Read Car_Nicobarese RŌMA 15 Bible Online

RŌMA 15 - Car_Nicobarese bible

RŌMA 15

¹Hòṅ keun öt kumlēḵen yip tötkalēḵ in ayī-ö tökalēḵ, uh in höng haṙamlōnre.

²Tā-a, kö haṙamlōn holre in im tölöök, nö harūkö.

³Tön öt höng haṙamlōnre an Kristū; sā kinūichngö e pöri nö ngö, Fuk in chu nun minë inyëḵngen meh tö cha.

⁴Nup tö ngaich nö kūichiyö nö lā-urĕh, kūichiyö anū-ö nö haköp hī, lökten im manöiyö, inṙamlōn inrē, aṅ im töhet līpöre, öi maheūṅkkuvö.

⁵Kē-ĕkūö yīö an yēḵ ngam Tēv tö manöiyö, ṙanāmölōn inrē, öi hēngö ellōn in höö, sā lōn Kristū Yēsū.

⁶Hòṅ yīö hēngö ellōn, hēngö ṙô ha-öiny ngam Tēv, ane inrē ngam Yöng ngam Mā hī Yēsū Kristū.

⁷Lökten yin kö hōḵen höö, sā Kristū nö hōḵen yīö, nö ineū-euṅ ngam Tēv.

⁸Tön ngö ṙô chin tö yīö, tö Kristū; nö vītu nö mameukṙen vē tö tunyīnyi, kūö kanô-en ngam Tēv, hòn haköpka minë kinlēḵngô, tö kētu nö i yik muvöhngö hī.

⁹Ane inrē hòṅ vē Tahëng Mihëṅṙö nö ha-öiny ngam Tēv, kūö neūkölōn Ò; sā kinūichngö e nö ngö, Lökten chin min vënyen meh i vē Tahëng mihëṅṙö; tikökṙôre inrē tö Nöinyö meh.

¹⁰Hēk ngö ṙô inrē, Ṙāmölōn yin yī-ö, Tahëng mihëṅṙö, hol vē tarik Ò.

¹¹Hēk ngö ṙô inrē, Ha-öiny ngam Mā Tēv, ṙòkhöre yī-ö Tahëng mihëṅṙö; hökngen vē taṙòkhöre tarik inrē nö ha-öinyan.

¹²Hēk ngö ṙô inrē Isayā, Ṙĕh öp min löklö in Yēsī, öp chamôhòlre nö hayöng vē Tahëng mihëṅṙö; im Ò maheūṅkka min vē Tahëng mihëṅṙö.

¹³Ngam Tēv mineūka an yēḵ, mahatööḵngen yīö tö ṙanāmölōn, kumchikṙen inrē, im ṙinātö ellōn: hòṅ yīö ṙuhölre im mineūka, lökten i minhôiṅyö ngam Töhet Fanöinylö.

¹⁴Kahōlö, akahalōn chin tö yīö, öi tööḵlö tö lanöökö, tööḵngen tö nup taṙòkhöre inkaha, kô-òren öi halēnö höö.

¹⁵Mötlö inkeūṙö tī pöri chu-ö kūichhöti in yīö, sā famëḵlen yīö hēk, kūö ngam inlōnti tökētu nö in chu töm Tēv,

¹⁶Pò chu hōtu mameukṙen Kristū Yēsū i vē Tahëng mihëṅṙö, mineukṙen ngam tölöök inhangkö ngam Tēv, hòṅ ngam kinëtö yip Tahëng minhëṅṙö nö tö hō-ovö, nö tö ahetlöngö tö ngam Töhet Famöinylö.

¹⁷Lökten chin ineū-euṅvö in Kristū Yēsū, i nup aṅ im Tēv.

¹⁸Öt hòṅ ṙô-òv chin tö yô-òv, höng nup la-en Yēsū nö lökten in chu, kūö hanô-òṅ yip Tahëng mihëṅṙö, i ṙô, la-en inrē,

¹⁹I kanô-òṅ nup minkahngö, pinngangkūö inrē, i kanô-òṅ ngam Töhet Fanöinylö; hòn löktökūö Yerūsalem, vinngö nö Illirikum, öich keuheūt ahangkö ngam tölöök inhangkö Kristū;

²⁰Hòṅ vīten e chin nö kū-ö chu ngatī, ahangkö ngam tölöök inhānga, öt i chūök Kristū nö ngaich nö minënyu, hòṅ chu öt mānö i kui chūök rööntö machööḵlö tī tahëng tarik;

²¹Sā kinūichngö e pöri nö ngö, Meuk yip min, yip töt yihivö tö inhangkö Ò, akahalōn min cha-a yip tö öölu nö hang.

²²Lökten chin inrē ṙōlheuh sānngö yanihih in yīö.

²³Rö-ö pöri nö ōtre chūökö ihih; ngaich i tumhang në samyeūheu, paṙūtalōn hòṅ yih in yīö,

²⁴Ip hē chu min chuh Ispēn, (meūkkenre chu-ö, ip kinröönngöre, ngaich hòṅ meuklöngṙen eltalöököre in e, tö yīö, yē chu urĕh sin rahëichyen ṙanāmölōn in yīö.)

²⁵Ngaich pöri öich chuh Yerūsalem meukṙen yip töhet.

²⁶Pò e nö tölöök nö lōn yip aṅ Makētòni, aṅ Akāya inrē nö meukṙen yip yāich aṅ i yip töhet i Yerūsalem.

²⁷Hôṅ, tölöök an nö lōn cha; cha-a yip tö hötṙehevö nö in cha. Yē yip Tahëng mihëṅṙö nö hamòlkūö cha nö i nup aṅ i töhet, ngaich höteh cha angū-ö nö meukṙen cha tö nup aṅ ing panam chehen.

²⁸Yē chu min keuheūten tö ngih, ngaich haköpngö ngam ṙòng nö in cha, ngaich lök in yīö chu-ö min chuh Ispēn.

²⁹Akahalōn chin tö e yē chu yih in yīö, tööḵlö chin min yih in yīö tö ngam inkôlò aṅ in Kristū.

³⁰Kahōlö, ve-ekūö yīö chin, lökten im Mā hī Yēsū Kristū, lökten im hanāngenlōn ngam Töhet Fanöinylö inrē, hòṅ yīö kalah holṙen chu im vine-ekūötēv, ve-el kui chu;

³¹Hòṅ chu ṙānyuvö, ṙā-ang in cha, yip töminôṙô i Yūtā, hòṅ ngam mineukṙen tī chu, i Yerūsalem nö tö hōḵov min tö yip töhet;

³²Hòṅ chu yih in yīö, i ṙanāmölōn, löktö i lōn ngam Tēv, ngaich holre tö yīö öi teūngen tö haneūheu.

³³In yīö ṙòkhöre an yēḵ ngam Tēv lanāmen. Āmen.