Read Car_Nicobarese 2 KÒRIN 1 Bible Online

2 KÒRIN 1 - Car_Nicobarese bible

2 KÒRIN 1

¹Pôl, tanīnöṙô Kristū löktö i lōn ngam Tēv, ngam hol hī inrē Timòtī. Löö im māṅ ngam Tēv ngam i Kòrin, ṙòkhöre, holtö yip töhet yip tökeuheūtngöre chūök nö i Akayā:

²Inlōnti in yīö, kumchikṙen inrē aṅ im Tēv Yöng hī, aṅ im Mā Yēsū Kristū inrē.

³Tökôlò an yēk ngam Tēv, Yöng ngam Mā hī inrē Yēsū Kristū, ngam Yöng nup neūkölōn, Tēv inngëḵkö inrē nö ṙòkhöre,

⁴Ngam mahangëḵken hī i nup kanihngen hī, pò hī hōtu kô hangëḵken cha yip mī-i kanihngen, löktö ngam inngëḵkö, ngam inngëḵkö hī ayī-ö aṅ im Tēv,

⁵Sā minë kanihngen Kristū nö pōyen nö in hī, ngatī inrē ngam inngëḵkö nö pōyen, nö lökten Kristū,

⁶Yē ih pöri hakihtuṙen, kūö inngëḵkö yīö an, ngam tö tī tö inmöitö, panītnyi aṅ i nup anū-ö kanihngen, nup kanihngen ih ihö inrē.

⁷Köp an ngam maheūṅkkö ih in yīö, akah töheichlōn tö yīö ngatī inrē aṅ im inngëḵkö, sā yīö ngatī inrē hamòl i nup kanihngen.

⁸Pò ih sōten yīö öt akahalōn, kahōlö, tö inlahen kanihngen ih i Āsi, tö ih öi pōihangen taṙāmö, yahlö tö kumlēḵ ih, tö lökten ih ngaich uhā-en aṅ;

⁹Ngaich pöri ihö nyaṅha tö ngam kinpaha nö latuhēt nö in ih, tö lökten ih öt hayönglenre inrē, im Tēv pöri ngam mahachohlö tö kapah:

¹⁰Ngam ṙamānyen ih ngaich nö ṙā-ang i tö ngatī ṙôkö kinpaha, ṙā-ainy min inrē: ngam chūök tī ih töm mineūka, tö Ò min inrē nö ṙòngmö ṙānyen hī;

¹¹Holṙen ih yin yī-ö inrē i nup ṙô yīö ve-elkui: hòn pōyen nup nöinyö tö kētu tö tömaṙôngö tö pò kūö ih, kūö ngam inlōnti tö kētu nö in ih nö lökten i tömaṙôngö.

¹²Pòn ngih ineū-euṅ ih, ngam inmeuktö kuilōn ih, tö ih i hanëtö, kanô-en ngam Tēv inrē, inlahen öi ing panam, pōyen nö möthë nö lā in yīö, öt i mikah ngam alaha, im inlōnti pöri aṅ im Tēv.

¹³Pò ih öt kūich tö tahëng in yīö tö öp vahe-ekūö yīö ngaich; hēk ahōḵo yīö, ṙātö ellōnre chin tö yīö hōḵo e söl ip manāngen:

¹⁴Sā yīö ngaich rahëichyen ahōḵo in ih, tö ih öi ihö ineū-euṅ yīö yī-ö inrē ineū-euṅ ih im sakāmö ngam Mā Yēsū.

¹⁵In e nyanatlö chin fömngöre hòṅ yih in yīö, hòn innëtö inkôlò yīö angū-ö;

¹⁶Ngaich lök in yīö, chuh Makētòni, ngaich hēk yih in yīö ṙā-ang Makētòni. Ngaich halēni chanūhu tö yīö im kinröönngö chu chuh Yūtā.

¹⁷Hē chu ngatī lōn, ngaich kinyā-aṅre hòng chu-ö? Hēk öp kuilōn chu, sā kū-ölōn tarik öich, hòn in chu ngam tö hôṅ, hôṅ, ngam tö hö-ö, hö-ö, inrē?

¹⁸Sā ngam Tēv nö tökô-en, öt hôṅ, öt hö-ö an ngam ṙô ih in yīö.

¹⁹Pò ngam Kūön ngam Tēv, Yēsū Kristū, tö-ahangka tö ih in yīö, tö chu, Silvanös Timòtī inrē nö öt hòṅ, öt hö-ö, in Ò pöri ngam tö hôṅ.

²⁰Pòn pòrô nö ṙōl nup kinlēḵngô ngam Tēv, in Ò ngam tö hòṅ: lökten inrē nö löktö in Ò ngam Āmen, nö ineū-euṅ ngam Tēv lökten ih.

²¹Ngam Tēv an mahaköpngen ih hol yīö, nö in Kristū ngaich hacham elkui hī,

²²Ngam mahapanten hī inrē, ane inrē kētö kumlēḵlōn aṅ im Töhet Fanöinylö nö el lōn hī.

²³Havëkö ngam Tēv pöri chu-ö, nö vame-eny ngih nômö chu, tö e nö ṙinālö yīö, öich lakngöre yih i Kòrin.

²⁴Öt kūö ih hakeū chöngöre im mikah yīö, hamòlṙen yīö pöri im ṙanāmölōn yīö: pò yīö sökhaka lökten i mikah.