Read Car_Nicobarese 1 KÒRIN 13 Bible Online

1 KÒRIN 13 - Car_Nicobarese bible

1 KÒRIN 13

¹Yē chu öre huveū-euṙô tö ëlô taṙòkhöre tarik, ma-ahānga inrē; rö-ö īnu tö hanāngenlōn, ngaich chū-ö höng sā töpōitô takōngö, hēk töparānga kungkurū.

²Yē chu öre īnu tö huneū-euṅ ṙôre mikahten; akahakūö inrē tö nup taṙòkhöre öt mikahkūö sin, taṙòkhöre inkaha inrē; ane inrē yē chu īnuvö tö taṙòkhöre mikah, ngaich öre öich kēngö rôngö; öt īnu pöri tö hanā-ngenlōn, höng töng rö-ö chū-ö.

³Yē chu öre keuheūttö inlānenre öich ha-aṅhaṅl yāich. Yē chu öre hökngen ngih alahare nö föngi; öt īnuvö pöri tö hanāngenlōn, öt kôlò chū-ö tö kūö e.

⁴Tömarô-òten manöiyö an ngam hanāngenlōn; tö aheuk inrē; öt tökumnyahaṅv elmat an ngam hanāngenlōn; öt ameū-euṅre an ngam hanāngenlōn; öt hakeūṙöre;

⁵Öt siṙakngenre an; öt chöh kanôlòre an; öt harunnyö lanīnöre an; öt afēken inyëḵngenre an.

⁶Öt ṙāmölōn nö i tötlöök; ṙāmölōn pöri nö i tökô-en.

⁷Ṙap tökeuheūttöre; öt ranöingulōn i tökeuheūttöre; meūkkö tökeūttöre: pītnyöre i tökeuheūttöre.

⁸Öt chanūhuvṙen an ngam hanāngenlōn. Chuhngöre pöri min në minkahten; ṙāngöre në ëlô; chuhngöre min ngam inkaha.

⁹Pò hī höng hĕng lā mikahlōn, ngaich hĕng lā ṙô mikahaten.

¹⁰Hē yanihihh ngam töteung pöri, ngaich chuhngöre min ngam tö hĕng lā.

¹¹Hē chu misī nyīö, sā lōn nyīö chū-ö; ngaich yih chū-ö, pōyö töngamuh, ngaich ṙāngö nuk inlahen nyīö chū-ö.

¹²Höng paṙūöyamat in töngamuh ngëichkö kūöre i tö-ayānga: havööhen höökūö pöri min môkö ayī-ö. Hĕng lā mikahkūö chin töngamuh; môkö pöri min chū-ö akahakūö takô, sā inkaha chu.

¹³Töngamuh pöri nö ngöhöre yēḵ ngam mikah, mineūka, hanāngenlōn, anū-ö tölūö; ngam hanāngenlōn pöri tö möthë tö u.