Read Car_Nicobarese RŌMA 8 Bible Online

RŌMA 8 - Car_Nicobarese bible

RŌMA 8

¹Lökten yin töngamuh vē mi-in Kristū Yēsū nö rö-ö nö öt hakôlöngṙô.

²Pò ngam chöngö ngam Töhet Fanöinylö nômö in Kristū Yēsū, nö ṙānyen chu ṙā-ang im chöngö tökööl, kinpaha inrē.

³Pò ngam öt kanô-òṅ nö la-en ngam chöngö, nö kūö e nö öt kalēḵen lökngen ngam alaha, tīnhöti ngam Tēv tö ngam Kūönre nö sā inlahen tarik tö īnu tö tökööl ngaich öthakôlò ngam tökööl nö im alaha:

⁴Hòṅ ngam tö hachöngtu aṅ im chöngö nö hateūngi nö in hī, öi öt lamök im alaha, lamök im ma-alaha pöri.

⁵Pò cha vē lamök im alaha nö lōn tö nup aṅ im alaha: cha-a pöri yip lamök im ma-alaha nö lōn tö nup aṅ im ma-alaha.

⁶Pòn kinpaha kuilōn ngam alaha: nômö pöri kuilōn ngam ma-alaha, kumchikṙen inrē.

⁷Pò ngam kuilōn ngam alaha nö kumnyahṙen im Tēv; pò e nö öt elkatòh ngam chöngö ngam Tēv, kôḵngen angū-ö nö öt rēhĕn nö kô:

⁸Ngaich cha-a yip mi-im, alaha nö ötkô nö haṙāmlōn ngam Tēv.

⁹Rö-ö pöri yī-ö im alaha, tön im ma-alaha, yē ngam Töhet Fanöinylö nö iyöng in yīö. Yĕn tarīku pöri töt īnu tö ngam Töhet Fanöinylö Kristū, ngaich öt aṅ in Ò anga-aṅ.

¹⁰Ngaich yē Kristū nö in yīö, kapah ngam alaha kūö tökööl; ngam ma-alaha nômö pöri kūö lanöökö.

¹¹Yē ngam Töhet Fanöinylö Ò pöri ngam mahachohlen Yēsū nö ṙā-ang i yip tö kapah nö iyöng in yīö ngaich anga-aṅ ngam mahachohlen Kristū Yēsū nö ṙā-ang yip tö kapah alaha yīö min nö, lökten im Töhet Fanöinylö ngam mi-iyöng in yīö.

¹²Kahōlö: tö höt ëhevö in, rö-ö nö im alaha, öi lök lōn ngam alaha.

¹³Pò yīö, yē yīö lök lōn ngam alaha, kapah takô min yī-ö; yē yīö pöri, lökten im Töhet Fanöinylö, fëlngö nup la-en ngam alaha, aṅ min yī-ö.

¹⁴I tumtak yip tö hachōḵo tö ngam Töhet Fanöinylö ngam Tēv, acha-a yip kūön ngam Tēv.

¹⁵Pò yīö öt kēḵ lōn ngam inkövö hēk, öi pa-ekūö; kēḵ ngam lōn kūön pöri yī-ö, löknyô yīö ngö ṙô, Appa, Kayöngö.

¹⁶Hol lōn hī an ngam Töhet Fanöinylö nö eū-a, tö hī kūön ngam Tēv;

¹⁷Ngaich yē hī kūön, ngaich tö amīnuvö: tö amīnuvö töm Tēv, hol Kristū tö amīnuvö, yē hī sā Ò kihngen, hòṅ hī inrē hapōilöngö hol Ò.

¹⁸Öt kaheūktö në kanihngen chin töngamuh, nö hanṙongten min nö im kanôlò, ngam tö hameuktu min nö in hī.

¹⁹Pò në tö vīlöngö nö meūka takô, hökkö inmeuktö vē kūö ngam Tēv.

²⁰Pò në tö vīlöngö nö öt teungten; öt kūö lōn u, tön kūö lōn Ò pöri ngam mahalēn.

²¹I mineūkkö ṙinānyö në tövīlöngö, nö ṙā-ang im inkövö öt kanôlò, nö im inkôlò ṙinānyö vē kūö ngam Tēv.

²²Pò hī akahalōn tö në taṙòkhöre tövīlöngö nö ayôkö chanököre, söl ing töngamuh.

²³Rö-ö nöng anū-ö; tön ayī-ö inrē öi tö īnu tö ranehlòng ngam Töhet Fanöinylö, ayī-ö inrē, ellōnre inyôṙö, hökkö inrūköre öi kūön Ò, ngam ṙinānyö në alaha hī.

²⁴Pò hī hayöökaṙen lökten im mineūka; achīö ṙöng ap ṙung mameūkkö tömeūkö?

²⁵Yē hī pöri meūkkö ngam töt meukö tö hī, ngaich ayī-ö holtö manöiyöre hökkö e.

²⁶Ngatī inlahen an inrē ngam Töhet Fanöinylö nö holṙen öt kumlēḵ hī: pò hī öt akahalōn töp ṙôre ve-ekūötēv, sā hinôtö hī; ngaich pöri ngam Töhet Fanöinylö nö ve-elkui hī hol tö inlöinyöre, nup töt hankônyen nö ṙô.

²⁷Ngaich ngam chamöh ellōn nö akahalōn tö kuilōn ngam Töhet Fanöinylö; pò Ò nö ve-elkui yip töhet nö asā lōn ngam Tēv.

²⁸Akahalōn ayī-ö tö e nö in cha yip töhāngenlōn töm Tēv, holre nö ṙòkhöre nö vī tölöök, in cha inrē yip tö havëtu nö sā ap chööḵnyö Ò.

²⁹Kūö cha Anga-aṅ nö urĕhten mikahlōn, ngaich urēhĕng tī nö halēnngen, nö hateungtu i insā-a ngam Kūön Ò, pòn hōtu Anga-aṅ nö lanòh yip tö maṙôngö holre:

³⁰Yip mu-urĕhngö inlēnngen tö Ò, cha-a inrē tö havëtu tö Ò: yip tö havëtu tö ò, cha-a tö halööklöngö inrē tö Ò: yip tö halööklöngö, cha-a inrē tö hakôlöngṙô.

³¹Sitih ṙô öi pökeh min tö në? Chiāp lā-al hī yē ngam Tēv nö in hī?

³²Anga-aṅ ngam töt ṙamā-al ngam Kūönre takô, kēḵngen Ò pöri nö pòkūö hī ṙòkhöre, röh ang min nö hol Ò nö öt maiṅtīre nö kē-ĕkūö hī tö taṙòkhöre?

³³Achīö ap min mī-i vē katöllö ngam Tēv tī tö fālen? Ngam Tēv An mahalöökhölö.

³⁴Achīö ang anga-aṅ min töt mahakôlò; Kristū Yēsū an ngam tö kapah; hôṅ ngam tö hachohlöngö nö ṙā-ang yip tö kapah, ngam lahāmö ngam Tēv, ngam vame-elkui hī inrē.

³⁵Achīö min mahaköhngen hī tö ngam hanāngenlōn Kristū? Yöng kanihngen hòng, hēk miṙivlōn, hēk öt inkôlò, hēk inyāichö, hēk linchôyö, hēk kanihngen i pinlāḵngen, hēk sanët?

³⁶Sā kinūichngö e nö ngö, Pòkūö meh in sumkāmu finëlngö; Kaheuktu in sā pököre tö ṙatnyu likeun.

³⁷Hö-ö, mötlö in tö tömihôiṅ in u nö ṙòkhöre lökten in Ò ngam tö hāngen tö hī.

³⁸Tön mikahtulōn chin tö e nö “ötrēhĕn ngam kinpaha, öt rēhĕn nômö, öt rēhĕn ma-ahanga, öt rēhĕn pūlngö, öt rēhĕn në töngamuh, öt rēhĕn nup yamih, öt rēhĕn minhôinyö.”

³⁹Öt rēhĕn rò-òlòng, öt rēhĕn ṙū-uti, ötrēhĕn nup tahëng tö vīlöngö, nö kô min nö haköhngen hī tö ngam hanāngenlōn ngam Tēv, ngam in Kristū Yēsū ngam Mā hī.