Read Car_Nicobarese RŌMA 3 Bible Online

RŌMA 3 - Car_Nicobarese bible

RŌMA 3

¹Suh papkeh kanô-òṅ i vē Yahūti? Suh ap kanôlò aṅ im tunnyinyngö?

²Keuheūttören talöökö nö pōyen: raneh u nö ṙòkhöre, kē-ĕvkūö cha-a nö hayōmken minë chöngö ngam Tēv.

³Pòyòh yĕn rēvre töt mikahavö? Ngaich ngam hanāten cha hòng nö im mikah, nö öt kanôlòvö tī tö ngam kanô-en ngam Tēv?

⁴Un ngatī yēḵ; hôṅ; hökngen ngam Tēv nö tökô-en; ṙòkhöre pöri tarik nö töminyôiny-aṅ; sā kinūichngö e nö ngö, Hòṅ meh kô-en i nup ṙô meh, ane inrē hòṅ meh mihôiṅ yē meh kahôka.

⁵Yē ngam michūṙen hī pöri nö hōtö ngam lanöökö ngam Tēv, sitih ṙô öi min? Tömichūṙen ang ngam Tēv ngam chamöha nö holtö lanīnö? (Sā ṙô tarik chin ṙô-òv).

⁶Un ngatī yēḵ; sitih inlahen ṙöng ang ngam Tēv min nö kahòkken ngih panam?

⁷Yē ngam Tēv pöri nö lökten im minyôiny-aṅ chu nö pōilö ngaich nö im kanôlò Ò, pò yòh öich ṙòng möng kahòkkaṙen sā tököölö fālen?

⁸Ngaich kūöyòh rö-ö (sānup tö eūka sinūöichkö ih, sā ṙô yip rēvre ṙung nö eūken ih nö ngöṙô), töi chōichö la-en, hòn yih ngam tölöök? Yip tölöökö öt inkôlò.

⁹Sitih pökeh? Höichngen inlahen öi ayī-ö tö cha? Hö-ö, öt höichngen: pò hī taheui, hĕnghöre i yip Yahūti, i yip krik inrē töm fālen, tö cha nö ṙòkhöre nö elkatòh ngam tökööl;

¹⁰Sā kinūichngö e nö ngö. Rö-övö nö tölööku, hö-ö, öt hĕng tak.

¹¹Rö-övö nö tö-akavö elmat, Rö-övö nö chamöhöv ngam Tēv.

¹²Ṙòkhöre inrē cha-a nö öt kanôluṙô. Rö-övö nö tölööku la-en, hö-ö, ötrēhĕn nöng hĕng tak.

¹³Anūlö nup kilööp cha töluve-akkūö; i litākre minyôiny-aṅ yip; I minuh cha nup pēch tö kapahakūö.

¹⁴Yip tö tööḵlö elvāng tö ötlinëkô, kumnyah inrē.

¹⁵Veut nup röön cha nö kitaknyö mahām:

¹⁶Ngaich ngen nup talöökö cha nö öt kanôlò inrē.

¹⁷Öt akahakūö yip tö talöökö kumchikṙen:

¹⁸Öt aṅhaṅvkūö yip tö pinheṅ-eṅkūö tö ngam Tēv.

¹⁹Akahalōn in ngaich töngamuh tö nup töng ṙô ngam chöngö, ve-ekūö cha-ana yip elkatòh ngam chöngö; hòn ṙòkhöre nup elvāng nö asökiyö, ngaich ṙòkhöre ngih panam nö kēhötvö nö elkatòh ngam kinṙôka aṅ im Tēv:

²⁰Pòn kūö la-en ngam chöngö nö öt tarīku tö löök nö ikūö Ò: pòn lökten im chöngö ngam mikahkūö tö tökööl.

²¹Ngaich pöri töngamuh nö köhngen töm chöngö, nö hameuktu ngam lanöökö ngam Tēv, ngam chöngö an ameū-a tö më pròfĕt inrē;

²²Angū-ö lanöökö ngam Tēv lökten im mikah in Yēsū Kristū nö in cha nö ṙòkhöre yip ṙamātö ellōnre; pòn öt tö atöltuṙenvö;

²³Pòn ṙòkhöre nö köölö fālen, ngaich hāṅten tö kanôlò ngam Tēv;

²⁴Halööklöngö nöng öt ṙāyu lökten im inlōnti aṅ in Ò, lökten ngam ṙinānyi ngam in Kristū Yēsū:

²⁵Ngam tö töliṙen tö ngam Tēv nö inlāmö lökten im mikah im mahām Ò, nö hameuktö ngam lanöökö Ò, kūö invāngngö nuk tökööl tö, ngaich misī, nö i manöiyö ngam Tēv,

²⁶Ngö ṙô chin, kūö inmeuktö ngam lanöökö Ò inrē töngamuh: pòn hōtu anga-aṅ nö löök, ngam mahalööklen ò inrē, tö aṅ im mikah in Yēsū.

²⁷Isuh ap pökeh ineū-euṅ? Öt mūlta an. Lökten ip yòh chöngö? Aṅ i la-en hòng? Hö-ö, tön lökten i chöngö aṅ i mikah.

²⁸Lökten in kaheukhöti tö ngòh tarik nö halööklöngö nö lökten im mikah, nö köhngen töm la-en aṅ im chöngö.

²⁹Hēk, höng Tēv vē Yahūti ang ngam Tēv? Röh ang nö Tēv vē Tahëng mihëṅṙö inrē? Hôṅ, vē Tahëng mihëṅṙö inrē?

³⁰Yĕn ngatī ngam Tēv nö töng hĕng, ngaich anga-aṅ min nö halöök vē tö tunyīnyi lökten im mikah, vē töt tunyīnyi inrē nö löklen im mikah.

³¹Ngaich öi pökeh ayī-ö vīten ngam chöngö nö öt tinīlu, kūö ngam mikah? Un ngatī yēḵ: hö-ö, köpö tī in tö ngam chöngö.