Read Car_Nicobarese 1 KÒRIN 14 Bible Online

1 KÒRIN 14 - Car_Nicobarese bible

1 KÒRIN 14

¹Tömkö ngam hanāngenlōn; kalēḵĕlōn pöri tö inlōnti aṅ i töhet, möthë hòṅ yīö mikahten.

²Pò ngòh tö ṙô tö tahëng ëlô nö öt ve-ekūö tarik, höng ngam Tēv: pòn öt tarīku tö akaha-elnang; ṙô tö nup öt mikahkūö pöri anga-aṅ nö im ma-alaha.

³Ngòh mumkahten pöri, ṙô tö inruk nö i tarik, inngëkö, inṙamlōn inrē.

⁴Anga-aṅ ngòh tö ṙô tö tahëng ëlô höng harūköre; ngam mumkahten pöri, haruk ngam māṅ.

⁵Ṙòkhöre lōn chin tö yīö ṙôtö tahëng ëlô, möthë pöri tö yīö mikahten: pōyö an ngam mumkahten tö ngam tö ṙô tö tahëng ëlô, höng vënyö manah anga-aṅ, hòṅ ngam māṅ nö teūngen tö inrukre.

⁶Kahōlö, yē chu pöri töngamuh yih in yīö, ṙô tö tahëng ëlô, asuh ap kanôlò yīö tö tī chu, yē chu öt ṙô-òv lökten i inmeukti, hēk mikah, hēk minkahten, hēk inköphöti?

⁷Pòrô nup töt unhômu ṙung, ngaich nöng ṙô-òv, fanöö, hēk ranöng, yē u nö öt kö i ëlôre ṙô nö ip pööinyṙôre, sitih inkaha öp min yĕn töfööṙö, hēk röngö.

⁸Pò ngam fanöö öre nö öt lēnö ṙô, ngaich achīö öre mahalēnöre nö im kinyūngö?

⁹Ngatī inrē yī-ö, yē yīö öt ṙô tö tölööṙen inkaha ṙô, sitih inkaha öng öre ngam töṙônyu? Höng ve-ekūö kuföt yin yih min ngaich.

¹⁰Ṙōlkangen nup ëlô ing panam, öt hĕng töt minkahngu.

¹¹Yē chu öt akaha elnang tö manah nup ṙô, ngaich chū-ö im tö ṙô-òv höng sā aṅ el inchōn, ngaich ngam tö ṙô-òv inrē nöng sā aṅ el inchōn nö in chu.

¹²Ngatī inrē yī-ö kalēḵĕlōn tö aṅ i töhet inlōnti, lūka yin hòṅ yīö pōyen aṅ in tö inruk ngam māṅ.

¹³Lökten hökngen ò ngòh tö ṙô tö tahëng ëlô nö vë-ekūötēv, hòṅ ò nö ve-eny manah.

¹⁴Yē chu vë-ekūötēv ṙô tö tahëng ëlô, ngam ma-alaha chu vamë-ekūötēv, öt ṙôngu pöri ngam mikah chu.

¹⁵Asuh öng pökeh? Hòṅ hol tö ngam ma-alahare chin vë-ekūötēv, hòṅ hol tö ngam mikahre chin inrē vë-ekūötēv; hòṅ hol tö ngam ma-alahare chin tikökṙôre, hòṅ hol tö ngam mikahre chin inrē tikökṙôre.

¹⁶Lökten yē meh holtö ngam ma-alaha hakôlò, ngaich sitih lökten min ngam töthuveū-euṙô nö ṙô tö, Āmen, ip hē meh ha-öiny; tö ò nö öt akaha elnang tö ṙô meh?

¹⁷Pò meh kô-en löökö ṙô ha-öiny, rö-ö pöri ngam tahëng nö haruklöngö.

¹⁸Ha-öiny ngam Tēv chin, mötlö huneū-euṅṙô chin chū-ö tö tahëng ëlô tö yīö ṙòkhöre:

¹⁹Lahë pöri chū-ö, tö tö söm köṅny ṙô i tahëng ëlô, höng taneui milôhò ṙô öich hol tö mikahre, el ngam māṅ, hòṅ chu haköptö tahëng.

²⁰Kahōlö, uh yin nyīö i ellōn; tëṅnö pöri i nup chanökhulōn; töpōyö pöri yī-ö i ellōn.

²¹Ngö kinūichngö an nö im chöngö, Lökten tarik tötohtöre ëlô ane inrē lökten i minuh tahëng chin min ve-ekūö vē tarik; öt hang ṙô chu pöri min cha-a pòrô nö ngatī, ngö ṙô ngam Mā Tēv.

²²Lökten nun në ëlô nöng minkahngö, öt in cha yip ṙamātö ellōn, i yip töt ṙamātö ellōnre pöri: minkahngö pöri ngam minkahten, öt i yip töt ṙamātö ellōnre, in cha pöri yip ṙamātö ellōnre.

²³Lökten yē ngam māṅ nö hamūltöre ngaich ṙòkhöre nö ṙô tö tahëng ëlô, ngaich yip tarik töt mahaköp nö yihtöre, nö umuh, hēk yip töt ṙamātö ellōnre, öt ngö ṙô yip min tö yīö öi tö kulō-ovö?

²⁴Yĕn ṙòkhöre pöri nö mumkahten, ngaich hĕng tak öp töt ṙamātö ellōnre hēk tötmahaköp nö yihtöre nö umuh, ngaich vëka tö cha nö ṙòkhöre, kahòkkaṙen anga-aṅ tö cha nö ṙòkhöre;

²⁵Hameuktu ngaich nup tö hayunngöre ellōn ò; ngaich lökten anga-aṅ nö fātngökūöre min nö afukngöre, ngaich salām ngam Tēv, vënyö ngam Tēv nö kô-en nö in yīö.

²⁶Kahōlö, asuh öng pökeh? Yē yīö mūlö yanihih, kö hēngö in tö salmai, īnu tö tahëng ëlô, īnu tö vine-eny manah. Hökngen u nö ṙòkhöre nö kēkaṙen nö inrukhölö.

²⁷Yĕn tarīku tö ṙô tö tahëng ëlô, nët tak yēḵ, hēk lūöi tak tölngö, eūlöre pöri; hökngen öp hĕng tak nö ve-eny manah:

²⁸Yĕn öt vamënyu pöri manah, un ṙô-òv anga-aṅ yēḵ nö el ngam māṅ; hökngen ò nö ve-ekūöre, ngam Tēv inrē.

²⁹Hökngen yip pròfĕt nö nëtô, hēk lūöi; ngaich hökngen yip tahëng nö akaha.

³⁰Yĕn hameuktu pöri ngam inmeukti nö im tahëng amūichhak, hökngen ngam raneh nö un ṙô-òv.

³¹Pò yīö ṙòkhöre kô-òren mikahten, hĕng hĕng tak, hòn ṙòkhöre nö haköp, ṙòkhöre inrē nö ṙūöhlöng alaha;

³²Ngaich yip ma-alaha yip pròfĕt, nö el katòh yip pròfĕt;

³³Pò ngam Tēv nö öt Tēv ötlanënen, kumchikṙen pöri, sā i nup Māṅ yip töhet.

³⁴Hökngen vē kikānö nö un kahòknyu nö el patī ngam Tēv; tön rö-ö an nö halöngtuṙen nö in cha ngam ṙinô-òv; hökngen cha pöri nö elkatòh, sā ṙô ngam chöngö inrē.

³⁵Ngaich yē cha nö hòṅ haköp, hökngen cha nö hatön yip pihöre nö i patī: tön sinrōngkūö an nö i kikānö, nö kahôkaṙô nö el chūök vine-ekūötēv.

³⁶Asuh? Lökngörit in meh chanuhu öng misī ngam ṙô ngam Tēv? Hēk, höng me-eṅ hòng tölööṙu tö e?

³⁷Yĕng tarīku pròfĕt tö lōnre, hēk, aṅ i töhet, hökngen ò nö akahalōn tö nup tö kūichtu tö chu nö in yīö, tö u nö chöngö aṅ im Mā.

³⁸Yĕn tarīku pöri töt akaha, hökngen ò nö öt akaha.

³⁹Lökten, kahōlö, kalēḵĕlōn tö ngam minkahten, un tahayö ṙô yip tö ṙô tö tahëng ëlô. Hökngen u pöri nö löökö kinëkaṙen, lēn inrē.