Read Car_Nicobarese 1 KÒRIN 10 Bible Online

1 KÒRIN 10 - Car_Nicobarese bible

1 KÒRIN 10

¹Kahōlö; sōten yīö chin öt akahalōn tö yik muvöhngö hī misī, nö ṙòkhöre nö el katòh ök taṙul; ṙòkhöre nö lök elmai;

²Ngaich ṙòkhöre inrē nö vōkö nö in Môsös, nö el taṙul, el ök mai inrē.

³Ngaich ṙòkhöre inrē nö nyā nuk aṅ i töhet nya-aṅkūö; ṙòkhöre nö òk aṅ i töhet òk:

⁴Pò cha nö òk aṅ ik töhet Ihong ök tamömkörit cha; ihong ök anga-aṅ nö Kristū.

⁵Ṙōltak pöri tö cha yik töt ṙanāmölōn ngam Tēv; ngaich cha-a nö kavāli nö elinchōn.

⁶Insā nun anū-ö, nö in hī, pò hī sōtu hāngen tö tötlöök, öi sā hanāngen cha cha-a.

⁷Uh yin rēhĕn vamë-ekūö insātēv, sā yik rīkre tö cha, sā kinūichngö e nö ngö, Ūichngöre yin më tarik nö nyā, òk inrē, ngaich choholre nö nyamtô.

⁸Uh in rēhĕn chamô-òṅkānö sā yik rīkre tö cha; ngaich yik tö kahuksīön michöömö lūöi köṅny tarik nö hĕng sumkam nö kapah.

⁹Uh in rēhĕn kalah manöinyö ngam Tēv, sā yik rīkre tö cha; ngaich lëlngö tö kūö pēch.

¹⁰Uh yin rēhĕn milöh minuhre, sā yik rīkre tö cha; ngaich halëli tö ngam mahalëlhanga.

¹¹Ngaich nun yih anū-ö nö in cha nö insā; kūchīyö anū-ö inrē, hinôtö hī milak, ayī-ö tö ikūyu töp manā-aṅ sakāmö.

¹²Lökten hökngen ngòh tököp tölōnre, nö haṙēmngenre, hòn öt fukngö!

¹³Öt kinlahavö yin töp tö möthë tö kanô-òṅ tarik. Tökô-en pöri ngam Tēv, ngam töt hō nö halöngten yīö, mötlö kinlaha, tö kanô-òṅ yīö; hē ngam kinlaha min Anga-aṅ nö vītö talöökö öt kanô-òngvah, hòṅ yīö kalēḵ keūnö e.

¹⁴Kahōlö, lökten ṙuhöngre töm vinë-ekūö insā tēv.

¹⁵Sā ṙôre chin i tö-akaha tarik; ngëichkö minë ṙô chu yin.

¹⁶Ngam kulah inkôlò, ngam hakôlò ih, röh öng nö inmūlkūö im Mahām Kristū? Ngam ròtī fahòk ih, röh öng nö inmūlkūö nö im Alaha Kristū?

¹⁷Yĕh meuk, tö hī öi tömaṙôngö, höng hĕng ròtī, hĕng alaha; pò hī ṙòkhörekūö tö ngam tö hĕng ròtī!

¹⁸Yĕh meūkö aṅ Israĕl nö tarik: röh aich nö cha-a nyamā nup tökētu inmūlkūö el ngam tahāklö?

¹⁹Sitih ṙô öichpökeh? tö kô nup tökētu nö i insātēv, hēk tökô nup insātēv?

²⁰Nup tökētu pöri tö yip Tahëng mihëṅṙö, kētö u cha-a nö i sī-ö, öt i ngam Tēv: ngaich sōten yīö chū-ö hamūlkūöre tö më sī-ö.

²¹Ötkô yin òk kūö ngam kulah ngam Mā, ngam kulah më sī-ö inrē: ötkô yin holkūö i ngam mīs ngam Mā, i ngam mīs më sī-ö inrē.

²²Harunnyö kumnyahlōn ngam Mā ṙöng öi? Mötlö kumlēk öi ayī-ö tö Ò Anga-aṅ?

²³Ṙòkhöre nun nö tösā chöngö, öt ṙòkhöre pöri nö löök. Ṙòkhöre nun nö tösā chöngö: öt ṙòkhöre pöri nö harukhölö.

²⁴Un tarīku yēḵ töng chamöh kanahngenre, inkôlò ngam holre pöri.

²⁵Nya-aṅvkūö tö nup töng inyihka nö i chūök ṙinatnyö likeun, un hatön, chööḵöiny tö ngam kuilōn.

²⁶Tön tumlat ngam mā ön ngih, nup tanööḵlö e inrē.

²⁷Yĕn hĕng tak tö cha öp töt ṙamātö ellōnre, nö ngöönten yīö i nyina-aṅ, ngaich yī-ö hōḵ kiröönngöre; nya-aṅvkūö tö nup töng silôtu nö i kūö yīö, un hatön, chööḵöiny tö ngam kuilōn.

²⁸Yĕn tarīkuvö pöri tö ngö ṙô tö yīö, Tökētu an taheui ngamuh nö i tökētu; un nya-aṅvkūö, chööḵnyö tö ngam mameuk, chööḵnyö tö ngam kuilōn inrē.

²⁹Ngam kuilōn, ṙô chu, rö-ö nö kuilōn meh, tön yip tahëng; kūöyòh ṙöng öng ngam kanahngen chu nö uyëka tö kuilōn tahëng.

³⁰Yē chu hamòl lökten im inlōnti, kūöyòh öich chōchö ineūka, tö kūö e ngam ha-öiny tö chu?

³¹Lökten yē yīö nya-aṅvkūö òk, hēk nup töng vahīken yīö, vīken u nö ṙòkhöre nö kanôlò ngam Tēv.

³²Un kētu löktö sanānngö, un rēhĕn i Yahūti, Krīk, hēk im māṅ ngam Tēv:

³³Sā chu chū-ö inrē haṙamlōn tarik i tö keuheūttöre, öt lukkö kanôlòre, tön ngam kanôlò tömaṙôngö, hòṅ cha nö hayöökaṙen.