Read Car_Nicobarese 1 KÒRIN 6 Bible Online

1 KÒRIN 6 - Car_Nicobarese bible

1 KÒRIN 6

¹Öt pa-ekūö öyih, öi chuh im kinṙôka, i kūö ngam tömichūṙen, yē yīö lā-alkūö höö, ngaich rö-ö öi i kūö yip töhet?

²Hēk, öt akahalōn öyih tö yip töhet min nö kahòkken ngih panam? Ngaich yē ngih panam nö kahòkkaṙen tö yīö, ngaich öt kanô-òṅvö hòng yī-ö kahòkken törahëchyen?

³Öt akahalōn öyih tö hī min kahòkken ma-ahānga? Röh öng angū-ö nö möthë tö nup aṅ ngih nômö?

⁴Yē yīö kahòkkuvöṙen tö nup aṅ ngih nômö, ngaich ha-ūichlö yip töt aṅ ngih māṅ hòng yī-ö nö kahôka?

⁵Ṙô chu ön ngih hōten yīö sirōngkūö. Kôhòng nö ngatī, nö öt hĕng tak tö-akaha tarik in yīö; öp tökô nö halöök holre,

⁶Ngaich pöri höng holre nyöre öi chuh im kinṙôka, i kūö yip töt ṙamātö ellōnre angū-ö inrē?

⁷Hö-ö, ha-ehangen an ngaich nö hanāten nö in yīö, öi kö lā-al im kinṙôka. Sitih öt hökngenre lahëḵ hayeḵe? Sitih öt hökngenre lahëḵ hachīlö?

⁸Hö-ö, pò yīö, yī-ö inrē chōich, hachīl holre inrē.

⁹Öt akahalōn öyih, tö vē tömichūṙen min nö öt amīnuvö tö ngam pūlngö ngam Tēv? Un nyātölōn; öt rēhĕn chamô-òṅkānö; vame-ekūö insātēv, ma-asĕhha, kumkantöre, chamô-òṅ kikōnyö.

¹⁰Mu-ulāiya, yamikhanga, mihiyōi, töt lamëkôre, öt rēhĕn kamil min nö amīnu tö ngam pūlngö ngam Tēv.

¹¹Ngatī yip misī rēvre in yīö: ngaich pöri yī-ö söichö, ngaich pöri yī-ö ahetlöngö, ngaich pöri yīö halööklöngö i mine-eny ngam Mā Yēsū Kristū, im Töhet Fanöinylö ngam Tēv hī inrē.

¹²Ṙòkhöre nun nö kanahngen nö in chu; öt ṙòkhöre pöri nö löök. Ṙòkhöre nun nö kanahngen nö in chu; sōḵ pöri chū-ö kētöre elkatòh u.

¹³Nya-aṅkūö, kūö ngam aich, ngaich ngam aich kūö ngam nya-aṅkūö; ngam Tēv pöri min kamëtö ranö-ö e nyöre tö u. Rö-ö pöri ngam alaha nö kūö ngam chinô-òṅ kānö, tön kūö ngam Mā Tēv; ngaich ngam Tēv kūö ngam alaha.

¹⁴Ngaich ngam Tēv nö hĕnghöre hachohlö ngam Mā, ngaich hachohlen hī min lökten im minhôiṅyö Ò.

¹⁵Öt akahalōn öyih tö minë alahare nö tūmö alaha Kristū? Kô-òren öich kēḵngö në tūmö alaha Kristū, ngaich vītö u nö tūmö alaha mi-inyihköre kikānö? Sōtu an tö ngam Tēv.

¹⁶Hēk öt akahalōn öyih tö ngòh tö hamūltu nö im mi-inyihköre kikānö nö hēngö alaha? Pòn ngö ṙô anga-aṅ, Hēngö alaha nan minā tö nët tak,

¹⁷Ngam tö hamūltu pöri nö i ngam Mā Tēv, hĕng nö im ma-alaha.

¹⁸Ṙūöngöre töm chinô-òṅkānö. Ṙòkhöre nun në tökööl kahëken ngòh tarik nö lā-uk ngam alaha; ngòh chamô-òṅkānö pöri köölö fālen nö im alahare.

¹⁹Hēk, öt akahalōn öyih tö ngam alaha yīö nö töhet chūök ngam Töhet Fanöiylö ngam mi-in yīö, ngam in yīö ngaich aṅ im Tēv?

²⁰Rö-ö yin yī-ö rehre töre: pò yīö ṙāyu havaha; lökten eū ngam Tēv im alahare.