Read Car_Nicobarese 1 KÒRIN 11 Bible Online

1 KÒRIN 11 - Car_Nicobarese bible

1 KÒRIN 11

¹Ma-asīnken chu yin yēḵ yī-ö, sā chu chū-ö inrē tö Kristū.

²Eū-eu yīö chin töngamuh, pò yīö afēken chu i tökeuheūttöre, ngaich inrē köpötī tö minë fālen, sā kinëtö u tö chu nö in yīö.

³Hōten yīö pöri chū-ö akahalōn tö Kristū nö kö kui tarik kikōnyö; ane inrē kui ngam kikānö ngòh kikōnyö tarik; ane inrē kui Kristū ngam Tēv.

⁴Ngòh kikōnyö tarik kamhul kuire yĕn ve-ekūötēv, mikahten inrē, öt miyich tö ngam elkuire.

⁵Ngòh kikānö pöri töt kamhulkuire yĕn ve-ekūötēv, mikahten inrē, öt miyich tö ngam elkuire: hĕng an angū-ö, hĕngren inrē nö sā ò öre yĕn kuhāki.

⁶Pò ngam kikānö yĕn öt kahūlö kui, hökngen ò ngaich nö kamööpi: yē e pöri nö sinrōngkūö ngam kikānö nö kamööpi, hēk kuhāki, hökngen ò yēḵ nö kui.

⁷Kô an ngam kikōnyö nö ötkô nö kahulkuire, pò ò nö uroh, nö insā ngam Tēv, ineū-euṅ inrē: ineū-euṅ ngam kikōnyö pöri ngam kikānö.

⁸(Pò ngam kikōnyö nö öt aṅ i ngam kikānö: tön ngam kikānö aṅ im kikōnyö:

⁹Pòn ötrēhĕn ngam kikōnyö nö vīlöngö, nö chööḵnyö töm kikānö; tön ngam kikānö nö tö chööḵnyö tö ngam kikōnyö:)

¹⁰Angū-ö an lökten kikānö nö hòṅ minkahngu tö inyöngö nö i kui ò, kūö ma-ahānga.

¹¹(Ötrēhĕn pöri ngam kikānö nö kô nö öt īnu töm kikōnyö, öt kô ngam kikōnyö nö öt īnu töm kikānö, nö im Mā,

¹²Pòn sā ngam kikānö nö aṅ im tarik, ngatī ngam kikōnyö inrē nö lökten ngam kikānö: ṙòkhöre pöri nöng aṅ im Tēv.)

¹³Ngëichkö e yin yēḵ yī-ö: tölöök öng angū-ö yē ngam kikānö nö öt kahūlökui nö vë-ekūötēv?

¹⁴Röh ön ngam fehe nö haköpten yīö, tö e nö sinrōngkūö ò, yē ngam kikōnyö nö marô-òl keūyö?

¹⁵Yē ngam kikānö pöri nö marô-òl keūyö, ngaich ineū-euṅ ò angū-ö: pò ngam keūyö ò nö kētu nö kinṙulkui ò.

¹⁶Yĕn tarīku pöri lamā-al kūöre, öt kūyu in tö töngatī, öt rēhĕn ngam māṅ ngam Tēv.

¹⁷Rö-ö chin ha-öinyö yīö, i chu kētö ngih chöngö, in yīö; pò yīö hamūlöre, öt ṙanūölen yīö, ṙanūöngen pöri.

¹⁸Ngih ön mu-urĕh; hāngö yīö chin harēvöre, yē yīö öi hamūlöre; ngaich haköpö e hö-ö chū-ö,

¹⁹Kô yin inrē īnuvö tö maharēvngöre; hòṅ cha yip töhōḵovö aṅ in yīö nö hameuktuvö.

²⁰Lökten yē yīö hamūlöre, ötkô yī-ö nyā ngam inmūlkūö ngam Mā;

²¹Pò yīö mu-urĕh tökūöre nyā tö ngam tahëng; ngaich hĕng taka ngam tökapahre, ngaich hiyōi ngam tahëng taka.

²²Sitih? Öt patī-ivö öyih tö chūökre nyā, òk inrē? Hòṅ hayëḵngen vē māṅ ngam Tēv öyih? Ngaich sumrōngngökūö cha vē töt nyamā? Sitih ṙô öich min tö yīö? Ha-öinyö yīö öich in e? Hö-ö chin ha-öinyö yīö.

²³Pòn taneūngen chu nö aṅ im Mā, ngam kahëtö chu inrē in yīö, inlahen ngam Mā Yēsū, ik hatööm kine-eṅ Ò, nö kē ròtī.

²⁴Keuheūthëṙô anga-aṅ, nö ha-öiny ngam Tēv; ngaich fôkö e, ngaich ngö ṙô, Alaha Chu ön ngih, ngam pòkūö yīö: ngatī tī pöichö inköpkö lōn yīö tö Chu.

²⁵Ngatī tī inrē Anga-aṅ tök kulah, tö kinheūṅten nyina-aṅ, nö ngö ṙô, Tufömngöre ön ngih aṅ ngih kulah kinlēḵngô i mahām chu. Ngatī tī pöichö, i tumheuh yīö ôkö e, inköpkö lōn yīö tö chu.

²⁶Pòn i tumheuh yīö nyā ngam ròtī, òk ngam aṅ ngam kulah inrē, hameuktö ngam kinpaha ngam Mā yī-ö, hanöngö saha yanihihh ò.

²⁷Yē ngòh nyamā ngam ròtī, òk aṅ ngam kulah ngam Mā, nö öt milēḵṙen, köölö fālen anga-aṅ ngaich nö im Alaha Mahām ngam Mā inrē.

²⁸Hökngen ngòh tarik pöri nö hatönköre; ngaich möl pöchö nö nyā ngam ròtī, òk aṅ ngam kulah inrē.

²⁹Pò ò anga-aṅ nyamā, òk inrē, nyā, òk öt inkôlòre inrē, yē ò nö ötakah ngam Alaha ngam Mā.

³⁰Angū-ö an lökngen yip töpōyen in yīö, töt kalēḵ alaha, vahavö inrē, röön öt pōyen tökapah inrē.

³¹Yē hī pöri akahare, ngaich öt kahòkkaṙen ayī-ö min.

³²Yē hī pöri töngamuh kahòkkaṙen, chöken ayī-ö tö ngam Mā: hòṅ hī öt im öt inkôlò anòngngen ngih panam.

³³Kahōlö, yē yīö hamūlöre nyā, hökken höö.

³⁴Yĕn hĕn tak öp tökapahare, hökngen ò nö nyā nö i patī, hòṅ ngam inmūlö yīö, nö öt kamëtö öt inkôlò yīö. Halēn nup tahëng chin min, yē chu yih.