Read Car_Nicobarese 1 KÒRIN 7 Bible Online

1 KÒRIN 7 - Car_Nicobarese bible

1 KÒRIN 7

¹I inlahen nup kahūich yīö; tölöök an, yē ngòh tarik nö öt lūölkö kikānö.

²Kūö ngam chinô-òṅ kānö pöri, hökngen ngam tarik nö pihövö, hökngen ngam kikānö inrē nö pihövö.

³Höngen ngam kikōnyö nö kētö nup lamöö im pihöre.

⁴Öt kanô-òṅvö an ngam kikānö nö kanahnguṙen töm alahare, höng ngam pihö ò: ngatī ngam kikōnyö öt kanô-òṅvö nö kanahnguṙen töm alahare, höng ngam pihö ò.

⁵Uh yih hachīlö höö, höng yē e nö hanô-òṅlōn, nöng rahëichhangkūö, hòṅ yīö kētöre im vine-ekūötēv, ngaich hēk mūl, hòṅ ngam Sātān nö kalaha yīö kūö ngam töt maninngenlōn yīö.

⁶Ṙô chu pöri angū-ö halöngten, öt chöngö.

⁷Hōtö tarik chin ri nö ṙòkhöre nö sā chu. Kö inlōntöre pöri tarik tö aṅ im Tēv, ngö inlaha ngam töhĕng tak ngö aṅ inlaha ngam tahëng.

⁸Ngö ṙô pöri chū-ö tö yip töt pihövö, tafīösi inrē kikānö; Tölöök an nö in cha yē cha nöng ngöh nö sā chu.

⁹Yē cha pöri nö ötmaninngenlōn hökngen cha nö hapihö: ĕhten an ngam pinihö tö ngam tö hū lōn.

¹⁰Kētö chöngö pöri chū-ö i yip tö ngaich nö pihövö, öt chū-ö, tön ngam Mā Tēv. Tö ngam inpihö kikānö nö un ṙāngö ngam pihöre,

¹¹(Yē ò pöri nö ṙā-anga, hökngen ò nöngngöh un pihövö, hēk hönglūk nö halāmöre töm pihö ò;) ngam inpihö, kikōnyö inrē un ṙāngö ngam pihöre.

¹²Ngö ṙô pöri chū-ö i yip tahëng, öt ngam Mā Tēv; yĕn hĕng tak öp mak-alaha kikōnyö, tö pihövö tö töt ṙamātö ellōnre, ngaich hōḵ nö iyöng in ò, un ṙā-ayö ngam kikānö tö ò.

¹³Ngam kikānö tö pihövö tö töt ṙamātö ellōnre, ngaich hōḵ nö iyöng in ò, un ṙā-ayö ngam kikōnyö tö ò.

¹⁴Pò ngam töt ṙamātö ellōnre inpihö kikōnyö, nö ahetlöngö nö im inpihö kikānö, ane inrē ngam töt ṙamātö ellōnre inpihö kikānö nö ahetlöngö nö im makalaha kikōnyö: töt het sin më kūön nā: ngaich pöri cha-a töngamuh nö het.

¹⁵Yē ngam töt ṙamātö ellōn nö kiröönngöre, hökngörit ò; i töngatī an ngam makalaha, ngam kikānö makahala inrē nö öt elkatòh inkövö: havëtu pöri ayī-ö im kumchikṙen tö ngam Tēv.

¹⁶Sitih mikahlōn ṙöng öm me-eṅ, Ō inpihö kikānö töre yē meh kô hayööken ngam pihöre? Hēk, sitih mikahlōn öm me-eṅ, Ō inpihö kikōnyö, töre yē meh kô hayööken ngam pihöre?

¹⁷Höng sā tī ngam Mā Tēv nö katöl tö hĕng tak tarik, sā invëkö ngòh tö hĕng tak tö ngam Tēv, lökten hökngen ò nö lök in e. Hōḵtö töngatī chin i në Māṅ nö ṙòkhöre.

¹⁸Tö tunyīnyi hòng ngaich nö havëtu? Hökngen ò un vīngöre nö töt tunyīnyi ngaich hòng töt tunyīnyi nö havëtu? Hökngen ò un tunyīnyi.

¹⁹Rö-ö an ngam tunnyinyngö, rö-ö inrē ngam töt tunnyinyngö höng ngam inköpö minë chöngö ngam Tēv.

²⁰Hökngen ngòh tarik nö haköpngö inlahare tö invëkö re.

²¹Tö hakövö hòng me-eṅ hē meh havëtu? Un afēken e: yē meh pöri kô ṙānyöre, haṙönö e.

²²Pò ngòh anga-aṅ töhakövö tö invëtöre nö im Mā, ngaich töt hakövö nö im Mā: ngatī ngam töt hakövö tö invëtöre, töhakövö nö in Kristū.

²³Tö ṙāyu yin ngaich havaha; un vītöre nö tö hakövö tö tarik.

²⁴Kahōlö, hökngen ngòh tarik nö haköpngöre nö im Tēv, nö kö ip invëköre.

²⁵Öt aṅhaṅv-in chin tö chöngö aṅ im Tēv, i inlahen yip tötchô-òv rēlö: kē-ĕkūö yīö pöri töng lōnre, sā öp tö hĕng tak tökô-en tö teūngen tö inlōnti aṅ im Tēv.

²⁶Lökten an nö tölöök tölōn chu, tö kūö ngih kanihngen töngamuh: löök an ngam tarik nö höng sāre.

²⁷Haköpi ömeh im pihöre? Un lukkenre nö hòṅ luhlöngkūö. Töt pihövö ömeh? Un lukkenre tö pihöre.

²⁸Yē meh pöri hapihö, öt köölö fālen me-eṅ; yē ngòh töt chô-òv rēlö nö hapihö, öt köölö fālen anga-aṅ. Kihngen pöri min vē töngati nö im alaha: hòṅ ṙalen yīö chin.

²⁹Kahōlö, ngih pöri ṙô chu, cheūta ön ngih ṙētak, töngamuhöten, yip tö pihövö, nöng sā töt pihövö.

³⁰Yip pameuiny, nöng sā töt pameuiny; yip tö ṙāmölōn inrē nöng sā töt ṙāmölōn; yip mahavah nöng sā töt īnu;

³¹Ane inrē yip kamëtö aṅ ngih panam, sā töt tööḵ-önglōn: pò ngam fehe ngih panam nö chuhngöre.

³²Hōten yīö pöri chū-ö öt īnu tö piṙūtköre. Ngòh kikōnyö, töt pihövö, piṙūtkö nup aṅ im Mā, öp inlaha ò nö haṙamlōn ngam Mā:

³³Ngòh kikōnyö tö pihövö, piṙūtkö nup aṅ ngih panam, öp inlahen ò nö haṙamlōn ngam pihöre.

³⁴Harīkngöre an ngam tö pihöv kikānö tö ngam töt chô-òv rēlö. Ngam kikānö töt pihöv, piṙūtkö nup aṅ im Mā, pò ò nö hòṅ het nö im alaha im ma-alaha inrē: ngòh kikānö pöri tö pihöv, piṙūtkö nup aṅ ngih panam, öp inlahen ò nö haṙamlōn ngam pihöre.

³⁵Ṙô tö ngih chin nö inkôlò yīö, rö-ö nö inkeunlö nup tö tanāhen in yīö, ṙūöhlen yīö pöri im tölöök ane inrē laklö ngam töt hanrēven manūlö yīö im Mā.

³⁶Yĕn hĕng tak öp töt lēnen inlahen tö lōn re nö ip mikahngö ò rēlö, yĕn hū ap kuilōn ò, nö hòṅ lōnu, hökngen ò nö asā öp tölöök lōn ò: hökngen ò nö hapīhö öt tökööl an.

³⁷Ngòh mahaköpöre pöri nö ellōn re, öt lōnu inrē, lākö pöri ngam kuilōn ò, kē-ĕ e nö ellōn re, haköp ngam kikānö nö mikahang ò, vāyen min anga-aṅ.

³⁸Pò ò ngam töhapīhö töm kikānö mikahngö re nö vāyen; mööḵhë lanööken pöri ngòh lamakngö pinīhö.

³⁹Sa rô-òtö nômö ngam kikōnyö an ngam kikānö nö köp nö im pihöre; yē ngam kikōnyö pöri nö kapah, kô-òren ngam kikānö nö hapīhö töp lōnre; höng im Mā pöri.

⁴⁰Mötlö kumchikṙen anri yē ò nö sāre nö höngngöh, sā ngam lōn chu: aṅhaṅv-in chin tölōnre inrē tö ngam Töhet Fanöinylö ngam Tēv.