Read Car_Nicobarese INLAHEN 9 Bible Online

INLAHEN 9 - Car_Nicobarese bible

INLAHEN 9

¹Ṙòngmö uhômnyö pinnë-eṅlkūö ane inrē finëlngö yik mahaköp aṅ im Mā, ang Sôl,

²Chuh ik mākūö kūönṙô anga-aṅ, ngaich ve-ekūö ò tö līpöre; nö chuh Tāmöskös i yik kamhôṅka Yahūti; pòn hōtu, yē ò nö kanôtukūö tö Kristīön, kikōnyö, kikānö, nö kēten cha nö nyëkö nö i Yerūsalem.

³Ngaich hē ò nö kiröönngöre, ngaich röhta nö i Tāmöskös; ngaich hönglūk ök töyang aṅ el halīöngö nö havīlen ò.

⁴Fukngö anga-aṅ ngaich nö el tumlat; ngaich hang ök ṙô anga-aṅ, tö ngö ṙô tö ò, Sôl, Sôl! Kūöyòh öm öthakôlò chu?

⁵Ngaich ngö ṙô anga-aṅ, Mā Achīö Öm Me-eṅ? Ngaich ngö ṙô Anga-aṅ, Yēsū Chin Chu-ö, Öich töthakôlöngṙô tö meh. Chök man, öm röönngökūö ngam töchökhukūö.

⁶Ngaich kichëyöre anga-aṅ, pingangkūö inrē; ngaich ngö ṙô tö Ò, Mā! Asuh ap lōn Meh, la-en chu? Ngaich ngö ṙô ngam Mā tö ò, Choholre man; kuhēthötre im panam; vënyu nang man min töp la-enre.

⁷Ngaich yik tarik, hol ò nö kiröönngöre nöng sökhaka, nöng öt ṙô-òv; höng hang pööiny ṙô; öt maheūṅkuvö pöri.

⁸Choholre ngaich Sôl, nö ṙā-ang el tumlat; ngaich hē ò nö milaklö matre, öt maheūṅkuvö anga-aṅ. Ngaich cha-a nö sarōk kël ò; ngaich kēten ò nö i Tāmöskös.

⁹Lūöi sumkam anga-aṅ nö öt meuk, öt nyā, öt òk,

¹⁰Hĕng taka ök umuh mahaköp i Tāmöskös, Ananī minënyö. Ngö ṙô ngam Mā tö ò, nö i heūvö, Ananī. Ngaich ngö ṙô anga-aṅ, Mā; ihih chini.

¹¹Ngaich ngö ṙô ngam Mā tö ò, Choholre man; kuṙòh, kiröönngöre ip talöökö, Töchip minënyö. Hatönken öp tö hĕng tak pömchö tarik aṅ Tārsös, i patī Yūtā, Sôl öp minënyö ò.

¹²Ṙònghöichṙen ap nö ve-ekūötēv; ngaich anga-aṅ nö meuk öp tarik, nö yihtöre, Ananī minënyö, ngaich ṙātö eltīre nö in ò pòn hōtu anga-aṅ nö meuk.

¹³Ngaich ngö ṙô Ananī, Mā! Maṙôngö ahang chin tö inlaha ap tarik, tö ṙôken chanökhu tī ò tö yip töhet i Yerūsalem.

¹⁴Ngaich yih anga-aṅ nö chönguvö nö ihih, tö aṅ i yip mākūö kūönṙô nö nyëk yip taṙòkhöre mahavëkö Minënyö Meh.

¹⁵Ngö ṙô pöri ngam Mā tö ò, Kuṙòh, kiröönngöre man, tön aṅtī Chu ap nö katöllöngö, nö mahaköp Mine-eny Chu i kūö yip tahëng mihëṅṙö, rācha inrē, i kūö yip kūön Israĕl inrē.

¹⁶Hameukhömat ò Chin min tö ṙôken kanihngen ò tö kūö Minë-eny Chu.

¹⁷Kiröönngöre ngaich Ananī; kuhēthötre ngaich nö el ök patī; ngaich ṙātö eltīre nö in ò, nö ngö ṙô, Hol chu, Sôl; tīntu chin tö ngam Mā, ang Yēsū, ngam tömeūkö tö meh, el talöökö tök yanihih meh; hòṅ meh öm meuk īnu inrē tö ngam Töhet Fanöinylö.

¹⁸Ngaich ilööṙen nö sukngöre nö ṙā-ang i mat ò, ök tö sā kunlöhö, ngaich meuk anga-aṅ.

¹⁹A Choholre ngaich nö vōkö. Nyā anga-aṅ ngaich; ngaich ngëḵelre alaha. b Rĕh rô-òten anga-aṅ nö i yik mahaköp nö i Tāmöskös.

²⁰Iṙūö ahangken Yēsū anga-aṅ, nö el chūök vine-eṅkūötēv, tö Ò nö Kūön ngam Tēv.

²¹Ngaich ṙòkhöre yik hamang ṙô ò nö uṙeh; ngaich ngö ṙô, Röh ang nö ngòh tötmahakôlò cha yip mahavëkö ngih Mine-eny, i Yerūsalem; ngaich yih anga-aṅ nö ihih, pò ò nö hòṅ nyëkö cha, nö kēten cha nö i kūö yip mākūö kūönṙô?

²²Ṙuhöl alahare pöri Sôl; ngaich kitöngngö lōn yik Yahūti aṅ Tamāskös; hameukten Ò nö Anga-aṅ Kristū.

²³Ṙōlhang sumkam ngaich, ngaich yik Yahūti nö ve-ekūöre nö hòṅ fëlngen ò.

²⁴Ngaich pöri ang Sôl nö akahalōn tö e, Höngkūö inkūp cha-a, tö sakāmö, hatööm inrē, nö hòṅ fëlan.

²⁵Ngaich pöri yik haköp tö ò nö kēḵ an tö hatööm; ngaich hatūöiten ò nö löktökui ök kinlōngö nö el kuvôkö.

²⁶Chalô anga-aṅ nö i Yerūsalem, ngaich hameuktenre nö hamūltöre nö i yik mahaköp; ṙòkhöre pöri cha-a nö pa-ekūö, pòn öt nyātölōn tö ò nö mahaköp.

²⁷Sarōkten ò pöri Parnapas nö i yik tanīnöṙô, ngaich ve-eny nang cha tö inlahen ò nö meuk kūö ngam Mā nö el talöökö; tö Ò inrē nö ve-ekūö ò; nö i Tamāskös anga-aṅ inrē nö öt pinheṅ-eṅvkūö nö mumkahten nö i Mine-eny Yēsū.

²⁸Ngaich in cha anga-aṅ nö havötköre nö i Yerūsalem, mumkahten nö i Mine-eny ngam Mā.

²⁹Ngaich anga-aṅ nö ve-ekūö, ane inrē lā-al ṙô yik aṅ tahëng Yahūti. Ngaich hòṅ fëlngen ò cha-a.

³⁰Ngaich hē yik hol ò nö akahalōn tö e, ngaich söömten ò cha-a nö i Kaisarī; ngaich tīnngen ò nö chuh Tārsös.

³¹Keuheūtngöre chūök ngaich ngam māṅ, i Yūtā, Kelelī, Samariā inrē, nö kuchīken; sīöplöre, lök i pinheṅ-eṅkūöre inrē tö ngam Töhet Fanöinylö, nö ṙuhölre ṙôngö.

³²Ngaich hē Pītör nö keuheūt chahūhure, yihtöre anga-aṅ inrē nö i yik töhet, yik mī-iyöng Littā.

³³Ngaich hĕng tak ök tarik kanôtökūö ò, Ainīös ök mine-enyò ök töhëvhör samyeūheu nö el chamamre, pò ò nö tö lum.

³⁴Ngaich ngö ṙô Pītör tö ò, Ainīös; lööken man ngaich tö tī Yēsū Kristū. Choholre lömlö ngam chamamre. Iṙūö choholre ngaich anga-aṅ.

³⁵Ṙòkhöre yik aṅ Littā, aṅ Sārön inrē nö meūkö ò; ngaich havöötökūöre nö im Mā.

³⁶Ngaich hĕng taka ök umuh mahaköp, i Yòppā, Tapīta ök mine-eny ò, ök tö ngö manah Tòrkas. Töpōyen la-en ök tö tölöök, inlōnhöti inrē.

³⁷Ngaich vahavö anga-aṅ; ngaich kapah. Keuheūthë tī cha-a nö vōkan; ngaich haṙōlngen ò nö el ök lātulöng urôhò.

³⁸Öt marôvat ap Littā tö Yòppā. Ngaich yik mahaköp nö hāngö Pītör nö umuh; ngaich nët tak nak tötīni, nö havëken ò; nö ngö ṙô, Uh man ahāṅtö yanihihre in ih.

³⁹Choholre ngaich Pītör, ngaich kiröönngöre nö in cha. Chalô anga-aṅ, ngaich ngôṅlöngö nö el ök lātulöng urôhò. Ngaich ṙòkhöre yik tafīösi kikānö nö peunyhökūö ò; ngaich hameuktö nuk inyut, kinṙum inrē, chahōk ò hē ò nö ṙòngmö in cha.

⁴⁰Kumnyīnyu pöri cha-a tö Pītör, nö ngö ṙô, Tapīta; choholre man. Milaklö matre ngaich anga-aṅ; ngaich ūichlöre, hē ò nö meukkūö Pītör.

⁴¹Kētö këlre ngaich anga-aṅ nö in ò, ngaich hachohlen ò. Ngaich havëtö yik töhet, yik tafīösi inrē kikānö; kēten ò anga-aṅ ngaich nö aṅ, nö in cha.

⁴²Akahalōn ngaich nö ṙòkhöre yik aṅ Yôppa tö e, ngaich maṙôngö yik ṙamātö ellōnre nö im Mā.

⁴³Ṙōl sumkum ang Pītör nö i patī Sīmōn, ök yōm uk.