Read Car_Nicobarese 1 KÒRIN 8 Bible Online

1 KÒRIN 8 - Car_Nicobarese bible

1 KÒRIN 8

¹I inlahen nup tökētu nö i insātēv: akahalōn in töre ṙòkhöre aṅhaṅv-in tö mikah. Hakeūṙö an ngam mikah, haruk pöri ngam hanāngenlōn.

²Yĕn tarīku tö akahalōn tö lōnre, öl anga-aṅ nö akahalōn nö sā mikahlōnre öre,

³Yĕn tarīku pöri tö hāngenlōn töm Tēv, anga-aṅ tö-akaha tö Ò.

⁴Lökten, i inlahen nyinā-aṅ nup tökētu nö i insātēv, akahalōn in tö insātēv nöng törö-öv nö ing panam, törö-öv inrē tahëng tēv, höng ngam Tēv.

⁵Pòn pòrô nup tötēvu invëka, el halīöngö, el tumlat; sā yip tēv nö ṙōltak, ṙōltak inrē mā;

⁶Sön pöri nöng hĕng ngam Tēv nö in hī, ngam Yöng, löklö in Ò në taṙòkhöre, in Ò inrē ayī-ö; hĕng ngam Mā, Yēsū Kristū, lökten në taṙòkhöre, lökten Ò ayī-ö inrē.

⁷Hö-ö pöri angu-ö mikah nö i taṙòkhöre tarik: höng rēvre pöri tö-ulòhten nö i insātēv söl ing töngamuh, nya-aṅvkūö tö tökētu nö i insātēv; ngaich pòn töt kalēḵen ap kuilōn cha, ngaich hachōchiyö.

⁸Öt kēten hī pöri min ngam nyinā-aṅ nö im Tēv: ötrēhĕn öi ṙūöhngen re yĕi öt nyā; ötrēhĕn öi ĕhten yĕi nyā.

⁹Haṙēmngenre pöri hòṅ yīö öt lökten ngih, inlöngten, öi kinvē-ĕre yip töt kalēḵen.

¹⁰Pò öp tarik mameūkö meh, öm tö-īnu tö mikah, ūichhaka nyā-aṅvkūö el chūök insātēv, röh öp kuilōn ò, yē ò nö töt kālēḵ-en, nö ṙūöhlöre nö nyā tökētu nö i insātēv?

¹¹Ngaich pòkūö ngam mikah meh, ngam töt kalēḵen nö öt kôlò, ngam mak alaha, tö pô-òvkūö tö Kristū nö kapah.

¹²Ngaich ngatī, köölö fālen nö i më mak alaha, hanyahkö ngam kuilōn cha,yē e nö töt kalēḵen, köölö fālen yī-ö ngaich in Kristū.

¹³Lökten, yē ngam nya-aṅkūö nö pô-òvkūö tö ngam mak alaha chu nö kavē-ĕre, ngaich chū-ö öt hòṅ kā alaha, hòṅ chu öt pô-òvkūö tö ngam mak alahare nö kavē-ĕre.