nö in cha; eū-eu cha pöri yik tarik.

¹⁴Ṙūötöre ṙôngö inrē yik ṙamātö ellōnre nö im Mā, hĕnghöre kikōnyö, kikānö inrē.

¹⁵Ngaich uroh cha-a nö keunnyö yik tövahavö nö el talöökö, ngaich ṙāten cha nö el chamamre, chatrāi inrē pòn hōtu öp nyat Pītör nö hanyattökui yip rēvre tö cha, yĕn chööḵöng.

¹⁶Maṙôngö yik inrē tarik yamihtöre, ṙā-ang i nup panam i chīṙö Yerūsalem, kumtö yik tövahav, yik tötkôlò inrē tötī tötlöök sī-ö. Ngaich ṙòkhöre cha-a nö lööken.

¹⁷Chohol alahare ngaich ök mākūö kūönṙô, ṙòkhöre inrē yik hol ò; yik töng Satukī; ngaich cha-a nö pōi kumnyahlōn.

¹⁸Kēḵ yik tanīnöṙô cha-a ngaich; ngaich öpngökūö cha nö el kinlōngö.

¹⁹Hĕng tak pöri ök ma-aṅhānga aṅ im Mā Tēv, lamöpnyökūö inkūp ök kinlōngö, tö hatööm; ngaich kēḵnyen cha; nö ngö ṙô,

²⁰Kuṙòh; söklöre yin, ṙô-òv el ngam töhet chūök yip tarik tö nup ṙô ngih nômö.

²¹Ngaich hē cha nö hāngö e, kuhēthötre cha-a ngaich nö el ök töhet chūök, tö minlīlö peuheū; ngaich haköphöti. Yihtöre ngaich ök mākūö kūönṙô, yik hol ò inrē; ngaich havëtö yik kamhôṅka ṙòkhöre yik mākūö yik kūön Israĕl inrē; ngaich tīnngö kameḵeṅren cha nö el kinlōngö.

²²Hē yik tösökhak pöri nö yih, ngaich öt kôtökūö tö cha nö el kinlōngö. Havantöre ngaich nö ve-eny nang cha; nö ngö ṙô.

²³Löphakkūö ap kinlōngö, nö meūkö tö ih, nö ötpinlānguṙen; sökhak yip amahati nö i kūö inkūp. Hē ih pöri löpnyökūö e, ngaich öt hĕng tak maheuṅk īhö tö tarik, lātuhēt.

²⁴Ngaich hē ök yōm ngam töhet chūök, tö yik mākūö kūönṙô inrē, nö hang minë ṙô; pōihangen öt mikahlōn cha-a ngaich tö cha, töp lökngö e.

²⁵Ngaich hĕng tak ök yamihtöre, nö ve-eny nang cha, nö ngö ṙô, Sökhak yip tarik yīö nö el kinlōngö.

²⁶Ngaich kiröönngöre ök yōm ök töhet chūök, nö holtö yik tösökhak, nö kē-ĕren cha; öt chökhutī pöri, pòn pa-ekūö tö yik tarik; pòn sōḵ nö kulëhe.

²⁷Ngaich hē cha nö kēten cha, ngaich asöklen cha nö i kūö yik kamhôṅka. Ngaich hatönö cha ök mākūö kūönṙô, nö ngö ṙô.

²⁸Samôten yīö in haköphöti i ngih Mine-eny. Yĕh meuk; ngaich yin yih tööḵöl tī tö Yerūsalem, tö ngam ṙô yīö haköphöti; öi hòṅ kētö kui ih tö mahām ngam tarik.

²⁹Ngaich ngö ṙô Pītör, yik tanīnöṙô inrē, nö sapṙô cha, Hòṅ hang chöngö ngam Tēv in, mööḵlö tö chöngö tarik.

³⁰Hachohlen Yēsū an ngam Tēv yik muvöhngö hī; ngam töfëli tö yīö, ngaich kilöllöngö nö i rōi chōn.

³¹Anga-aṅ hapōilö ngam Tēv nö lāhāmö Ò, nö Rācha, Mahayööken inrē; hòn kētö invöötö ellōn nö in Israĕl, inṙē-ĕl tökööl inrē.

³²Ihö in ameūkö u; ngatī inrē ngam Töhet Fanöinylö, ngam kahëtö ngam Tēv nö i yip hamang chöngö Ò.

³³Hē cha pöri nö hāngö e, ngaich cha-a nö ṙatngöre ellōn, ngaich hòṅ fëlngen cha.

³⁴Hĕng tak pöri, ök aṅ i yik kamhôṅka, samöklöre, Feresī ök, Kamliĕl ök mine-eny ò, mahaköptö chöngö, tömilēḵaṙen tö yik taṙòkhöre tarik; hōtö kine-eny yik tarik sin anga-aṅ, nö elkahôyö.

³⁵Ngaich ngö ṙô anga-aṅ tö cha, Yī-ö tarik aṅ Israĕl; haṙēmngenre yin i vē tarik, tö nup tī yīö tö cha.

³⁶Tön marô-angen ök Teūtas nö ngaich ök vamī-iṅlre nö mā. Maṙôngö yik tarik mahamūltöre nö in ò, lohten nö fënòng; yik tö fëli; ṙòkhöre inrē yik hamang ṙô ò nö pirāti, ngaich nöng tö rö-ö.

³⁷Unôichrit ò, ang Yūtā, ök aṅ Kelelī; hē kinṙeuk tum taka; maṙôngö ngahôṅ anga-aṅ tö holre. Kapah inrē anga-aṅ; ṙòkhöre inrē yik hamang ṙô ò, nö pirāti.

³⁸Ngö ṙô chin tö yīö töngamuh, Ṙa-angre yin i vē tarik; hökngen cha. Pò ngam lōn cha, la-en cha inrē, nö aṅ i tarik öre; ngaich kô-òren nö öt kôḵòlkui.

³⁹Yē e pöri nö aṅ im Tēv; öt kô yī-ö tiṙōlngen cha, höng lamā-al kūö ngam Tēv yin min.

⁴⁰Ngaich ṙòkhöre cha-a nö hōḵo ṙô ò; ngaich hē cha nö havëhöt yik tanīnöṙô nö in cha; fōho cha ngaich, ngaich sōten cha nö ṙô-òv nö i Mine-eny Yēsū, ngaich hökngen cha nö kiröönngöre.

⁴¹Kiröönngöre yik tanīnöṙô nö ṙā-ang i kūö yik kamhôṅka; ṙāmölōn töre nö halöngtuṙen nö sumrōngikūö tökūö ngam Mine-eny;

⁴²Ngaich örhĕnghang sumkam cha-a nö ël ngam töhet chūök, i patī inrē, öt ṙākenre nö haköphöti, mumkahten inrē, tö Yēsū nö Kristū.