Read Car_Nicobarese 2 KÒRIN 3 Bible Online

2 KÒRIN 3 - Car_Nicobarese bible

2 KÒRIN 3

¹Hēk öi ihö rultöre kahngôre töre öi eū-a? Hòṅ līpörevö ṙöng öi, sā yip rēvre, tö ineū-a in yīö, hēk aṅ in yīö?

²Yī-ö yin līpöre ih, tö kūichi i në ellōn ih, akahaiṙen, ve-evkūö inrē tö taṙòkhöre tarik;

³Hameuktu ngaich töre līpöre Kristū, meūken tö ih, öt kūichi nö aṅ tī tö kinsum kūö kanūich, aṅ tī tö ngam Töhet Fanöinylö ngam tö aṅ Tēv pöri: öt i mat tö mitāk ihong, inup tö mitāk pöri ellōn alaha.

⁴Ngatī nyanatlö in lā im Tēv, lökten in Kristū:

⁵Öt kūö ih töö-önglōn töre, nö sā lökten ih anū-ö; aṅ im Tēv pöri ngam tanöö-önglōn ih:

⁶Ngam vamīten ih inrē töt hāṅten mameukṙen im tufömngöre kinlēḵngô; öt im kinūichö, im ma-alaha pöri: pò ngam kinūichö nö kapahatī, kētö nômö pöri ngam ma-alaha.

⁷Yē ngam mineukṙen pöri, ngam aṅ im kinpaha, nö yih nö holtö kanôlò, kūichi, ka-iphötvö nö i nup ihong, ngaich lökten yik kūön aṅ Israĕl, nö ötkô nö tēlta mat nö hatīönkökūö Môsös, kūö inyāngö ök kūö ò; ök töng changāchiṙen.

⁸Sitih nö öt mötlö ngam mineukṙen nö hol tö kanôlò ngam aṅ im ma-alaha?

⁹Yē ngam mineukṙen aṅ im ötinkôlò, nö kanôlò, mötlö ngam mineukṙen aṅ im lanöökö nö yahlö nö im kanôlò.

¹⁰Pòn kô ngam tö huvī-iti nö kanôlò, öt vītu nö kôlò nö in e, kūö ngam tö saṙaklöng kanôlò.

¹¹Yē ngam tö changāchiṙen nö hol tö kanôlò, ngaich mötlö ṙôken kanôlò ngam tö ōtre.

¹²Īnu tö töngatī mineūka lökten, öt pinhe-evkūö ṙô ihö.

¹³Öt sā Môsös inrē, ök ramangngö kūöre, pòn sōtu yik kūön aṅ Israĕl nö tēltamat, nö i ngam tö changāchiṙen:

¹⁴Pòn söl ing tö ngamuh, i vine-ekūö ngam höteh kinlēḵngô, höngngöh ngam ranangkūö öt nyūömlöngö; ngam tö keuheūtiṙen nö in Kristū.

¹⁵Hē Môsös pöri nö vë-evkūö, hulalhaka ngam ranangkūö nö ellōn cha, söl ing töngamuh:

¹⁶Hē e pöri min nö havöötöre nö im Mā, kē-ĕyö ngaich ngam ranangkūö.

¹⁷Töhet Fanöinylö An ngam Mā: ngaich i chūök ngam Töhet Fanöinylö ngam Mā, in e ngam chunhēṙen.

¹⁸Ṙòkhöre pöri ayī-ö, öi öt ranangngukūö, sā yaneich tö ngam kanôlò ngam Mā i mat tinmël öi haṙītu im insā ṙeū-eung im kanôlò nö im kanôlò, sā aṅ im Mā ngam Töhet Fanöinylö.