Read Car_Nicobarese RŌMA 10 Bible Online

RŌMA 10 - Car_Nicobarese bible

RŌMA 10

¹Kahōlö, ngih vine-elkui im Tēv, ngih kuilōn chu inrē, nöng chööḵnyöten cha, hòṅ cha nö hayöökaṙen.

²Pò chu eūken cha nö kalēk-ĕlōn nö im Tēv, öt sā ngam mikah pöri.

³Pòn öt akahakūö tö lanöökö ngam Tēv, ngaich lukkenre nö vīten kanahngenre: öt tumṙeūtöre cha-a tö ngam lanöökö ngam Tēv.

⁴Pò Kristū nö rit ngam chöngö, im lanöökö, i ngòh ṙamātö ellōn.

⁵Pò Môsös nö kūichhöti, tö ngòh tarik, ngòh töla-evṙen tö lanöökö aṅ im chöngö, nö lökten e nö aṅ min.

⁶Ngö ṙô pöri ngam lanöökö aṅ im mikah, Um ngö ṙô ellōnre, chiāp min yamônlö nö el halīöngö? Öp kamëten Kristū nö i taṙeū:

⁷Hēk, chiāp min yamônti nö lataṙeū? Öp kamëlen Yēsū nö ṙā-ang i yip tökapah.

⁸Sitih pöri ngam ṙô e? Ranghen meh an ngam ṙô, i elvāng meh, i ellōn meh inrē: angū-ö, ngam ṙô mikah ngam inhānga tö ih:

⁹Pò meh, yē ngam elvāng meh nö vënyen Yēsū nö Mā, ngaich ngatī ngam ellōn meh nö ṙātö ellōnre tö ngam Tēv nö hachohlen Ò nö ṙā-ang i yip tökapah, hayöökaṙen min me-eṅ.

¹⁰Pò tarik nö holtö ellōnre nö ṙātö ellōnre, ngaich sölta min nö im lanöökö; ve-eny inrē ngam elvāng, ngaich sölta min nö im inyööken.

¹¹Sā ṙô ngam töhet līpöre, nö ngö, Ngòh ṙamātö ellōnre nö in Ò, öt löknguṙen min nö sirōngkūö.

¹²Pòn rö-ö nö harīkngöre Yahūti, tö tahëng mihëṅṙö tarik: pòn höng Anga-aṅ Mā taṙòkhöre, tökôlòlōn tö taṙòkhöre vame-eṅkūö Ò.

¹³Ngòh mahavëkö mine-eny ngam Mā, hayöökaṙen min.

¹⁴Sitih aich min nö vë-ekūö Ò, yĕn öt ṙātö ellōnre nö in Ò? Sitih inlahen aich min nö ṙātö ellōnre nö im töt ahangre? Sitih elnang aich min nö hang, yĕn öt mumkahtenvö?

¹⁵Sitih inlahen aich min nö mikahten, yē cha nö öt tīntu? Sā kinūichngö e nö ngö, “Iṙën vanāyö röön aich vē ma-ahangkö ngam kumchikṙen, tö kumtö ngam tölööḵ inhangkö tölöök inrē!”

¹⁶Ngaich pöri cha-a nö öt ṙòkhöre nö hangihtöre tö ngam tölöök inhānga. Pò Isayā nö ngö ṙô, Mā: achīö öp ṙamātö ellōnre nö i ṙô ih?

¹⁷Lökten i hināngö an ngam ṙinātö ellōn; ngam hināngö inrē lökten i ṙô Kristū.

¹⁸Ngö ṙô pöri chu-ö; Kô aich nö öt hang? Höng rö-ö, keuheūtngöre chūök chahuhu ap ṙô cha nö ing panam: söl i manā-angkūö ngih pa- nam nup ṙô cha inrē.

¹⁹Ngö ṙô pöri chu-ö, Kô ang Israĕl nö öt akahalōn? Mô- sös ök mu-urĕh nö ngö ṙô, Harunnyö kumnyahlōn meh chin min i yip töt tarik, I yip töt akaha tarik öich halīnö yīö.

²⁰Ngö ṙô inrē Isayā nö halöök- nyôre, Kôti chin tö tī cha yip tötchamöhö chu; Meūkö chin tö cha yip töt mahatön- ken chu.

²¹Ngö ṙô pöri Anga-aṅ tö Israĕl, Sumkāmu rô-òten chin tarāklö këlre i vē tö minôṙô tarik, ane inrē maha-ôngö ṙô.