Read Car_Nicobarese RŌMA 14 Bible Online

RŌMA 14 - Car_Nicobarese bible

RŌMA 14

¹Hōḵo ngam töt kalē-ĕ mikah pöri yī-ö, uh pöri tökatöngalōn kamilṙô.

²Hĕng tak öp tökô tö lōnre, nö keuheūt nyahāṅre: ngaich pöri ngam töt kalēḵ nöng nyā rōi chōn.

³Un hayëḵeiṙen an yēḵ ngam töt nyamā, tö ngam nyamā: Um uyëka kūö ngam nyamā, tö ngam töt nyamā: tön hōḵen ò an ngam Tēv.

⁴Achīö ṙöng öm me-eṅ, mu-uyëkö kūön holre? Lökngökūö ngam yöngre an min, nö söklöre, hēk fukngö, pòn minhôiṅyu ngam Mā nö asöklen ò.

⁵Hĕng tak öp töyahlö hanāngen töp tahëng, nö hĕng sumkam: örheūheu öp lahëng nöng hēngren hanāngen. Kô-en nyanātö lōn ön yēḵ ngòh tarik nö ellōnre.

⁶Ngòh mahaköpkö ngam sakāmö, haköpkö e nö im Mā: ngòh nyamā, im Mā nö nyā, pòn ha-öiny ngam Tēv anga-aṅ; ngaich anga-aṅ ngam töt nyamā, öt nyā nö im Mā, ngaich nöng ha-öiny ngam Tēv.

⁷Pòn öt hĕng tak tö hī kanahngenre nö aṅ öt hĕng tak kanahngenre nö kapah.

⁸“Pò hī pòrô aṅ, im Mā ayī-ö aṅ; hēk pòrò ayī-ö kapah, im Mā ayī-ö.

⁹Pòn kūö e Kristū nö kapah, ngaich aṅ hēk, hòṅ Ò nö Mākūö tökapah, hĕnghöre tö aṅ inrē.”

¹⁰Kūöyòh öm pöri me-eṅ, uyëken ngam holre? Hēk me-eṅ, kūöyòh öm hayëḵngen ngam holre? Söklöre in yih min ṙòkhöre i kūö ngam anūichö kinṙôka tö ngam Tēv.

¹¹Pò e nö ngö kinūichngö, Sā chu aṅ, ngö ṙô ngam Mā, ṙòktöre kui kinmônö min nö simngöre nö in chu, ṙòknyöre ṙô litāk min nö ve-eny nö im Tēv.

¹²Yĕh meūkö hī min; kö kētö kinṙötöre im Tēv.

¹³Ta-a lökten, ui hēkaṙa uyëken höö: uyëkö ngih pöri lahë, hòn öt tarīku ṙamātö kinve-ĕre nö el talöökö holre, hēk öp lökngövah fanukngö.

¹⁴Akahalōn chin, mikahtulōn chin tö ngam Mā Yēsū, tö törö-ö tösa-òkhu nöng kahngenre: höng löktökūö ò ngòh tösa-òkkūö, in ò an nö tösa-òkhu.

¹⁵Yĕn kūö nya-aṅkūö ngam hol meh nö haṙivlōn, ngaich öt ngöhöre röön me-eṅ lök im hanāngenlōn. Un piyāyi tö nya-aṅkūö meh, ngam tö pô-òvkūö tö Kristū nö kapah.

¹⁶Un halöngten ngam tölöök in meh nö chōichö ineūka:

¹⁷Tön rö-ö an ngam pūlngö ngam Tēv nö nyina-aṅvkūö, inôkö inrē, tön lanöökö, lanāmö, ṙanāmölōn inrē, im Töhet Fanöinylö.

¹⁸Ngòh mi-in e lök la-en Kristū, tölngö ṙanāmölōn ngam Tēv, tö hōḵov inrē tö tarik.

¹⁹Lökten, ta-a, töi tömkörit nup taṙòkhöre vamī lanāmö, nup lökten hī inrē kö harūkö höö.

²⁰Un tūökiyö ngam la-en ngam Tēv nö kūö nya-aṅkūö. Kô nun nö ṙòkhöre nö tölöök: tö chōich tarik pöri, ngòh tö tòk elmat, töt nyamā-aṅvkūö.

²¹Tölöök an ngam töt kinā-aṅ alaha, un rēhĕn ngam kin-eūtö vāin, ngam tö rö-ö inrē kinëken nup kinve-ĕre ngam hol meh.

²²Ngam mikah in meh, in re man yēḵ tö e, ikūö ngam Tēv. Töṙamölōn ön anga-aṅ, ngòh töt mu-uyëkenre nö in e ngam ahōḵore.

²³Öt kôlò pöri ngòh tökatöngalōn yĕn nyā, pòn öt holtö mikah nö nyā; pòn tökööl nup inrē töt īnu tö mikah.