Read Car_Nicobarese 2 KÒRIN 11 Bible Online

2 KÒRIN 11 - Car_Nicobarese bible

2 KÒRIN 11

¹Hōḵ yin yēḵ ṙap ngih tö rahëichyen kumlō-ov chu: ṙāpö e öi in chu.

²Tön kalēḵĕlōn chin in yīö tö ngam kumlēḵlōn aṅ im Tēv: pò chu hapīöhngen yīö ip tö hĕng tak kikōnyö tö hapihö, hòṅ chu kēten yīö in Kristū öi töhet rēlö tötchô-òv.

³Röiyö alaha chinri tö ellōn yīö min, nö lökngö yô-òv, nö hachōichi nö ṙā-ang im lanööṙen, ngam hanëtö inrē aṅ in Kristū, sā tī ngam pēch nö hachīlö Ēva.

⁴Yē ap yamihtöre nö ahangkö tahëng Kristū, öp töt ahangkö ih ihö, hēk yē yīö kēḵ töharīkngöre lōn, öp töt kahëḵ yīö, hēk, tö harīkngöre inhānga, öp töt ahōḵo yīö, huveū-en yī-ö öi ṙāpö ò.

⁵Pò chu kaheuktöre, tö chu öt rahëichhangen lā unôich, yip lamā rōi tanīnöṙô.

⁶Pòrô chin ri chōichô ṙô-òv, hö-ö pöri im mikah; hö-ö, i tö keuheūttöre in hameuk tö e i taṙòkhöre tarik, lā in yīö.

⁷Hēk köölö fālen ṙöng öich pò chu hakūönngöre, nö pò yīö hōtu hapōilöngö, kūö chu öt ṙāyu ahangken yīö tö ngam tölöök inhangkö ngam Tēv?

⁸Ulāingen nup tahëng chin māṅ, kēḵ raneushöre in cha öich meukṙen yīö;

⁹Ngaich hē chu in yīö öich hanātuṙen, öt hĕng tak tölangan tarik tö tī chu: pò yip hol nö meukṙen nup hanāten chu, hē cha nö yih nö ṙā-ang Makētòni: i tökeuheūttöre chin haköpöre öt lungānö yīö, ngatī chin min haköpöre.

¹⁰Sā ngam kanô-en Kristū nö in chu, öt tarīku min tamahngen chu tö ngih ineū-euṅ i Akayā.

¹¹Kūöyòh? Kūö öt hanāngen chu tö yīö? Akahalōn an ngam Tēv.

¹²Ngam tī chu ngaich, angū-ö min tī chu, hòṅ chu rökngö nup chööḵnyi in cha yip tö hòṅ chööḵnyu: hòṅ cha yĕn eū-eure, ngaich cha-a nö kôti nöng sā ih.

¹³Pò yip tö ngatī tarik nö tanīnöṙô töminyôinyaṅ, vamī inchīlö, vītöre nö tanīnöṙô Kristū:

¹⁴Öt pinngangkūö; pò Sātān nö vītöre nö ma-ahānga hanātö.

¹⁵Lökten an nö öt tö pōyö, yē yip mameukṙen ò nö vītöre nö mameukṙen ngam lanöökö; yip tö asātu manāngen min nö i nup la-enre.

¹⁶Ngö ṙô chin hēk, uich tökulō-ov tö lōn tarik; ngaich yē yīö ngatī lōn, hōḵen chu sòk sā tö kulō-ov, hòṅ chu eū-eure rahëichyen ṙô.

¹⁷Öp ṙô chu, öt im Mā ṙô chu-ö; im kumlō-òv pöri, i ngih nyanatlōn ineū-euṅ.

¹⁸Pòn maṙôngö yip tö sā ṙô tarik nö eū-eure, ngatī inrē chu-ö hòṅ eū-eure.

¹⁹Pòrô ngam mikah yīö, ngaich yī-ö kuchīkölōn hökngenre tö tī tötakaha.

²⁰Pò yīö hökngenre tö tī ngòh tarik yē ò nö kēten yīö nö im inkövö, yē ò nö kāḵngen yīö, yē ò nö tingööpö yīö, yē ò nö hapōilöre, yē ò nö fatāk kūö yīö.

²¹Ṙô sumrōngkūö chu ön ngih, pò hī ngaich ötkalēḵen I chūök ngòh tötpinhë-evkūö pöri, rö-ö chin chu-ö pa-ekūö inrē, pòrô nö ṙô kumlō-ov chu.

²²Heprāi yip cha-a? Ngatī chu-ö. Israĕl yip cha-a? Ngatī chu-ö. Kūön Aprahām yip cha-a? Ngatī chu-ö.

²³Mahalanṙen Kristū yip cha-a? Sā ṙô tökulō-ov chin, mötlö la-en chin chu-ö tö cha. Pōihöl chin la-evṙen; ṙōlheuh chin el kinlōngö; öt kanṙeūken nyaṅha öich fōhoh, ṙōlheuh öich höng tökapah.

²⁴Taneui heuh chu-ö fōhoh, lūöi anāi machūötöre höt, tö tī yip Yahūti.

²⁵Lūöi heuh öich nyāhaṅ tö tinkung. Hĕng heuh öich nyaṅha tö ihong kulehe. Lūöi heuh öich sayööḵ el chōng; hĕng mitööm hĕng sumkam öich el mai.

²⁶Ṙōlvan kiröönngöre; lök i kanihngen el tahël, i tötūmu, i yip tarik aṅ panam chu, i yip aṅ tahëng inrē; i panam, el inchōnngö, el mai inrē; i yip holre tötkô-en.

²⁷Kanihngen i la-en; ṙōlheuh i inahaṅti, i kinpahare, inṙehenômö inrē; ṙōlheuh i inhīkö, i laneūchö, lichôi inrē.

²⁸Hol tö nup töt aheūkö chu inrē, öp tö öt hĕng hang sumkam yamihtöre nö in chu, pinṙūtölōn chu tö vē māṅ.

²⁹Hĕng tak hòng ngòh tötkalēḵen, ngaich öt kalēḵen röh chu-ö? Hĕng tak hòng ngòh töfukngö, ngaich hūṙö ellōn röh chu-ö?

³⁰Yē chu hòṅ eū-eure, hòṅ eū-eure chin min i nup ötkumlēḵenre.

³¹Akahalōn An ngam Tēv, ngam Yöng ngam Mā hī, Kristū, ngam tö-örheūheu nö tökôlò, tö chu öt minyôinyaṅ.

³²Ök mahayöng i Tāmöskös, el katòh ök rācha Arētös, aṅtö öp panam yip aṅ Tāmöskös, pòn hòṅ kē-ĕ chu:

³³Ngaich pöri chu-ö löktö lökhöt kuföt inkūp öich hôtu el kuvôkö i kaha kinlōngö, ngaich öt kô-òngvah tö tī ò.