Read Car_Nicobarese 1 KÒRIN 3 Bible Online

1 KÒRIN 3 - Car_Nicobarese bible

1 KÒRIN 3

¹Ngaich chū-ö, kahōlö, öt kô ve-ekūö yīö sā ṙô aṅ i töhet sā tarik pöri, sā tëṅnö in Krsitū.

²Ha-aṅlöng yip tö chu tö aṅteh, öt hakā-a tö alaha; pò yīö misī öl kô; hö-ö, öt rēhĕn yin kô töngamuh;

³Pò yīö ṙòngmöng tarik, pò yīö īnu tö kumnyahṙen, linā-al kūö inrē; röh öyih tarik; ngaich lök i inlahen tarik?

⁴Pòn hĕng tak öp tö ngö ṙô, Aṅ in Pôl chin chū-ö; ngö ṙô öp tahëng, Aṅ in Apòlös chin chū-ö; röh öyih tarik?

⁵Asuh ang Apòlös? Asuh inrē Pôl? Mameukṙen, löktö yīö ṙātö ellōnre, kö i tī tö ellōnre, kö i tī ngam Mā nö kē-ĕkūö ò.

⁶Teūchhöti chū-ö, ṙösö tö Apòlös; ngam Tēv pöri kamëtö ṙôken.

⁷Lökten ngam tameūch nö öt tö rēhĕn, öt tö rēhĕn ngam ṙamös; höng ngam Tēv, ngam kamëtö ṙôken.

⁸Tö hĕng nan töm tameūch töm ṙamös inrē; kö teūngen pöri min tö raneushöre, sā ngam la-enre.

⁹Pò ih tö la-evṙen hamòlṙen ngam Tēv: yī-ö yin panô-òṅ ngam Tēv, patī ngam Tēv.

¹⁰Sā ngam in chu, sā tö-akaha chin ngaich mamānö, ṙamātö chūök rööntö machööḵlö, ngaich tahëng tak öp mamānhöl nö i kui e. Kö haṙēmngenre pöri yēḵ tö tīre nö mānhöl nö i kui e.

¹¹Tön öt tarīku tö kô nö ṙātö chūök rööntö machööḵlö nö tahëng tö ngam tö ngaich nö ṙātu: ang Yēsū Krsitū.

¹²Yĕn tarīku pöri mamānlö humlum, rupīö, tö pōi ṙāi ihong, savaich, afō, kaṙālö, vòhtit, nö i kui ngam chūök rööntö machööḵlö;

¹³Kö hameuktu nup min la-en ngòh tö hĕng tak tarik; pò ngam sakamö min nö ve-eny e, pò e nö, hameuktu tö ngam tameūyö, ngaich ngam tameūyö min nö angū-ö kamlah vinī-il la-en ngòh tö hĕng tak.

¹⁴Yĕn köp ngam la-en ngam tarik nö i chūök tī ò nö mānlö e, teūngen min anga-aṅ tö raneushö.

¹⁵Yē ap la-en ngam tarik pöri min nö ṙāpngö, ngaich yëḵngen min anga-aṅ: hayöökaṙen pöri min anga-aṅ; nö höng sā tölöklen tö kūö tameūyö.

¹⁶Öt akahalōn öi yī-ö, tö yīö töhet chūök ngam Tēv, ngaich ngam Töhet Fanöinylö ngam Tēv nö i yöng in yīö?

¹⁷Yĕn tarīku pumyāingö ngam töhet chūök ngam Tēv, piyāingen ò min ngam Tēv; pò ngam töhet chūök ngam Tēv nö töhet; öi yī-ö kòl.

¹⁸Un tarīku yēḵ mahachīlöre. Yĕn tarīku in yīö tö akaha tö lōnre, nö ing panam, hökngen ò yēḵ nö vīngöre nö tökulō-ov, hòn vīngöre anga-aṅ nö akaha.

¹⁹Pò ngam mikah ngih panam nö kumlō-ov nö im Tēv. Pò e nö ngö kinūichngö, Ngam kamë vē tö-akaha nö ip huneū-en cha.

²⁰Hēk ngö inrē, Akahalōn an ngam Mā tö nup chanöh ellōn tö akaha, tö u nöng chanök alaha.

²¹Lökten un hĕng tak tö i tarik ineū-euṅ. Tön ṙòkhöre nun nö yī-ö;

²²Yĕn pòrô nö Pôl hēk Apòlös, hēk Kīfas, hēk ngih panam, hēk nômö, hēk kinpaha, hēk nup tö ṙònghöichṙen töngamuh, hēk nup tö mòkngöre nö yih; ṙòkhöre nö yī-ö;

²³Ngaich in Kristū yī-ö, aṅ im Tēv ang Kristū.