Read Car_Nicobarese 1 KÒRIN 16 Bible Online

1 KÒRIN 16 - Car_Nicobarese bible

1 KÒRIN 16

¹Yĕh pöchö, i inlahen nup tö hamūlö tö chööḵöiny tö yip māṅ, sā chöngö chu tö yip māṅ i Kiliki, ngatī yī-ö inrē.

²Im raneh sakāmö ngam sinat sumkam, kö kahngenre yin yēḵ hamūlhölö inrē, ip tölngö ṙôngôngre, hòn öt tö hamūluvö yē chu yih.

³Ngaich chalôhë chū-ö, ngaich kumtö līpöre min yē öp töng ahōḵo yīö, nö söömngö nup inlōnti tī yīö, nö i Yerūsalem:

⁴Ngaich yĕn löök angū-ö, tö chu chū-ö inrē kiröönngöre, ngaich in chu cha-a min.

⁵Yih chinri min in yīö, yē chu min lök Makētòni; pò chu lök Makētòni:

⁶Löhten chin min ngöh in yīö, ip sūng nö pòrô, hòṅ yīö ṙuhöngröön chu, ip töng kū-ö chu kinröönngöre.

⁷Pò chu öt hòṅ meukkūö yīö töngamuh, öich ranngöre; pò chu hòṅ ngöh rĕh rô-òten in yīö, yē ngam Mā nö halönghöten.

⁸Iyöng Efisös pöri chū-ö min hanöng saha öp Pentēkòstē:

⁹Pò ngam yöng inkūp nö ngaich nö löpnyökūö chu, ngaich maṙôngö yip tö kunyahaṅ elmat.

¹⁰Yē Timòtī pöchö nö yih nö in yīö, meūkan un pinhe-evkūö nö in yīö; tön la-evṙen ap tö la-en ngam Mā, nö sā chu chū-ö: un tarīku lökten tömiyëḵ tö ò.

¹¹Ṙuhöngröön ò pöri im kumchikṙen, im kinröönngö ò; hòṅ ò nö yih nö in chu; tön meūkken ò chin nö hol yip kisānö.

¹²I inlahen Apòlös pöri ap kisānö, kalēḵĕlōn chin hōten ò nö yih nö in yīö, nö hol yip kisānö: rö-ö an nö lōnu töngamuh tö yinihih; yih pöri min anga-aṅ yē ò nö löktuṙen.

¹³Höngöre yin, haköpöre im mikah; haṙongtöre yin sā tarik, hangëḵeṅre.

¹⁴Hökngen nup la-en yīö nöng i hanāngenlōn.

¹⁵Kahōlö, ve-ekūö yīö chin, akahakūö yin tö patī Satēpānas, tö e nö raneh nö ṙòng aṅ Akayā, tö cha inrē nö ngaich nö rultöre nö meukṙen yip töhet,

¹⁶Hòṅ yīö inrē elkatòh töngatī, ane inrē ngòh hamòlṙen nö im la-en nö la-evṙen inrē.

¹⁷Ṙāmölōn chin tö yanihihh Satēpānas, Fòtunatös, Akaikös inrē: pò cha nö meukṙen nup tö hāṅten nö in yīö.

¹⁸Pò cha nö hangëḵel ellōn chu, tö yīö inrē: lökten yin akaha cha yip tö ngatī.

¹⁹Salāmö yin tö yip māṅ aṅ Āsi, pōyen tī nā Akula nā Priskā nö salāmö yīö nö im Mā hol tö ap māṅ i patī cha.

²⁰Ṙòkhöre vē kisānö nö salāmö yīö. Kö salāmö höö yin hol tö töhet hināmökūö.

²¹Ngam sinlāmö tī chu chū-ö Pôl öich aṅtītö eltīre.

²²Yĕn tarikuvö töt hāngenlōn tö ngam Mā, hökngen ò nö Anatama. Maranata.

²³Holtöṙah yīö an yēḵ ngam inkôlò aṅ im Mā Yēsū Kristū.

²⁴Holtöṙah yīö an yēḵ ṙòkhöre ngam hanāngenlōn in Kristū. Āmen.