Read Car_Nicobarese INLAHEN 6 Bible Online

INLAHEN 6 - Car_Nicobarese bible

INLAHEN 6

¹Hē e yik mahaköp nö ṙūhölre ṙôngö, ngaich yik Yahūti aṅ tahëng, nö uyëkö yik aṅmuh Yahūti; pò yik tafīösi kikānö in cha, nöng örheūheu nö vāichiṙen hē el nāhaṅl.

²Havë-eti yik tö nët sīön tak tö yik tömaṙôngö; ngaich ngö ṙô, Rö-ö in ihö kô ṙāngö ngam ṙô ngam Tēv, öi meukṙen nya-aṅkūö.

³Kahōlö; lökten yin yēḵ ngëichkö yip tö sat tak tarik in re, tö eūka mikah, tö īnu tö ngam Töhet Fanöinylö, mikah inrē; nö vahīlö ih in e angū-ö la-en.

⁴Hòṅ ih pöri īhö, iṙūöhen kamnipkūö i vine-eṅkūötēv, i inhangkö ngam ṙô inrē.

⁵Ngaich ṙāmölōn yik tömaṙôngö tö ngam ṙô; ngaich cha-a nö katöllen Satēpan, ök tarik tö īnu tö mikah, ngam Töhet Fanöinylö inrē; hēḵ Filip, Pròkòrös, Nikānôr, Tīmōn, Parmenas, Nikòlös inrē ök aṅ Antiòk, tövītu nö Yahūti.

⁶Asöklöngö cha-a nö i kūö yik tanīnöre, Keuheūthëṙô cha-a nö ve-ekūötēv, ngaich ṙēptö eltīre cha-a nö i kui cha.

⁷Ngaich ngam ṙô ngam Tēv nö ṙūhölre; ngaich ṙūötöre ṙôngö yik mahaköp i Yerūsalem, nö pōyen; maṙôngö inrē yik kūön ṙô, hamôḵòṅ ngam mikah.

⁸Ngaich ang Satēpan nö inlōntuvö, minhôiṅyu inrē; ngaich tī tö yöng pinngangkūö, minkahngö inrē nö i yik tarik.

⁹Rēvre yik umuh chamôhòl alahare aṅ ik chūök vine-eṅkūötēv, yik tö Lipertīn invëka, yik aṅ Kurĕnī, aṅ Aleksanriā inrē, yik aṅ Kiliki aṅ Asi inrē; nö lā-al ṙô Satēpan.

¹⁰Ngaich cha-a nö öt kô tö mikah ò, tö ngam Töhet Fanöinylö, löknyö ṙô ò inrē.

¹¹Ngaich cha-a nö haṙāi tarik, yik tö ngö ṙô, Hang ṙô ò in īhö, nö ötlēḵôre tö Môsös, tö ngam Tēv inrē.

¹²Ngaich cha-a nö haruhlö alaha yik tarik, yik mākūö, tö yik kamūich inrē, ngaich yihtöre nö in ò, ngaich kēḵ an; kēten ò ngaich, nö i kūö kamhôṅka.

¹³Ngaich asöklö samūöicha cha-a, yik tö ngö ṙô, Öt ṙākö ṙôre ön ngòh tarik, nö ötlēkôre tö ngih töhet chūök, ngam chöngö inrē;

¹⁴Tön hang ṙô ò in īhö, nö ngö ṙô, tö ngòh Yēsū aṅ Nāsaret, nö tiṙōlngö ngih chūök min; ngaich haṙīngö nup fālen, kahëtö Môsös nö in hī.

¹⁵Ngaich ṙòkhöre yik amūichhak, nö im kinṙôka nö hatīönkökūö Satēpan; ngaich ök kūö ò nö meūkö tö cha, nöng sā kūö ma-ahānga.