Read Car_Nicobarese 1 KÒRIN 1 Bible Online

1 KÒRIN 1 - Car_Nicobarese bible

1 KÒRIN 1

¹Pôl, töhavëtu nö tanīnöṙô Yēsū Kristū, lökten i lōn ngam Tēv, Sòstēnēs inrē ngam hol hī,

²Löö im māṅ ngam Tēv i Kòrin, cha-a yip tö ahetlöngö nö in Kristū Yēsū, töhëtö-invëka, ṙòkhöre, hol tö yip mahavëkö mine-eny ngam Mā hī Yēsū Kristū, keuheūtngöre chūök, ngam Mā hī tö cha.

³Inlōnti yēḵ in yīö, kumchikṙen inrē aṅ im Tēv Yöng hī, ngam Mā inrē Yēsū Kristū.

⁴Örheūheu chin ha-öiny ngam Tēv, tö pòkūö yīö, pò ngam inkôlò aṅ im Tēv, ngam tö kētu nö in yīö, lökten in Kristū Yēsū.

⁵Pò yīö i taṙòkhöre in Ò pōyen kanôlò, i nup ṙô yīö, nup mikah inrē;

⁶Lökten ngam ineūkö Kristū nö köp nö in yīö.

⁷Ngaich öt hēngö hanāṅten yī-ö tö inlōnti, yī-ö hamökkö inmeuktö ngam Mā hī, Yēsū Kristū.

⁸Ngam mahangëken yīö min söl ip manāngen, hòṅ yīö öt vinëkuvö min ip sakāmö ngam Mā hī, Yēsū Kristū.

⁹Tökô-en an ngam Tēv, ngam talöökö yīö havëtu im innôlö ngam Kūön Ò, Mā hī, Yēsū Kristū.

¹⁰Kahōlö, ve-ekūö yīö chin töngamuh, lökten i ngam mine-eny ngam Mā hī Yēsū, hòṅ yīö ṙòkhöre hĕngre ṙô, hòn öt inrēvngörevö nö in yīö; hòṅ yīö pöri teung öi mūl im töhĕng ellōn, ngam töngatī inrē inkaha.

¹¹Tön ngaich an nö hameuktu nö in chu, ngam inlahen yīö, yī-ö hol chu, tö cha yip aṅ patī Kolō, tö yīö lā-alkūöre.

¹²Angū-ö ön ngih ṙô chu, pò yīö kö ngö ṙô, Aṅ in Pôl chin chū-ö; aṅ in Apòlòs chin chū-ö; aṅ in Kīfas chin chū-ö; aṅ in Kristū chin chū-ö.

¹³Harēvöre ang Kristū? Harātu ang Pôl tö kūö yīö? Hēk, i mine-eny Pôl öi vōkö?

¹⁴Ha-öiny ngam Tēv chin, pò chu öt hĕng tak vahōk tö yīö, höng Krispas, Kaiös inrē;

¹⁵Hòn öt tarīkuvö tö ṙô-òv, tö yīö vōkö i mine-eny chu.

¹⁶Vōk yip aṅ patī Satēpanas chin inrē; öt akahalōn chin yē chu vahōku tö tahëng.

¹⁷Pò chu öt vamôk tīntu tö Kristū, ahangkö ngam tölöök inhānga pöri: öt ip huneū-euṅ ṙô, hòṅ ngam töhakālö Kristū, nö öt hachöki alaha.

¹⁸Pò ngam ṙô ngam töhakālö nö löö in cha yip kūö kumlō-ov nö öt kôlò; minhôiṅyö ngam Tēv pöri nö in hī, ayī-ö töhayöökaṙen.

¹⁹Pòn ngö kinūichngö, Piyāingö mikah yip tö-akaha chin min, sōḵo ngam chanöh mikah yip chamöh mikah chin min inrē.

²⁰Isuh ap tö-akaha? Isuh ap kamūich? Isuh ap kamilṙô ing panam? Röh ang ngam Tēv nö vītö kumlō-ov nö mikah ngih panam?

²¹Pòn im mikah ngam Tēv, lökten im mikahre ngih panam, nö öt akahakūö töm Tēv, kūö lanöökö lōn ngam Tēv an, lökten i kumlō-ov ngam inhānga, nö hayööken cha yip ṙamātö ellōnre.

²²Pò vē Yahūti nö havëkö minkahngö, chöh mikah vē Krīk:

²³Ahangken, Kristū pöri īhö nö harātu, vanāichö i yip Yahūti, kumlō-ov inrē i yip Tahëng mihëṅṙö;

²⁴Kristū pöri minhôiṅyö ngam Tēv, mikah ngam Tēv inrē, in cha yip töhavëtu, hēnghöre Yahūti, Krīk inrē.

²⁵Pò ngam kumlō-ov ngam Tēv nö mötlö tö mikah tarik; ngam öt kumlēḵ ngam Tēv inrē mötlö tö kumlēḵ tarik.

²⁶Kahōlö, yĕh meuk ngam invëkö yīö, öt ṙōl tak tö-akaha ing alaha, öt ṙōl tak tö mihôiṅ, öt ṙōl tak tö tulöng minā-aṅ nö in e.

²⁷Nup tökulō-ov pöri aṅ ngih panam katöllö ngam Tēv, pòn hòṅ sumrōngngökūö nup tökalēḵ Anga-aṅ;

²⁸Nup yāich ing panam, nup tö sōḵov inrē, katöllö ngam Tēv, nup törö-öv inrē, pòn hòṅ harööḵngen nup töngöh Anga-aṅ:

²⁹Hòn öt tarīkuvö ameū-euṅre nö i kūö ngam Tēv.

³⁰In Ò pöri yī-ö in Kristū ngam tövītu nö mikah ngam Tēv nö in hī, lanöökö, inhetlö, ṙinānyö inrē:

³¹Hòn sā kinūichngö e, Ngòh ameū-euṅre, hökngen ò nö im Mā Tēv ineū-euṅ.