Read Car_Nicobarese INLAHEN 7 Bible Online

INLAHEN 7 - Car_Nicobarese bible

INLAHEN 7

¹Ngaich ngö ṙô ök mākūö kūönṙô tö ò, Kô ön nö ngatī?

²Ngaich ngö ṙô anga-aṅ, Kahōlö, kayöngö inrē; hangihtöre. Meūkö An ngam tökôlò Tēv, tök yöng hī Aprahām, hē ò nö i Mesapotamīa; urēhĕkūö ò nö iyöng Haran;

³Ngaich ngö ṙô tö ò, Kē-ĕngre man; ṙāngö ngam panamre, ṙā-ang yip mak alahare; yihtöre im panam ngam hameuktö Chu min in meh.

⁴Ngaich yihtöre anga-aṅ nö ṙā-ang ngam panam Kaltī; ngaich iyöng Haran. Ṙā-ang umuh anga-aṅ hēk, hē ök yöng ò nö kapah, ngaich kētu anga-aṅ nö i ngih panam, ngih chūök yīö töngamuh.

⁵Öt kē-ĕkūö ò ngam Tēv tö amin ò nö in e; öt rēhĕn öre nöng chūöku röön anga-aṅ. Ngaich kilēḵngôre pöri Anga-aṅ nö kētö e nö in ò, nö amin ò, i yip kūön ò inrē mu-unôich; hē ò nö öl nö kūönu.

⁶Ngö ṙô ngam Tēv; tö yip kūön ò min nö iyöng tahëng panam; pòn hōtu nö hakövö, öt hakôlöngṙô tö cha, fënòng tum samyeūheu.

⁷Ngö ṙô ngam Tēv nö hēk. Kahòkkaṙen yip tarik min tö Chu, yip mahakövö cha. Keuheūthëṙen angū-ö, ngaich kunyī-inyre min cha-a, ngaich lök la-en Chu i ngih panam.

⁸Ngaich kē-ĕkūö ò anga-aṅ tö ngam kinlēḵngô tunnyinyngö. Kūönhë Apraham tö Isak ngaich tunyiny ngen ò im hinëvhör sumkam. Kūönu Isak tö Yāköp; ngaich hēk Yāköp tö kūönu tö yik tö nët sīön miyöngö.

⁹Ngaich cha-a nö kunyahaṅlōn nö in Yôsĕf; ngaich inyihngen ò nö i Aikup; holtuṙah pöri anga-aṅ tö ngam Tēv.

¹⁰Ṙānyen ò pöri Anga-aṅ i nup taṙòkhöre kanihngen ò; ngaich kētö neukhö ò, mikah inrē, nö i kūö Fërō, ök rāchakūö Aikup; ngaich vīlen ò anga-aṅ nö mahayöng nö i Aikup, i patī ò inrē.

¹¹Yih ngaich ök yöng inyāichö keuheūtngöre chūök i Aikūp, Kanā-an inrē; ngaich pōyen ötkanôlò. Ngaich yik muvöhngö hī nö öt nyā-aṅvkūö.

¹²Hē Yāköp pöri nö hang sāiny i Aikup, ngaich tīnngö yik muvöhngö hī anga-aṅ ik raneh.

¹³Ngaich im innët van, ang Yôsĕf nö mikahtökūö yik mëmre töre; ngaich hameuktu cha-a nö in Fërō.

¹⁴Ngaich tīnngö mahavëtö ök yöngre anga-aṅ, ang Yāköp, nö in ò inrē ṙòkhöre yik mak alaha, sat anāi taneui tak.

¹⁵Ngaich chuh Aikup ang Yāköp; kapah anga-aṅ nö umuh, tö yik muvöhngö hī inrē.

¹⁶Ngaich keūni cha-a nö i Sīkem; ngaich lāpi nö el anūlö Aprahām, ök havah ò nö ṙāitö rupīö, nö i yik kūön Hamôr, i Sīkem.

¹⁷Hē ranöhten ngam kinlēḵngô, ṙô ngam Tēv nö in Aprahām; ṙuhölre ṙôken ngaich më tarik, nö i Aikup.

¹⁸Hanöng saha ök tahëng rāchakūö Aikup, ök töt akahakūö tö Yôsĕf.

¹⁹Ngaich anga-aṅ nö miyëḵ tö cha, ngaich öt hakôlò yik muvöhngö hī; lökten cha nö kavalngö yik tënö kūön cha, pòn sōtu nö aṅ.

²⁰Hē e ang Môsös nö fötnyu; tölngö tölöök ök nö nyīö. Lūöi chumngëṅtö anga-aṅ nö harūkö nö i patī ök yöngre.

²¹Ngaich hē ò nö kavāliyö, kē-ĕ ngaich anga-aṅ tök kikānö kūön Fërō; ngaich haruklöngö nö kūön ò.

²²Ngaich Môsös nö haköptuvö i nup taṙòkhöre mikah yik aṅ Aikup; ngaich anga-aṅ nö tömihôiṅ i ṙô, la-en inrē.

²³Ngaich hē ò fën anāi samyeūheu, ngaich hòṅ chöhkö yik holre anga-aṅ, yik kūön Israĕl.

²⁴Ngaich hĕng tak ök töhachökö maheuṅk ò, ngaich laklen ò anga-aṅ; ngaich havahalvah ò, nö fël ök aṅ Aikup.

²⁵Akahalōn yik hol ò, tö lōn ò, tö ngam Tēv, nö lökten eltī ò, nö kētö ṙinānyö cha. Ngaich pöri cha-a nö rö-ö nö akahalōn.

²⁶Ngaich im huṙöich anga-aṅ nö meūkö tö cha, hē cha nö lā-al kūö höö; ngaich hòṅ halāmö cha, nö ngö ṙô, Mah! Holre yīna; kūöyòh öi chökhuṙen tö höö?

²⁷Ngaich pöri ök töchökhu tī tök holre nö kuringngen ò, nö ngö ṙô, Achīö öp vamīlen meh hayöng, kahòkken ih inrē?

²⁸Hòṅ fëlö chu ömeh, öm sā tīre vahë, tök aṅ Aikup? Meutngö ngaich Môsös, tökūö ngam ṙô,

²⁹Ngaich i yöng panam yip aṅ Mītīa. In e anga-aṅ nö nët maneuk kūön.

³⁰Keuheūten nuk töfën anāi samyeūheu, ngaich hĕng tak ök ma-ahānga tömeūkö tö ò, nö elinchōn Sīnāi, nö i kūö ök töhūkūö tameūyö el töyul.

³¹Ngaich hē Môsös nö meūkö e, pingāngö elmat anga-aṅ. Ngaich hē ò nö ṙūötöre nö ngëicha, ngaich ngö ṙô ngam Mā Tēv tö ò.

³²Chū-ö Chin Tēv yik muvöhngö yīö; Tēv Aprahām, Isak, Yāköp inrē. Ngaich kichëyöre Môsös nö öt hòṅ ngëicha.

³³Ngaich ngö ṙô ngam Mā Tēv tö ò, Luhngö minë kunröpöre man, i röön meh; tön töhet an ngam panam, ngam chūök meh sökhaka.

³⁴Meuk kanihngen yip tarikre takô Chin, yip i Aikup: hang inyôṙö ṙô cha Chin inrē; ngaich hòṅ yihtöre Öich ṙānyen cha. Tā-a, hòṅ tīnten meh Chin i Aikup.

³⁵Anga-aṅ Môsös ngam sahōḵo cha sin, nö ngö ṙô, Achīö öp vamīlen meh hayöng, kahôka inrē? Anga-aṅ tahīntö ngam Tēv nö hĕnghöre mahayöng, ṙamānyö inrē, nö lökten ik ma-ahānga, ök tömeūkö tö ò nö el töyul.

³⁶Anga-aṅ ṙamānyen cha, tö kinheūṅtö tīre tö nuk pinngangkūö, minkangö inrē, i Aikup, el ap Mai Ētöm inrē, elinchōn inrē, fën anāi samyeūheu.

³⁷Anga-aṅ ön ngòh Môsös tö ngö ṙô, nö i yik kūön Israĕl, Hĕng tak vahīlö An min ngam Tēv tö pròfĕt, nö aṅ in yīö; nö tö sā chu.

³⁸Anga-aṅ an mī-i yik māṅ nö el-īnchōn, holtö ök ma-ahānga vame-eṅkūö ò, nö i kui ap Rôngö Sīnāi; kamëḵ ngam tö aṅ ṙô, nö kē-ĕkūö hī.

³⁹Ök töt hāngö ṙô tö yik muvöhngö hī; sōḵovö pöri tö cha. Ngaich hòṅ havantöre ellōn cha-a nö i Aikup.

⁴⁰Nö ngö ṙô tö Āròn, Vīlö tēv hī man, yip mū-urēhĕkūö hī nö kiröönngöre. Tön rö-ö in akahalōn tö lāinyngen Môsös ök mahachōḵnyen hī, ṙā-ang Aikup.

⁴¹Hē-e, cha-a nö vi kun nuā, ngaich kētö nuk tökētu nö ik insā; ngaich ṙāmölōn nö i nuk vahīre cha-a.

⁴²Havööngökūöre ngaich ngam Tēv, ngaich hökngen cha nö hayönglenre nö i nup töpōyen el halīöngö; sā kinūichngö e nö i mat līpöre yik pròfĕt, Kētö nup tökapah öi chehechōn in Chu, tökētuvö inrē, fën anāi samyeūheu, elinchōn? Ō yī-ö aṅ patī Israĕl!

⁴³Ngaich yī-ö kēḵ ngam inrūkui Mōlòk ngam taneūsömat ngam tēv Rēfan, nuk insā tö vī-i, ngaich hayönglenre in u. Lökten Chin kēḵngen yīö min lāmuh tö Pēpilön.

⁴⁴Inrūṙukui yik muvöhngö hī, ök inmeukti nö elinchōn; sā ṙô ök vame-eṅkūö Môsös nö tölṙô ò ngaich hōten ò nö vī-i e nö sā maheuṅk ò.

⁴⁵Ngaich yik muvöhngö hī nö kēhöt e nö hol Yôsūā, hē cha nö kuhēthötre, nö kēḵ aminre tö yik tahëng mihëṅṙö, yik tö ahōṙī tö ngam Tēv, nö i kūö yik muvöhngö hī; söl i nuk sakāmö Tāvit.

⁴⁶Ngaich ang Tāvit nö aheukhuvö tö ngam Tēv; ngaich havëtôre nö halēnkö chūök ngam Tēv Yāköp.

⁴⁷Sòlòmön pöri vamīlö patī Ò.

⁴⁸Rö-ö pöri ngam Lamātulöng nö iyöng el patī në vahī-il kuntī; sā ṙô ök pròfĕt.

⁴⁹Kantēra Chu an ngam halīöngö; ranöönö röön Chu ngam tumlat, Sitih tī öi min vīlö patī Chu? ngö ṙô ngam Mā Tēv;

⁵⁰Hēk asuh ap min chūök haneūheu Chu? Röh ön në kuntī Chu nö vamī-iṅl në ṙòkhöre?

⁵¹Yī-ö tökehe likeun, töt tunyīnyi ellōn, elnang inrē; höng örheūheu yin sōḵo ngam Töhet Fanöinylö. Sā yik muvöhngö yīö misī, ngatī yī-ö.

⁵²Ök yòh ök pròfĕt tö rö-ö nö öthakôlöngṙô tö yik muvöhngö yīö? Ngaich cha-a inrē nö fëlngö yik mū-urĕh mahameuktö yanihih ngam Tölöök. Yī-ö yin kamëḵngen Ò töngamuh, famëlngen Ò inrē;

⁵³Yī-ö kamëḵ ngam chöngö, lökten i yik ma-ahānga; ngaich rö-ö öi haköpö e.

⁵⁴Ngaich hē cha nö hāngö u, ṙatngöre ellōn cha-a ngaich; kap kui kanapre inrē, nö in ò.

⁵⁵Īnu pöri Satēpan tö ngam tö Töhet Fanöinylö; haköpmatre ngaich nö ngëichkö el halīöngö, ngaich meuk kanôlò ngam Tēv; sökhaka Ang Yēsū inrē nö lāhāmö ngam Tēv.

⁵⁶Ngaich ngö ṙô anga-aṅ, Yĕh meuk; meuk ngam halīöngö chin, nö luve-akkūö; sökhaka ngam Kūön Tārik nö lāhāmö ngam Tēv.

⁵⁷Pōitô pöri cha-a nö hūḵa; ngaich tilupngö elngangre inrē. Faltöre ngaich nö in ò, nö hĕng tum röön.

⁵⁸Kavalnyen ò ngaich cha-a, nö lā-uk kinlōngö ök panam; ngaich kuleh kui ò. Ngaich yik ameū-a nö ṙātö nuk kinṙumre nö i röön ök tö hĕng tak ṙāl tarik, ang Sôl.

⁵⁹Ngaich kuleh kui Satēpan cha-a, hē ò nö havëkö ngam Mā, nö ngö ṙô, Mā Yēsū; kēḵ ngòh ma-alaha chu.

⁶⁰Simngöre ngaich anga-aṅ; ngaich pōitô, nö ngö ṙô, Mā; un in cha pöchö ngih tökööl. Keuheūthërô anga-aṅ tö e, ngaich haṙòh.