Read Car_Nicobarese RŌMA 5 Bible Online

RŌMA 5 - Car_Nicobarese bible

RŌMA 5

¹Sā hī ngaich halööklöngö lökten im mikah, ta-a töi lām im Tēv lökten ngam Mā hī Yēsū Kristū;

²Ngam lökten hī löktu i ngih inlōnti chūök hī sökhaka, kūö ngam mikah; ta-a inrē töi ṙāmölōn im mineūkkö kanôlò ngam Tēv.

³Un höng ngatī, tön hĕnghöre ṙāmölōn ayī-ö, ta-a, i nup kanihngen hī; akahtöheichlōn tö ngam kanihngen nö vītö manöiyö,

⁴Ngam manöiyö, tī tö inmeukten inrē, tī tö mineūka;

⁵Öt sumrōngngökūö an ngam mineūka; pò ngam hanāngenlōn ngam Tēv nö ngaich nö pirāti nö ellōn hī, lökten im Töhet Fanöinylö, ngam tö kētu nö in hī.

⁶Pòn hē hī misī ṙòngmö öt kalēḵen, ngaich ik ṙētak Kristū nö kapah kūö vē tötlöök.

⁷Pòn öt hōḵ nö hĕng tak tökapah tö kūö tölöök tarik; ngaich lohten pöri nö hĕng tak öp tö hōḵ nö kapah tö kūö tölöök tarik.

⁸Kētö ngm hanāngenlōnre pöri ngam Tēv nö in hī i saha hī ṙòngmö tötlöök, ngaich kapah Kristū tö pòkūö hī.

⁹Mötlö ayī-ö min hayöökaṙen ṙā-ang im lanīnö ngam Tēv lökten in Ò, pòi ngaich halööklöngö lökten im mahām Ò.

¹⁰Pò hī, hē hī sin ṙòngmö kumnyah elmat, ngaich lökten im kinpaha ngam kūön Ò öi halāmtu im Tēv, möthë min ayī-ö hayöökaṙen lökten im nômö Ò, pôi ngaich halāmtu.

¹¹Rö-ö nöng ngati, tön ṙāmölōn ayī-ö inrē im Tēv lökten ngam Mā hī Yēsū Kristū, ngam lökten hī ngaich töngamuh teūngen tö inlāmö.

¹²Lökten sā ngam tökööl nö yih nö ing panam nö lökten i tö hĕng tak tarik, lökten im tökööl inrē ngam kinpaha; ngaich ngatī ngam kinpaha nö söl i taṙòkhöre tarik, kūö e ngaich nö ṙòkhöre nö kööl;

¹³Hanöng saha ngam chöngö ngaich ngam tökööl nö ing panam: öt kaheuktu pöri ngam tökööl i saha ngam chöngö nö rö-ö.

¹⁴Ngaich pöri ngam kinpaha nö löktö kūö in Ātöm nö hayöng söl in Môsös, nö i kui cha nö pòrô yip tötköölö fālen nö sā falngen Ātöm, ngam töng insā ngam mu-unôich tö yihih.

¹⁵Rö-ö pöri nö sā ngam tökööl, ngatī inrē ngam töt ṙāyu raneushö. Yĕn ṙōlhang tak tö kapah tö kūö tökööl ngam tö hĕngtak, mötlö tī ngam inlōnti aṅ im Tēv, ngaich raneushö nö lökten im inlōnti aṅ im tö hĕng tak tarik, Yēsū Kristū, nö pōyen nö i tömaṙôngö,

¹⁶Öt höng lökten i tö hĕng tak tö köölö fālen, ngam raneushö; pò ngam kinṙòkken ngam tö hĕng tak nö öt inkôlò, ngam töt ṙāyu pöri raneushö; nö löktökūö tö pōyen kanöölö, nö inlööklö.

¹⁷Pò e, yĕn lökten tökööl ngam tö hĕng tak hayöng ngam kinpaha nö löktö kūö tö hĕng tak; mötlö cha-a min yip tö teūngen tö inlōnti tö pōyen; ngam raneushö lanöökö inrē im nômö nö hayöng, lökten im tö hĕng tak, Ang Yēsū Kristū.

¹⁸Ngaich sā lökten im tö hĕng tak tö köölö fālen ngam kinṙôka nö yih nö i taṙòkhöre tarik nö öt inkôlò.

¹⁹Pòn sā e nö lökten i minôṙô tö hĕng tak tarik nö maṙôngö tö vī-iyṙen nö köölö fālen, ngatī nö lökten im öt inhôngen tö ngam hĕng tak min, nö maṙôngö yip tö vītu nö löök.

²⁰Anòng tö röön e ngam chöngö, pòn hōtu ngam kanöölö nö pōyen; i chūök ngam kanöölö pöri nö pōyen, mötlö ṙôken ngam inlōnti nö pōyen:

²¹Sā ngam tökööl nö hayöng im kinpaha, hòṅ ngatī ngam inlōnti nö hayöng lökten im lanöökö nö im nômö tö-örheūheu-aṅ, lökten Yēsū Kristū ngam Mā hī.