Read Car_Nicobarese RŌMA 4 Bible Online

RŌMA 4 - Car_Nicobarese bible

RŌMA 4

¹Sitih ṙô öi pökeh tö kanôtökūö Aprahām ök muvöhngö hī, nö sā ngam alaha?

²Yē Aprahām öre nö löklen i la-en inlööklö, ngaich löknyu ineū-euṅ anga-aṅ; rö-ö pöri nö kū-ö tö im Tēv.

³Sitih ṙô ṙöng öng ngam töhet līpöre? Ṙātö-ellōnre Aprahām nö im Tēv ngaich kaheuktu nö lanöökö nö in Ò.

⁴Ngaich in ò ngam tö la-evṙen, nö öt kaheuktu ngam raneushö, nö aṅ im inlōnti, sā höteh pöri.

⁵In ò pöri ngam töt la-evṙen, höng ṙātö ellōnre pöri nö in Ò ngam mahalööklö tötlöök, ngaich kaheuktu ngam mikah ò nö lanöökö.

⁶Sā Tāvit inrē nö ṙô-òiny inkôlò nö ing tarik, ngam tö kaheuktu tö ngam Tēv nö im lanöökö, nö köhngen tö nup la-en, nö ngö ṙô,

⁷Tö kôlò yip cha-a yip tö aṙēlöngö tökööl, yip tö hanyāti tökööl inrē.

⁸Tökôlò ön ngòh tarik, ngòh töt kaheuktu tö ngam Tēv, nö i tökööl.

⁹Inkôlò vē tö tunyīnyi öng ṙöng angū-ö? Vē töt tunyīnyi ṙöng inrē? Pò hī ngö ṙô, tö ngam mikah Aprahām nö kaheuktu nö lanöökö.

¹⁰Sitih kinṙeukti önguh? Unôichrit ò ṙöng nö tunyīnyi? Urĕh ṙöng? Röön unôich; tön urĕh.

¹¹Ngaich teūngen anga-aṅ tö ngam minkahngö tunnyinyngö, kintāntö ngam mi-in ò nö ngaich, hē ò nö öl nö tunyīnyi; pòn hōtu anga-aṅ nö yöng taṙòkhöre, ṙamātö ellōnre, pòrô cha-a nö töt tunyīnyi; hòṅ cha cha-a inrē nö kaheuktu nö im lanöökö;

¹²Yöng cha inrē yip tö tunyīnyi, röön höng yip tö tunyīnyi, tön yip lamök el talöökö ò inrē, nö im mikah ngam yöng hī Aprahām, ngam mikah ò hē ò nö öl nö tunyīnyi.

¹³Pòn öt lökten ngam chöngö, ngam kinlēḵngô nö in Aprahām, hēk ip kūön ò, nö anga-aṅ tö-amīnuvö töng panam, lökten ngam lanöökö ngam mikah pöri.

¹⁴Pò cha öre yip mi-im chöngö nö tö amīnuvö, ngaich ngam mikah nö chanökalaha, ngam kinlēḵngô inrē nö töng rö-ö.

¹⁵Pò ngam chöngö nö vamīlö lanīnö; i chūök ngam chöngö pöri nö rö-öv, ngaich öt pinyāingu angū-ö.

¹⁶Angū-ö an lökten e nö aṅ im mikah, hòṅ e nö sā ngam inlōnti; pòn hōtu ngam kinlēḵngô kūön; rö-ö nöng in ò ngam mi-im chöngö, tön in ò inrē ngam mi-im mikah Aprahām, ngam yöng hī ṙòkhöre;

¹⁷(Sā kinūichngö e nö ngö, Vīlen meh chin yöng tö ṙōl mihëṅṙö tarik) i kūö ò ngam chūök ò nö ṙātö ellōn re, Anga-aṅ ngam Tēv, ngam maha-aṅ kupah, ngaich havëtö nup tö rö-ö, nö sā u öre yĕn könghaka.

¹⁸Ngam mi-im mineūka ngaich ṙātö ellōnre im mineūka, pòn hōtu anga-aṅ nö yöng tö ṙōl mihëṅṙö tarik, sā ngam tö ngaich misītö eūka, Ngatī yip kūön meh min.

¹⁹Ngaich rö-övö nö öt kumlĕḵĕyö nö im mikah, ngaich ök alaha ò tö lōn ò nö sā kupah (pòn hēngòng samyeūheu ṙēti anga-aṅ), öt akahaiṙen inrē ök chūök kanūönö Sārai.

²⁰Hôṅ, meūkkö ngam kinlēḵngô ngam Tēv, öt katēli anga-aṅ nö lökngen ngam öt ṙinātö ellōn, ṙuhölre kumlēḵ pöri nö lökten im mikah, ngaich ha-öiny ngam Tēv,

²¹Pòn mikahtulōn takô tö ngam tö kilēḵĕyö, tö Ò, ngaich mihôiṅ inrē Anga-aṅ nö hateunghöti.

²²Lökten inrē nö kaheuktu nö in ò nö lanöökö.

²³Öt kūichi angū-ö nö kūö Ò nöng hĕng taka ngam tö kaheuktu nö in ò,

²⁴Tön kūö hī ayī-ö inrē öi kaheuktuvö tö e min, öi ṙamātö ellōnre in Ò ngam mahachohlen Yēsū ngam mā hī nö ṙā-ang i tö kapah,

²⁵Ngam tö kē-ĕyö kūö në tökööl hī, ngaich hachohlöngö kūö inlööklö hī.