Read Car_Nicobarese 2 KÒRIN 12 Bible Online

2 KÒRIN 12 - Car_Nicobarese bible

2 KÒRIN 12

¹Hòṅ ineū-euṅv chin, pòrô angū-ö nö ötlööken; hòṅ ṙô tö aṅ im haneūvö chin inmeuktö ngam Mā inrē.

²Akahakūö chin tök hĕng tak tarik in Kristū, fënsīön hang samyeūheu ngaich öt akahalōn chin, yĕn im alaha; hēk, yĕn öt im alaha, öt akahalōn chin: akahalōn An ngam Tēv Anga-aṅ tö kēḵlöngö nö el ngam linūöyö halīöngö.

³Akahakūö chin tök tö ngatī tarik, yĕn im alaha, hēk, köhngen töm alaha, öt akahalōn chu-ö; akahalōn An ngam Tēv

⁴Tö inlaha Ò nö kēḵlöngö nö el Peretāis ngaich hang nup töt aneūken ṙô, nup tötkô nö kahòkka tö tarik.

⁵I tö ngatī chin eū-eure; rö-ö pöri öich hòṅ eū-eure höng i nup ötkumlēḵen chu.

⁶Pò chu yē chu hòṅ eū-eure, öt tö kulō-ov chu-ö min; pò chu min ṙô tö kanô-en, ṙāpöre pöri chu-ö, hòn öt tarīku tö ngölōn tö chu tulöng tö ngam maheuṅk ò nö in chu, hēk, öp ahang ò nö in chu.

⁷Kūö yanahlö ṙôkö ngam inmeukti, pòich sōtu öich yahlö inpōilö, lökten öp tö lòklöre i alaha chu nö kētu, aṅ im sātān ma-ahānga nö kinsōlö chu, pòich sōtu yahlö inpōilö.

⁸Chööḵnyö tö e chu-ö lūöi heuh ṙô vë-ekūö ngam Mā, hòṅ e nö ṙāngen chu.

⁹Ngaich ngö ṙô Anga-aṅ tö chu; Löökö ṙôken ap inlōnti aṅ in chu nö in meh: pò ngam minhôiṅyö chu nö i ötkumlēḵen nö teungta. Lökten chin pōyen ṙanāmölōn im öt kumlēḵen lahëḵ, hòṅ ngam minhôiṅyö Kristū nö teungtöre nö i kui chu.

¹⁰Lökten chin kumchikngenre im öt kumlēḵen, i pinlāngen, i hanāten, i inkihten, i kanihngen, tö pôkūö Kristū: pò chu, yē chu ötkalēḵen, ngaich kalēḵ chu-ö.

¹¹Vītöre chin kulō-ov: līpö chin tö yīö; tön chu-ö chin öre aheūkö yīö pò chu öt hēngö ranöö-ö lā unôich tö yip lamārōi tanīnöṙô, pòrô öich höng tö rö-ö.

¹²Kô-en nun minë minkahngö tanīnöṙô nö kēkaṙen nö in yīö nö i manöiyö, i minkahngö, pinngangkūö inrē, minhôiṅyö la-en inrē.

¹³Asuh ṙöng ap umuh ap hanöḵangen yīö tö yip tahëng māṅ, höng angū-ö, pò chu öt lumngan yīö? Aṙēlen chu tö ngih tö vaich.

¹⁴Yĕh meuk, linūöi tum heuh lanënen chu ön ngih hòṅ yih in yīö; ngaich hö-ö chu-ö hòṅ lumnganö yīö pò chu öt chöh nup in yīö, tön yī-ö: pò vē nyīö nö öt cha-a mameukṙen yöngre, tön vē yöng mameukṙen vē nyīö.

¹⁵Kiröṅngö ṙānāmölōn chin, keuheūthang, keuheūtiṙen inrē tö kūö nup nômö yīö. Yē chu pōyen hanāngenlōn tö yīö, ngaich kūöṅnen hananghuṙen hòng?

¹⁶Ngatī an yĕh, rö-ö chin chu-ö lumngānö yīö: huveu-en pöri, ngaich kôti yī-ö tö tī chu hol tö michīl.

¹⁷Ngaich hakeūngen yīö hông chu-ö öich lökten i yip tahīnngöre in yīö?

¹⁸Halēnö Taitös chin, ngaich tīntö öp hol nö in ò. Hakeūngen yīö hòng Taitös? Röh öi lök im töng Anga-aṅ Töhet Fanöinylö? Röh öi lök in u anū-ö vanāyö?

¹⁹Ngaich in höng vamë-eny fālenre tö lōn yīö öi in yīö. I kūö ngam Tēv ṙô in ṙôten Kristū. Kahōlö, ṙòkhöre nun nö inruk yīö.

²⁰Tön röingö lōn chin hòn öt lökngö yô-òv, yē chu min yih öich öt kôtökūö tö yīö öt sā lōn chu, kôti chu-ö inrē öich sā lōn yīö tö chu; hòn öt löktö yô-òv, töng tulönghöre lōn, tinutngö, tanāinyö, manūlö tötlöök, vine-eng nang, tö föh lōn, tinṙōlen;

²¹Hòṅ ngam Tēv chu min nö öt havāichngen chu nö i kūö yīö, yē chu yih hēk, ngaich chu-ö haṙivhö yip tömaṙôngö in cha yip tököölö fālen urēhĕkūö ngih, ngaich öt havöötö ellōnre nö ṙā-ang tökööl, chinô-òṅ kānö, yinikngö tötlöök lōn, nup kahëken cha.