Read Car_Nicobarese RŌMA 11 Bible Online

RŌMA 11 - Car_Nicobarese bible

RŌMA 11

¹Ngö ṙô pöri chu-ö, Kavalngö yik tarikre ang ngam Tēv? Öthalöng an ngam Tēv. Pò chu yih chu-ö inrē aṅ in Israĕl, aṅ im kūön Aprahām, aṅ im miyöngö Penyamīn.

²Öt kavalngö yik tarikre an ngam Tēv, yik mikahkūö Ò nö lā-urĕh. Öt akahalōn öi tö ṙô ngam Töhet līpöre tö inlahen Ēlaicha? Tö ò nö vë-ekūö ngam Tēv nö lā-al Israĕl,

³Mā, ngaich yin nö fëlngö yik pròfĕt Meh, ultuvö nuk tahāklö Meh: humeng tit tak chin tö ṙā-ayö, ngaich cha-a nö chöh ngih nômö chu.

⁴Ngaich sitih ṙô ngam Tēv nö sapṙô Ò? Sat köiny yip tarik ṙahātö chu, yip töt sāmimtö kui kinmônöre nö i kūö Pē-al.

⁵Ngatī an töngamuh inrē nö chööḵöv, sā kintöllö aṅ im inlōnti.

⁶Yē e pöri nö lökten im inlōnti, ngaich angū-ö nö öt aṅ i la-en: pòn rö-ö öre ngam inlōnti, nö inlōnti.

⁷Sitih pökeh? Ngam tö chöhöh tö Israĕl, öt teūngen anga-aṅ tö e; teūngen pöri yip tö katöllöng, ngaich hangë-engre yip chööḵ:

⁸Sā kinūichngö e nö ngö, Kē-ĕkūö cha ngam Tēv tö ma-alaha kumlō-ov, mat, sinôtö cha nö meuk, nang, sinôtö cha nö hang, söl ing töngamuh:

⁹Ngaich Tāvit nö ngö ṙô, Hök- ngen ngam mīs cha nö vītu, nö inpūti, tinngöp inrē, kin- vē-ĕre, invahal nö in cha inrē.

¹⁰Hökngen nup mat cha nö sangūli hòṅ cha nö öt meuk, ngaich örheūheu me-eṅ si- lutngö uk cha.

¹¹Ngö ṙô pöri chū-ö, Kavē-ĕre yik, nö pòn hòṅ fukngö? Öt halöng an ngam Tēv: löktö ngam fanukngö cha pöri ngam inyööken, nö vītö Tahëng Mihëṅṙö tarik, nö inrunnyö lanīnö ellōn cha.

¹²Yē ngam fanukngö cha ngaich nö kanôlò ngih panam, ane inrē ngam chanatngen cha nö kanôlò vē Tahëng Mihëṅṙö tarik: iṙôkhöl ngam tanööḵlö cha?

¹³Vë-ekūö yīö chin, yī-ö Tahëng Mihëṅṙö, eū ngam la-enre chin, kūö chu chu-ö öich tanīnöṙô vē Tahëng Mihëṅṙö.

¹⁴Yē chu löktu harunnyö lanīnö ellōn yip alahare, ngaich haroh tum tak hayööken tö cha.

¹⁵Yē ngam kinvalngö cha nö inlāmö ngih panam, ngaich sitih ngam kinë-eṅ, tön nômö nö ṙā-ang i tökapah?

¹⁶Yē ngam lanòhlòng nö töhet, ngatī ngam manulngö: yē ngam ṙĕh nö töhet, ngatī minë pak.

¹⁷Yĕn haroh tum hang nup pak tö ohngö, ngaich me-eṅ öm töt harūklöng öm Ôliv, ngaich taptū öm in u, ngaich hamòl kūö u töm ṙĕh ngam kanôlò ngam òliv chōn.

¹⁸Un eū-eu nup pak; yē meh hòṅ eū, rö-ö man me-eṅ tö kumtö ngam ṙĕh tön keūnö me-eṅ töm ṙĕh;

¹⁹Ngö ṙô man chö yih öre, Liköli nup pak pò chu hōtu taptu.

²⁰Hòṅ; kūö ngam öt ṙinātö ellōn cha-a nö lirākiyö, ngaich me-eṅ sökhaka im mikahre. Un tulöngö ellōn, pa-ekūö pöri.

²¹Yē ngam Tēv nö öt ṙā-al minë tö nehngenre pak, öt ṙālen meh min anga-aṅ.

²²Yĕh ngëichkö lanöökö, ane inrē ṙôkö chanökhutī ngam Tēv: ṙôkö chanökhutī, in cha yip tö fukngö, in meh pöri ngam lanöökö ngam Tēv, yē meh haköpöre im lanöökö Ò: ngatī min me-eṅ ṙāliyö.

²³Taptu min cha-a inrē, yē cha nö öt haköpöre nö im öt ṙinātö ellōnre: pò ngam Tēv nö kô nö tapten cha nö hēḵ.

²⁴Pò meh yē meh ṙāliyö ṙā-ang in Ò, ngam tö nehngenre òliv, nö töt kôlò nö chōn, ngaich taptu öm harīkngöre töm tö nehngenre, öm im tö kôlò òliv nö chōn: iṙôkhöl min në tö nehngenre yĕn taptu nö i nup rehre òliv nö chōn?

²⁵Kahōlö, sōten yīö chin öt akahalōn tö ngih öt mikahkūö sin, hòṅ yīö öt höng akaha inrē tö lōnre, tö ngam tö hĕng lā inngëngö lökngen Israĕl, hanöng saha sanööḵlö yip Tahëng Mihëṅṙö, nö yih:

²⁶Ngaich ngatī min nö ṙòkhöre Israĕl nö hayöökaṙen, sā kinūichngö e, Löknyö i Siyôn öp min Ṙamā- nyö nö yih; Havööngö kūö ötlanöökö öp min nö ṙā-ang in Yāköp;

²⁷Ngih ön kinlēḵngô in cha, aṅ in chu. Hē chu min kēḵngö nup tö- kööl cha.

²⁸Pò kūö yīö cha-a nö tö kunyahaṅ elmat nö im tölöök inhānga; tö hanghuṙen pöri cha-a im kintöllö:

²⁹Pò minë inlōnti, tö ngam invëkö ngam Tēv nö öt īnu tö invöötö ellōn.

³⁰Sā yīö sin misī ahôngen ngam Tēv, ngaich pöri töngamuh yī-ö teūngen tö neūkölōn, löktökūö minôṙô cha.

³¹Ngatī yin vē nö minôṙô inrē töngamuh, pò cha nö hōtu nö löktökūö ngam neūkölōn, tö hameuktu nö in yīö, nö teūngen cha-a inrē tö neūkölōn.

³²Pò ngam Tēv nö löpngökūö nuk minôṙô nö ṙòkhöre, pòn hòṅ aheūkölōn Anga-aṅ nö i taṙòkhöre.

³³Ō, ngam ṙū-uti minë kanôlò minë mikah, töm inkaha ngam Tēv inrē! öt chanöhen nup kinṙôka aṅ in Ò, öt ankahen nup talöökö Ò!

³⁴Achīö ṙöng ap tö ngaich nö tö akahalōn tö ellōn ngam Tēv? Achīö ap misī mahalēnö Ò?

³⁵Hēk achīö ap mū-urĕh nö kē-ĕkūö Ò, hòṅ e nö hēk nö haṙëniṙen nö in Ò?

³⁶Pòn aṅ in Ò, lökten in Ò, in Ò inrē në taṙòkhöre chehen: kanôlò Ò yēḵ örheūheu. Āmen.