Read Car_Nicobarese RŌMA 13 Bible Online

RŌMA 13 - Car_Nicobarese bible

RŌMA 13

¹Kö el katòh më lātulöng chöngö yin yēḵ, tön höng aṅ im Tēv an ngam chöngö; hachöngten ngam Tēv inrē minë chöngö.

²Lökten ngòh maha-ôngen ngam chöngö nö maha-ôngen ngam inchöngten aṅ im Tēv: ngaich cha-a yip maha-ôngen min nö kēkūö kinṙòkken re.

³Pò vē mahayöng nö öt pinhe-eṅkūö tö löökö la-en, tön ngam tötlöök. Hòṅ öt pinheṅ-eṅvkūö öm me-eṅ? la-evṙen chĕi tö tölöök, ngaich löknyö in e ineū-euṅ min me-eṅ:

⁴Tön mameukṙen meh an nö aṅ im Tēv, nö chöḵöiny tö tölöök. Ngāngöre, yē meh la-evṙen tö töchōich: tön öt höng tötöl an nö ṙapkö ngam sanët; pò Ò nö aṅ im Tēv nö mameukṙen: mahavahalvah nö in ò, im lanīnö, ngam tö chōchö la-en.

⁵Lökten yin hòṅ el katòh, röön höng kūö ngam lanīnö, tön kūö ap kuilōn yīö inrē.

⁶Angū-ö an lökten yīö inrē tī-iv tö ṙāi inahtö: pò cha nö la-en tö la-en ngam Tēv nö meukṙen, örheūheu nö höngö e angū-ö.

⁷Kētö nup lamöö in cha: ṙāi inahati ip lööṙö e; ṙāi kinëḵeng, ṙinahöt chehen inrē, ip lööṙö e; pinheṅeṅkūö, im tö pahe-evö: minlēḵṙen, im tö milēkaṙen.

⁸Un hötṙehevö nö i tarik, höng ngam hanāngen tö höö: pò ngòh tö hanāngen tö höö; pò ngòh tö hāngenlōn tö holre nö hateungngö ngam chöngö.

⁹Pò ngih, Um asĕha, Um fël tarik; Um ulāyö; Um yikhanga, ngaich yĕn tahëngu chöngö öre, mūlhöt an nö i ngih ṙô tö ngö,

¹⁰Hāngenlōn man tö holre sāre töre. Öt vītö töchōich an nö i holre, ngam hanāngenlōn: lökten an ngam hanāngenlōn nö inteungngö ngam chöngö ngam Tēv.

¹¹Akahalōn yin tö ngih ṙētak, tö e nö ngaich nö ṙētak yīö choholre ṙā-ang im inṙôhò, pò ngam inyööken hī nö röhta nö in hī, töre misī, hē ranehten hī ṙātö ellōnre.

¹²Hòṅ keuheūt ök nö ngaich hatööm; röhta an nö ngaich ngam sakāmö. Lökten hī ta-a, pehngö nup la-en ngih sinngūlö; ngaich ta-a, töi kēḵ ngam aṅtī ngam hanātö.

¹³Sāre tö el sakāmö, tā-a, töi lök im lanënen; un im tin ṙōlen, hinyōyö inrē; un im yanahlö lōn tö töchōich, öt miṙē-ĕv inrē, un linā-alkūö, minūötngö inrē.

¹⁴Kēḵ ngam Mā pöri yī-ö Yēsū Kristū; ui saṙākiṙen lōn töm alaha, öi hateungngö nup lōn e.