Read Car_Nicobarese 1 KÒRIN 9 Bible Online

1 KÒRIN 9 - Car_Nicobarese bible

1 KÒRIN 9

¹Röh öich chū-ö töt hakövö? Röh öich chū-ö tanīnöṙô? Öt meuk ngam Mā hī öich, Yēsū? Röh öi yī-ö la-en chu im Mā?

²Yē chu öt tanīnöṙô i tahëng, lahëḵ pöri rēhĕn in yīö: pò yīö yī-ö, im Mā minkahngö chu tanīnöṙô.

³Angū-ö ön ngih lanaklö chu in cha yip kamlaha chu.

⁴Öt huveū-en öi ihö kanahnguṙen nya-aṅvkūö, òk inrē?

⁵Öt huveū-en öi īhö kanahnguṙen hachōḵ pihöre tö ṙamātö ellōnre, sā yip tahëng tanīnöṙô, yip mëm ngam Mā inrē, Kīfas inrē?

⁶Höng chū-ö ṙöng tö Paranapas inrē, tö öt huveū-en kanahnguṙen ṙap la-en?

⁷Achīö öp ṙung kumyung töng mameukṙenre nöng kahngenre? Achīö öp ṙung tameūich vāin, ngaich rö-ö nö nyā ṙòng ò? Achīö ap ṙung maha-aṅhaṅl nuā ngaich rö-ö nö nyā aṅteh?

⁸Sā ṙô tarik öchu tö në ṙôre? Hēk, röh öng ngam chöngö inrē nö ngatī ṙô?

⁹Pòn ngö kinūichngö nö chöngö Môsös, Uh man nyëk kūö nuā yĕn röönnyö sāiny. Kūön minë nuā ang ngam Tēv nö ṙūöt?

¹⁰Hēk, ṙô tö e ṙöng Ang tö pòkūö hī? Hôṅ, pòkūö hī an nö kūichi: pò ngam kumköh tumlat nö hōtu nö maneukngöre nö kuköh, ngaich ngam pumtōng nö hōtu nöng mameukngöre nö hamòlkūö.

¹¹Yē ih teūich tö aṅ i töhet in yīö, tö yah öng angū-ö yē ih hamūl nup aṅ in yīö aṅ i alaha?

¹²Yē yip tahëng nö kô nö kanahnguṙen tö e nö in yīö, röh öi ihö möthë? Rö-ö pöri ihö hakeū ngam kanahngen; keun nup yanëḵngenre pöri ihö, hòṅ ih öt pô-òvkūö tö sanānngö ngam inhangkö Kristū.

¹³Öt akahalōn ṙöng öi tö yip mameukṙen nö i nup töhet, nö nya-aṅvkūö tö nup aṅ ngam töhet chūök, ngaich cha-a yip yōm ngam tāhāklö nö kintölu tö nup aṅ e?

¹⁴Ngatī ngam Mā nö chöngu tö yip ma-ahangkö ngam tölöök inhānga, nö hōtu nö ha-aṅhare nö in e.

¹⁵Öt hēngö kahëken pöri chū-ö tö u: rö-ö chin kūichhöti öich hōtö töngatī nö in chu: pò chu öre ĕhten kapah, tö ngam ineū-euṅ chu nöng chanök alaha tö tī tarik.

¹⁶Öt ineū-euṅv chin yē chu ahangkö ngam tölöök inhānga; pòn hakeunlöng nö in chu nö töt ṙanāngen; tötkôlò chin, yē chu öt ahangkö ngam tölöök inhānga.

¹⁷Yē chu kahanglōnre la-evṙen tö ngih, ngaich raneushu chū-ö; yē chu pöri öt kanahanglōnre, ngaich höng tökē-ĕvkūö chū-ö tö inyōmö chehen.

¹⁸Asuh ap pökeh raneushö chu? Yē chu ahangkö ngam tölöök inhānga, ngaich öt ṙāyu tī chū-ö tö inhangkö ngam tölöök inhānga, hòṅ chu öt hateungngö ngam kanahngen im tölöök inhānga.

¹⁹Pò chu pòrô öt inlōm tarik, kētöre pöri chū-ö elkatòh, hakövö tö taṙòkhöre, pò chu hòṅ ṙūöhlöre taneūngen.

²⁰Yahūti chin i yip Yahūti, pò chu hòṅ teūngen tö Yahūti; in cha yip elkatòh chöngö, sā me-elkatòh chöngö pò chu hòṅ teūngen tö yip elkatòh chöngö rö-ö chū-ö el katòh chöngö;

²¹I yip lā-uk ngam chöngö, sā lamā-uk ngam chöngö, pò chu hòṅ teūngen tö yip lamā-uk ngam chöngö rö-ö chū-ö la-uk ngam chöngö im Tēv, elkatòh ngam chöngö pöri in Kristū.

²²I yip töt kalēḵen, ngaich öt kalēḵen chū-ö, pò chu hòṅ teūngen tö yip töt kalēḵen: keuheūttöre mihëṅṙö chin i taṙòkhöre tarik, hòṅ chu lökten in u rahëichyen hayööken.

²³Keūheūttöre vahīken chin kūö tölöök inhānga, hòṅ chu tönôlta in e.

²⁴Öt akahalōn öyih tö cha vē famal nö i insōlö, nö ṙòkhöre röön nö fal; höng hĕng tak pöri tö teūngen tö ngam raneushö. Ngatī röön fal, hòṅ yīö teūngen.

²⁵Vē tarik tö kö kamlahnyöre nö im minyam, nöng ṙūöngten nö i tö keuhtūttöre. Asōl yin cha-a, pòn hòṅ teūngen tö töchahū-uyö sapīöv; teūngen pöri min ayī-ö, töp töt chahū-uyö.

²⁶Lökten chin chū-ö ngatī röön fal, öt sā töt akahakūö.

²⁷Ngatī kisōl, öt höng sā kumsōl kuföt: kisōl ngam alahare pöri chū-ö, ngaich kēhöt e nö el inkövö; hòṅ chu öt löknguṙen öich sōḵov chū-ö, tö kinheūṅtenre mikahten tahëng.