Read Car_Nicobarese 2 KÒRIN 2 Bible Online

2 KÒRIN 2 - Car_Nicobarese bible

2 KÒRIN 2

¹Lēnngö an nö in chu, tö chu öt hòṅ yih hēk in yīö hol tö miṙivlōn.

²Pò chu, yē chu miṙivngö lōn yīö, achīö ap pökeh tö ṙāmölōn tī tö chu, tön anga-aṅ ngam tö miṙīvilōn tö chu?

³Ngaich kūich tö e chu-ö angū-ö, hòṅ chu öt miṙīvulōn in cha, yip chūök chu ṙāmölōn, ik hē chu yih; nyanatluvö chin in yīö ṙòkhöre, tö ngam ṙanāmölōn chu nö ṙanāmölōn yīö ṙòkhöre.

⁴Kūichhöti chin in yīö, holtö ṙôken mak mat, ip ṙôken kanihngen, kanihngen ellōn inrē; öt kūö yīö hōtu miṙīvulōn, hòṅ yīö pöri akahalōn tö ngam hanāngenlōn chu ngam tö pōyen nö in yīö.

⁵Yĕn hĕng tak tö tī-iv tö miṙivlōn, nö öt in chu, rahëichyen pöri in yīö ṙòkhöre. Rö-ö chin hòṅ yahatī lumngānö yīö tö e.

⁶Ngaichö tölngö an ngam inṙeikö, ngam tö ngatī, ngam tī tö maṙôngö inchök;

⁷Hòṅ yīö asātöre aṙēlen ò, hangëḵken ò inrē, hòṅ öp tö ngatī nö öt ngeūktu tö kūö yöng miṙivlōnre.

⁸Lökten chin hōten yīö, haköpngö ngam hanāngenlōn in ò.

⁹Angū-ö an inrē löknyö chööḵnyö tī chu ngaich kūich, pò chu hòṅ akahalōn tö nganë-eṅ yīö, yē yīö öi öt ahôngen i tökeuheūttöre.

¹⁰Yē yīö aṙēluvö ip tö hĕng tak, aṙē-ĕl chu-ö inrē: öp töng aṙēlöngö tö chu nö ngaich yē chu ngaich aṙēluvö, aṙēlö e chū-ö in Kristū tökūö yīö;

¹¹Hòṅ Sātān nö öthatūiṙenre nö kēḵ kanô-òṅre nö in hī: tön rö-ö in öt akahalōn töp milichngen tī ò.

¹²Ik hē chu yih i Trô-as öich chööḵnyö tö ngam tölöök inhangkö Kristū, hē chu inrē löpnyukūö inkūp im Mā.

¹³Öt hanöhlu ellōn chū-ö, pò chu öt kôtökūö töp holre Taitös: have-engritre in cha, ngaich chū-ö kiröönngöre chuh Makētòni.

¹⁴Nöinyö ngam Tēv pöri yēḵ ngam tö örheūheu nö hachōten hī im minhôiṅyö in Kristū, ngaich hameuktu nö löktö in hī ngam kumchik ngam inkaha Ò nö keuheūtngöre chūök.

¹⁵Pò hī tökuchik in Kristū, öi im Tēv, in yip töhayöökaṙen, tötkôlò inrē;

¹⁶Kumchik im töhĕng aṅ im kinpaha, nö im kinpaha; im tahëng kumchik aṅ im nômö nö im nômö Achiāp töthāṅten in në?

¹⁷Pò hī öt sā tömaṙôngö, hachōichngö ṙô ngam Tēv, im kanô-en pöri: sā aṅ im Tēv pöri, ṙô tö aṅ in Kristū ihö i kūö ngam Tēv.