Read Car_Nicobarese RŌMA 2 Bible Online

RŌMA 2 - Car_Nicobarese bible

RŌMA 2

¹Lökten man me-eṅ öt inṙēluvö, Ō me-eṅ tarik, me-eṅ töng kamhôṅka; töt mahakôlòre mana, yē meh kahòkken tahëng; pò meh me-eṅ kamhôka ngaich öm harūnöre i tö ngatī.

²Akahalōn ayī-ö tö ngam kinṙôka aṅ im Tēv nö sā ngam kanô-en nö i yip maharūnöre nö i tö ngatī.

³Öt kô-òngvah öm min me-eṅ tö lōnre tö kūö ngam kinṙôka aṅ im Tēv, Ō me-eṅ tarik, öm kamhòkken cha yip maharūnöre nö i tö ngatī, ngaich me-eṅ ngatī inrē?

⁴Miyëḵ ṙöng öm tö ṙôken ngam lanöökö Ò, ṙināpö, manöiyö Ò inrē, öm öt akahalōn tö lanöökö ngam Tēv nö hachōten meh im invöötö ellōn?

⁵Ngaich pöri nup nganëḵeṅ ellōn meh, öt miṙivlōn meh inrē tö tökööl nö hamūllö lanīnö im inmeuktö ngam tölöök kinṙôka aṅ im Tēv:

⁶Ngam kameḵeṅkūö tarik min tö nup tö sā la-en cha:

⁷I yip mahamöiyöre i tölöök la-en; nö chöh kanôlò, ineū-euṅ, töt chinhūngu inrē, in cha ngam nômö tö örheūheu aṅ:

⁸In cha pöri yip töminôṙô, maha-ôngen ngam kanô-en, hamangṙô michūṙen; ngam lanīnö.

⁹Kanihngen, miṙivlōn, i ellōn taṙòkhöre tarik yip tö la-evṙen tö tötlöök, aṅ i yip Yahūti urĕh, aṅ i yip Krīk inrē;

¹⁰Kanôlò pöri ineū-euṅ inrē, kumchikṙen inrē i yip taṙòkhöre tarik tö la-evṙen tö tölöök, urĕh i yip Yahūti, i yip Krīk inrē:

¹¹Pò ngam Tēv nö töt atöltuṙen tö tarik.

¹²I ṙôngö yip tö ngaich nö köölö fālen nö lā-uk ngam chöngö, öt kôlò min nö lā-uk ngam chöngö: i ṙôngö yip tö ngaich nö köölö fālen nö el katòh ngam chöngö, im chöngö kinṙòkken min.

¹³Pòn öt höng yip hamangṙô ngam chöngö, tö löök nö i kūö ngam Tēv, tön yip töla-evṙen tö aṅ im chöngö, nö cha-a tö kaheuktu nö löök.

¹⁴Pò yip tahëng mihëṅṙö tarik yip töt īnu tö chöngö nö la-evṙen tö ngam nehngenre aṅ im chöngö, vē töt īnu tö chöngö, ngaich chöngu cha-a nö in re.

¹⁵I inlaha cha nö hameuktö la-en ngam chöngö nö kūichiyö nö ellōn cha, in e ngam kui lōn cha nö eū-a, ngaich nup lōn cha nö kö vëken höö, hēk vëken cha;

¹⁶Im sakāmö hē ngam Tēv min nö kahòkken nup töhayunka i tarik, sā ngam ahangkö chu tölöök, lökten Yēsū Kristū.

¹⁷Yē meh pöri me-eṅ minënyu tö mine-eny Yahūti, öm töönglöre im chöngö, ngaich eū-eure im Tēv,

¹⁸Akahalōn tö lōn Ò, ngaich hōḵo nup tölngö tölöök, haköptu inrē tö aṅ im chöngö,

¹⁹Ngaich nyatlö töre me-eṅ inchōkūö tötmeuk, hanātö mat cha yip el sinngūlö.

²⁰Mahachōten töt akaha, mahaköptö tëṅnö, īnu töm chöngö insā mikah, ngam kanô-en inrē;

²¹Lökten meh haköp tö tahëng, ngaich öm öt haköp töre hòng me-eṅ? Me-eṅ mumkahten tarik nö un ulāyö, ngaich ulāyö hòng me-eṅ?

²²Me-eṅ öm tö ngö ṙô tö tarik, un asĕhha, ngaich asĕhha hòng me-eṅ? Me-eṅ tö sa-òkkūö tö insā tēv, ngaich ulāingen në töhet chūök hòng?

²³Me-eṅ ameu-eure im chöngö, ngaich lökten im finlalngö ngam chöngö öm öt milēḵṙen tö ngam Tēv?

²⁴Pò ngam mine-eny ngam Tēv nö ötlēkaṙen nö ngaich nö i vē Tahëng Mihëṅṙö tarik tö kūö yīö, sā kinūichngö e nö ngaich.

²⁵Pòn kô nö kôlò tī ngam tunnyinyngö yē meh öm tö la-evṙen tö aṅ im chöngö; yē meh pöri pumyāingö ngam chöngö; ngaich ngam tunnyinyngö meh nö vīngöre nö öt tunyinyngö.

²⁶Lökten yē yip töt tunyīnyi nö haköp nup inchöngten im chöngö; röh öng ngam öt tunnyinyngö ò nö kaheuktu nö tunnyingngö?

²⁷Ngaich rö-ö hòng min ngam öt tunnyinyngö ngam nehngenre, nö kahòkken meh, yē e nö hateungngö ngam chöngö, me-eṅ tö īnu töm kinūichö; tunnyinyngö inrē öm tö falālö tī tö aṅ im chöngö?

²⁸Pò ò anga-aṅ nö öt Yahūti ngam töng el kahôyö, öt rēhĕn nö tunnyinyngö ngam töng lā-uk nö im alaha.

²⁹Yahūti pöri anga-aṅ ngam lā tuhēt; ngaich ngam tunnyinyngö nö aṅ im ellōn, im ma-alaha, öt im kinūichö; öp töt aṅ i tarik ineū-euṅ, aṅ im Tēv pöri.