Read Car_Nicobarese RŌMA 9 Bible Online

RŌMA 9 - Car_Nicobarese bible

RŌMA 9

¹Ṙô tö ngam kanô-en chin in Kristū, öt minyôiny-aṅ chin, hol chu an ngam inkahngen kuilōn chu nö eū-a im Töhet Fanöinylö,

²Tö chu öich kiröngen in tö miṙivlōn, öt ṙākenre inrē öp chanökö ellōn chu.

³Pò chu yik hòṅ Anatama ṙā-ang in Kristū tö kūö yip holre, yip hanöngkisānö chu nö sā ngam alaha.

⁴Yip aṅ Israĕl; yip tö inrukluvö, tö kanôlòvö, minë chöngö inrē, ngam kinëtö chöngö inrē, ngam linökö la-en ngam Tēv inrē, tö minë kinlēḵngô;

⁵Tömuvöhnguvö tö yik lökngörit Kristū nö sā tarik, ngam i kui taṙòkhöre, tökôlò Tēv örheūheu. Āmen.

⁶Öt sā töt teungtökūö pöri nö yih ngam Tēv. Pò cha nö öt ṙòkhöre nö Israĕl, yip aṅ Israĕl:

⁷Öt rēhĕn nö ṙòkhöre nö kūön, nö pò cha nö kūön ök kūön Aprahām: tön in Isak invëka yip kūön meh min.

⁸Ngam tö ngö, rö-ö yik nö yip kūön ngam alaha nö kūön ngam Tēv; yip kūön ngam kinlēḵngô pöri kaheuktu nö kūön.

⁹Pò ngih nö ṙô ngam kinlēḵngô, Sā ngih ṙētak Chin min yih, ngaich Sārai min nö kūönu tö kikōnyö.

¹⁰Ngaich rö-ö nöng ngatī; tön pirūkö nyīö Repeka tö tī ök tö hĕng tak, ök yöng hēḵ Isak

¹¹Pòn öl nö fötnyu, öt rēhĕn nö kēken tölöök, hēk töchōich, hòṅ ngam chööḵnyö ngam Tēv nö köp, sā ngam kintöllö, öt aṅ i la-en, aṅ in Ò pöri ngam mahave-eti,

¹²Ngö ök yih ṙô ik kikānö, Kūönkūö ngam ṙālö öp min maṙöinylö.

¹³Sā kinūichngö e nö ngö Hāngenlōn chin tö Yāköp, surīkhen Isô pöri chu-ö.

¹⁴Sitih ṙô öi pökeh? Öt lanööku hòng im Tēv? Öt halöng an ngam Tēv.

¹⁵Pòn ngö ṙô Anga-aṅ tö Môsös, Aheūkölōn chin min ip chūökre aheūkölōn, aṙē-ĕlōn Chin min inrē ip chūökre aṙē-ĕlōn.

¹⁶Lökten e nö öt aṅ in ò öp tö hòṅ lōnu, öt rēhĕn nö aṅ ò öp famal, tön aṅ im Tēv ngam tö-aheūkölōn.

¹⁷Pò ngam töhet līpöre nö ngö ṙô tö Fërō, Angū-ö ön ngih chööḵnyö chu takô hachohlen meh, pò chu hòṅ hameuktö minhôiṅyöre in meh; hòṅ ngam minënyö Chu inrē nö ahangka nö el kahôyö i në taṙòkhöre panam.

¹⁸Hòn aheūkölōn Anga-aṅ ip chūökre nö lōnuvö, ip chūökre inrē nö hòṅ hangë-eng.

¹⁹Ngaich hòṅ ngö ṙô me-eṅ tö Chu, Kūyòh ang nö ṙòngmö chöh fālen? Achīö ṙöng ap lamakngö ngam lōn Ò?

²⁰Hö-ö, achīö ṙöng öm me-eṅ, Ō tarik, öm samapṙô lā-al ngam Tēv? Ngö ṙô öng min ngam tövī-i tö Ò ngam vamī-iṅl e, Kūöyòh Öm ngatī tī vī-i chu?

²¹Hēk, röh ang ngam vamī tanīönyö nö kanahaiṙen nö im tilin, nö hĕng lā vahī tö tölöök tanīöyö, nö im tö hĕng mumūlö, ngaich chōich ngam tahëng?

²²Sitih öre yē ngam Tēv nö hòṅ hameuktö lanīnöre, ane inrē vīten ngam minhôiṅyöre nö im chehen lanīnö tö hakaptu nö im öt inkôlò;

²³Hòṅ Ò inrē, nö mikahtölōn, tö ngam vanāyö Ò, nö i nup chehen neūkölōn, nup tö halēni misī nö lā urĕh tö Ò, nö im kanôlò,

²⁴Ihö, öi tö havëtu tö Ò, öt höng ṙa-ang i yip Yahūti, tön ṙā-ang i yip Tahëng mihëṅṙö inrē tarik?

²⁵Sā ṙô Ò inrē nö in Hōsī, Havëkö vē chin min tarik chu, vē töt tarik chu misī; ngam hanāngen Ò inrē, ngam töt- hāngen misī:

²⁶Ngaich angū-ö min nö ip chūök e nö ngö ṙô tö cha, Rö-ö yin yīö tarik chu. In e cha-a min nö havëka nö kūön ngam Tēv.

²⁷Ngaich Isayā nö ngö ṙô nö in Israĕl, Yē ṙôken yip kūön Israĕl nö sā kuyāyö ngam mai, höng yip chööḵ min tö hayöökaṙen:

²⁸Pò ngam Mā Tēv min nö kēken ngam ṙôre nö ing panam, keuheūtngen e, ane inrē rökngö ṙôta e.

²⁹Ngaich sā ṙô Isayā misī, Yē ngam Mā Tēv yip töma- ṙôngö nö öt ṙātö kūön nö in hī, ngaich ayī-ö öre höng sā Sôtòm, sā Kômòra öre inrē misī.

³⁰Sitih ṙô öi pökeh? Tö vë Tahëng, mihëṅṙö tarik, nö sölta nö im lanöökö, vē töt tamömrit lanöökö, ngam aṅ im mikah lanöökö.

³¹Ngaich Israĕl nö tömrit ngam chöngö lanöökö, öt sölta pöri nö im chöngö.

³²Pòyòh? Pò cha nö öt chöhö e nö lökten i mikah; sāre pöri yĕn lökten i la-en. Kavē-ĕre cha-a ngaich nö im ihong kinvēngöröön:

³³Sā kinūichngö e nö ngö, Yĕh meuk, i Sīyôn tī chin ṙātö öp ihong kinvēngöröön, ane inrē ihong lökngövah: anga- aṅ ngòh ṙamātö ellōnre nö in Ò, öt sirōngkūö min.