Read Car_Nicobarese 1 KÒRIN 4 Bible Online

1 KÒRIN 4 - Car_Nicobarese bible

1 KÒRIN 4

¹Sā mameukṙen Kristū in yēḵ ihö, tö lōn tarik, ane inrē yōm nup tötmikahkūö aṅ im Tēv.

²Hēk hōtu yin vē yōm nö tötmichūṙen.

³In chu pöri angū-ö nö töng rumhëichyen, öich kahòkkaṙen tö yīö, hēk im inkaha aṅ i tarik. Hö-ö, rö-ö chin chū-ö rēhĕn akahare;

⁴Pò chu öt akahaiṙen tö mi-in re; rö-ö pöri chū-ö lökten in e öich öt fāluṙen. Ngam Mā Tēv pöri ma-akaha chu.

⁵Lökten un akahavö urēhĕkūö ngam ṙētak: hanöng saha yanihihh ngam Mā; ngam kamënyö nup tö hayunngöre min el sinngūlö, nö im hanātö; ngaich hameuktö nup löktö lōn tarik. Ngaich ṙòkhöre min kö teūngen tö i neū-euṅre tö aṅ im Tēv.

⁶Kahōlö, inchōḵoṙô nun anū-ö, nö in ai, ai Apòlös, tö pòkūö yīö; hòṅ yīö in ai haköp, hòṅ yīö öt havāngngöre röön tö nup tö kūchi; hòṅ yīö öt eū ngam tö hĕng tak nö lā-al ngam tahëng.

⁷Achīö ṙöng ap vamī-i meh harīkngöre? Asuh ap inrē in meh ap töt taneūngen meh? Yē meh pöri ngaich teūngen, kūöyòh öm eū-eure, öm sāre yē meh öt teūngen tö e?

⁸Ngaich yin tööḵlö, ngaich yin kôlò, ngaich yin hayöng öt īnu tö ih: hôṅ, hōten yīö chin hayöng, hòṅ ih īhö inrē hol yīö hayöng.

⁹Pò ngam Tēv tö lōn chu nö vīten ai tanīnöṙô, unôich tö taṙòkhöre, sā tarik tö kumpaha nö im kinpaha: pò ih vītu nyam mat ngih panam, ma-ahānga, tarik inrē.

¹⁰Kulō-ov in tö pòkūö Kristū, akaha pöri yī-ö in Kristū; öt kalēḵ-en ihö, kalĕḵen pöri yī-ö; ineū-euṅvö yī-ö, minṙēngu pöri ihö.

¹¹Ing töngamuh tal pòrô, öi hĕnghöre kapahare, haṙehenômö, chumlal, kisōlö; öt kamngu inrē, tö chūökṙenre;

¹²Harëtöre ihö la-evṙen aṅtītö në kuntīre: öt lēka elnang, ngaich hakôlò ihö; öt hakôlöngṙô, hökngenre ihö; hachōchi fālen, ve-elkui ihö;

¹³Vītu in öi sin-òkkūö ngih panam, tö sōḵovö i tökeuheūttöre, söl ing töngamuh.

¹⁴Rö-ö chin kūichtö në sumrōngngökūö yīö, mikahten yīö pöri, sāre tö hanāngenre kūönre.

¹⁵Pò yīö öre pòrô söm köṅny mahaköpti in Kristū, sön yī-ö öt ṙōltak yöng: pò chu hakūönten yīö in Kristū Yēsū lökten im tölöök inhānga.

¹⁶Lökten chin ve-ekūö yīö asīntöre yin yēḵ in chu.

¹⁷Angū-ö an lökten chu tīnten Timòtī nö in yīö, ap hanāngen chu, tökô-en inrē nö kūön nö im Mā Tēv, anga-aṅ ap min famëlen yīö, tö nup talöökö chu mi-in Kristū, sā ṙô chu haköptö māṅ keuheūtngöre chūök.

¹⁸Rīkre yip mahakeūṙöre töngamuh, nö sāre öre yē chu öt yih in yīö.

¹⁹Yih chin min in yīö öt ṙôktörevö, yē lōn ngam Mā Tēv; ngaich akahalōn chū-ö min, rö-ö nö ngam ṙô yip mahakeūṙöre, tön ngam minhôiṅyö pöri.

²⁰Pò ngam pūlngö ngam Tēv nö öt höng i ṙô, im minhôiṅyö pöri.

²¹Suh ap lōn yīö? Kumtö chinökṙen öich kòh, i hanāngenlōn ṙöng, inyāichngö ellōn inrē?