Read Car_Nicobarese RŌMA 6 Bible Online

RŌMA 6 - Car_Nicobarese bible

RŌMA 6

¹Sitih ṙô öi pakeh? Iṙūöhen öi im tökööl hòṅ ngam inlōnti nö pōyen?

²Öt halöngten e an ngam Tēv. Ayī-ö tö kapah ngaich öi ṙā-ang ngam tökööl, sitih höngngöhören öi min in e?

³Öt akahalōn öi yī-ö, tö hī ṙòkhöre ayī-ö tö vōkö in Kristū, öi vōkö i ngam kinpaha Ò?

⁴Lökten hī ngaich ultu hol ò, löktö im vinôkö, im kinpaha Ò, hòṅ hī, sā Kristū hachohlöngö ṙā-ang i yip tö kapah, löktö i kanôlò ngam Yöng, ngatī ayī-ö min inrē lök im tufömngöre nômö.

⁵Pò hī hamūltu in Ò, öi sā kinpaha Ò, sā invanlö Ò ayī-ö min inrē.

⁶Akahalōn tö ngih, tö ngam höteh tarik hī nö harātu nö hol Ò, hòṅ ngam tökööl alaha nö ṙā-aiṙen, hòṅ ngam tökööl nö öt ngöhöre nö hayöng nö in hī.

⁷Pò ngam tö kapah nö ṙā-ang im tökööl, ngaich löök.

⁸Yē hī kapah hol Kristū, ṙātö-ellōnre ayī-ö tö hī min aṅ hol Ò.

⁹Akahalōn in tö Kristū nö havanlöre nö ṙā-ang i tö kapah, öt hēk nö kapah; öt kanô-òṅvö ngam kinpaha nö in Ò.

¹⁰Pò ngam kinpaha Ò, hĕng heuh kinpaha An, kūö tökööl; ngam anahaṅ Ò pöri, im Tēv nö aṅ.

¹¹Ngatī lōn yin yī-ö töre kapah, ṙāngö ngam tökööl; aṅ pöri im Tēv, lökten Kristū Yēsū, ngam Mā hī.

¹²Lökten un halöngtuṙen ngam tökööl nö hayöng ngam tö kapah alaha yīö, öi hang chöngö lōn ngam alaha;

¹³Ui rēhĕn kētö nup tūmö alahare im tökööl nö aṅtī nup ötlanöökö, kētöre pöri yī-ö im Tēv öi tö aṅ ṙā-ang yip tökapah; nup tūmö alaha yīö inrē nö aṅtī ngam lanöökö nö im Tēv.

¹⁴Pò ngam tökööl nö ötkô nö hayöngö yīö; pò yīö öt elkatòh ngam chöngö, elkatòh ngam inlōnti pöri.

¹⁵Sitih ṙöng? Köölö fālen öi hòng sā hī öt elkatòh ngam chöngö, elkatòh ngam inlōnti pöri? Öt halöng An ngam Tēv.

¹⁶Öt akahalōn öyih, tö ngam chūök tī yīö kētöre öi kūön ngam töt inhôngen; kūön Ò yī-ö ngaich, ngam ahang chöngö yīö; yĕn ngam tökööl im kinpaha, hēk yĕn ngam töt inhôngen im lanöökö?

¹⁷Ha-öinyö pöri yēḵ ngam Tēv; pò yīö sin misī kūön ngam tökööl, vītu yī-ö ngaich töt maha-ôngen im ellōn, öi im insā ngam inköphöti, ngam ṙeūngö yīö ngaich ṙānyuvö;

¹⁸Ngaich yī-ö ṙānyuvö ṙā-ang im tökööl, vītu yī-ö ngaich kūön ngam lanöökö.

¹⁹Sā inlahen ṙô tarik chin, kūö öt kumlēḵ alaha yīö: pòn sā yīö sin misī, kēḵngö nup tūmö alaha yīö nö kūön ngam töchōich, ngatī yin töngamuh, kētö minë tūmö alaha yīö nö kūön ngam lanöökö.

²⁰Pò yīö misī kūön ngam tökööl, ngaich öt īnu yī-ö tö lanöökö,

²¹Suh nup pökeh ṙòng in yīö hē e, i nup sumrōngkūö töngamuh? Tön ngam kinpaha manāngen u anū-ö.

²²Ngaich pöri ṙānyu töngamuh ṙā-ang im tökööl, ngaich vītu öi kūön ngam Tēv, ngaich ṙôngu yī-ö im inhetlö, ngaich nômö tö tö örheūheu-aṅ, manāngen.

²³Pò ngam raneushö tökööl nö kinpaha; ngam aṅ im Tēv pöri tötṙāyu raneushö, ngam tö örheūheu-aṅ nômö, in Kristū Yēsū ngam Mā hī.