Read Car_Nicobarese INLAHEN 8 Bible Online

INLAHEN 8 - Car_Nicobarese bible

INLAHEN 8

¹Hōḵngö kinpaha ò inrē ang Sôl. Ngaich hē e, ök yöng ötinkôlò ngam māṅ i Yerūsalem; ngaich cha-a nö ṙòkhöre nö kö parātṙen keuheūngöre chūök i chīṙö Yūtā, Samariā inrē; höng yik tanīnöṙô hötītö.

²Ngaich yik töakaha tarik nö ulngen Satēpan, nö kōköre nö harāman.

³Ngaich pöri ang Sôl nö hayëḵ ngam māṅ, kuhēthötre nö el patī, ngaich kēḵ kikōnyö kikānö inrē, ngaich kalonghöt cha nö el kinlōngö.

⁴Ngaich cha-a yik töparātiyö nö kiröönngöre, nö ahangkö ngam ṙô.

⁵Chuh ik panam ang Filip i Samariā, ngaich ahangken cha tö Kristū.

⁶Ngaich yik tömaṙôngö nö hĕngre ellōn nö hangihtöre tö nuk ṙô Filip, hē cha nö hang, meuk nuk minkahngö tī ò inrē.

⁷Pòn maṙôngö yik tö īnu tö tötlöök sī-ö, ngaich kunyī-inyre cha-a, pōitô nö hūḵa. Maṙôngö inrē yik tölum, tö karòk inrē, nö lööken.

⁸Ngaich pōyen ṙanāmölōn cha-a nö im panam.

⁹Hĕng taka ök umuh tarik, Sīmōn ök mine-eny ò, ök lamā-urĕh sin nö tömilūönö, pumngangtökūö yik tarik aṅ Samariā; eūköre nö tömihôiṅ nö tarik.

¹⁰Ök töhāngö ṙô tö cha nö ṙòkhöre, yik tökūöṅnö töpōyö inrē; ngö ṙô cha-a, Minhôiṅyö ngam Tēv ön ngòh tarik, ngam Töpōyö invëka.

¹¹Ngaich cha-a nö hang ṙô ò; pòn marô-òten anga-aṅ nö pumngangtökūö cha tö milūönöre.

¹²Hē cha pöri nö ṙātö ellōnre i ṙô Filip, nö ahangkö ngam tölöök inhangkö ngam pūlngö ngam Tēv, Mine-eny Yēsū Kristū inrē; vōkö cha-a ngaich, hĕnghöre kikōnyö kikānö inrē.

¹³Ṙātö ellōnre inrē ang Sīmōn, ngaich vōkö. Ngaich nöngngöh anga-aṅ nö in Filip; ngaich pingangkūö anga-aṅ, hē ò meuk nuk minkahngö, minhôiṅyö inrē tī ò.

¹⁴Hē yik tanīnöṙô, yik i Yerūsalem, nö hang yik aṅ Samariā nö hōḵo ngam ṙô ngam Tēv, tīnhanga cha-a tö nāṅ Pītör nāṅ Yôhan;

¹⁵Nak vame-eṅlkui cha, hē cha nö yihtöre; pòn hōtu cha-a nö teūngen tö ngam Töhet Fanöinylö.

¹⁶Pòn öl Anga-aṅ nö hĕng tak chūök nö teungtöre nö in cha; höng vōkö cha-a, nö i Mine-eny ngam Mā Yēsū.

¹⁷Ṙēptö eltīre ngaich cha-a, nö i kui cha; ngaich teūngen cha-a tö ngam Töhet Fanöinylö.

¹⁸Ngaich hē Sīmōn nö meuk ngam Töhet Fanöinylö nö kētu, nö lökten i tī nak tanīnöṙô nö ṙēptö eltīre; ngaich anga-aṅ nö kētö rupīö nö in cha; nö ngö ṙô,

¹⁹Kē-ĕkūö chu tö e angū-ö minhôiṅyö, hòṅ öptö ṙēptu elkui tö chu nö teūngen tö ngam Töhet Fanöinylö.

²⁰Ngö ṙô Pītör tö ò, Anòngngen meh, nun yēḵ minë rupīö meh nö ötkôlò; pò meh tö lōnre teūngen tö ngam inlōnti aṅ im Tēv, nö ṙāitö rupīö.

²¹Rö-ö man hanôltöre, öt rēhĕn kintölu i ngih ṙô ih; pò ap ellōn meh nö öt chiplö nö i kūö ngam Tēv.

²²Lökten man yēḵ havöötö ellōnre, ṙā-ang im ötlanöököre; ngaich ve-ekūö ngam Mā Tēv; yĕn lohten min ap ellōn meh nö aṙēlöngö.

²³Tön akahalōn chin tö meh im tö-angu-övö inrē, tö ngam ötlanöökö.

²⁴Ngaich ngö ṙô ang Sīmōn, Ve-elkui chu yin ṙòkhöre, i ngam Mā Tēv; hòn öt hĕng nup ṙô yīö nö yihtöre nö in chu.

²⁵Ngaich cha-a nö havantöre nö i Yerūsalem, tö kinheūṅtö ṙôre nö ahangkö ngam ṙô ngam Mā; mumkahten inrē tö ngam tölöök inhānga nö ṙōl tumhëṅtö chūök nö i Samariā.

²⁶Hē e ök ma-ahānga ngam Mā Tēv, vame-eṅkūö Filip, nö ngö ṙô, Choholre man; kiröönngöre kū-ötö lòhngö, ip talöökö lamöktö Yerūsalem, nö ku-ö tö Kāsā. Öp tö ṙā-aiṙen nö ngaich.

²⁷Choholre ngaich anga-aṅ nö kiröönngöre. Ngaich hĕng tak ök tarik aṅ Iti-opiā, kumkantöre ök töpōyö chöngö nö elkatòh Kantakē, rāni kūö aṅ Iti-opīa; ök yōm nuk chehen ò nö ṙòkhöre; yamih sin nö i Yerūsalem nö ve-ekūötēv.

²⁸Havan ngaich anga-aṅ; ngaich ve-ekūö līpöre ngam pròfĕt Isayā, nö ūichhaka nö el inröl.

²⁹Ngaich ngö ṙô ngam Töhet Fanöinylö tö Filip, Kūṙòh; ṙūötöre man im inröl.

³⁰Faltöre ngaich Filip nö in ò; ngaich hang ṙô ò nö ve-ekūö līpöre ngam pròfĕt Isaya. Ngaich ngö ṙô Filip, Akaha elnang öm tö ngam vahe-ekūöre?

³¹Ngaich ngö ṙô anga-aṅ, Sitih kanô-òṅ öich, höng yĕn höng hĕng tak öp mahachōtökūö chu? Ngaich ve-ekūö Filip anga-aṅ, nö hōten ò nö yôklö, nö Ūichngöre nö in ò.

³²Ngih öng yih chūök ṙô ngam töhet līpöre vahe-ekūö ò, Hachōḵoyö Anga-aṅ, nö sā pököre nö ṙatnyu likeun; sā kun pököre inrē Anga-aṅ nöng öt ṙô-òv, nö i kūö öp kammöp; ngatī Anga-aṅ, nö öt vā-ainy kūöre,

³³Im inyāichngö Ò, ngam ötinkôlò Ò nö keuheūten; achīö öp min mahameukhömat yip tūmö Ò? Pòn ngaich ök nômö Ò nö kē-ĕyö, nö ṙā-ang ing panam.

³⁴Ngaich ngö ṙô ök kumkantöre tö Filip, Ṙôten chīö ök pròfĕt tö e? Ṙôtöre hòng? Ṙôtö tahëng ṙöng?

³⁵Kaknyöre ngaich Filip, löktökūö ranehenyrit ngam ṙô ngam töhet līpöre, nö mumkahten ò tö Yēsū.

³⁶Ngaich hē cha nö iṙuhöröön nö kiröönngöre, sölta cha-a ngaich nö ik mak. Ngaich ngö ṙô anga-aṅ, Ngīöng yih mak! Asuh ap lökngen chu öt kô vōkö?

³⁷Ngaich ngö ṙô ang Filip, Kô-òren man vōkö, yē meh keuheūttö ellōnre ṙātö ellōnre. Ngaich ngö ṙô anga-aṅ, Ṙātö ellōnre chin ngaich tö Yēsū Kristū nö Kūön ngam Tēv.

³⁸Ngaich anga-aṅ nö hōtö ök inröl nö sökngöre; yihtöre cha-a ngaich nö ik mak, nāṅ Filip, tök kumkantöre inrē; ngaich vōkö anga-aṅ tö ò.

³⁹Ngaich hē cha nö peūlöre, nö ṙā-ang ik mak; ngaich ngam Töhet Fanöinylö ngam Mā Tēv nö kēḵngen Filip; öt meūkan ngaich ök kumkantöre nö hēk. Kiröönngöre ngaich anga-aṅ nö ṙāmölōn.

⁴⁰I Asôtös ngaich ang Filip; ngaich el talöököre anga-aṅ nö ahangkö ngam tölöök inhānga i nup taṙòkhöre panam, nöng sölta nö i Kaisarī.