Read Car_Nicobarese 2 KÒRIN 4 Bible Online

2 KÒRIN 4 - Car_Nicobarese bible

2 KÒRIN 4

¹Yĕh meuk, lökten in īnu tö ngih mineukṙen, sā taneūngen ih, tö neūkölōn, öt chëya in;

²Ṙāngö nuk tö hanyāti pöri ihö sumrōngkūö, öt lök i huneū-en tö tötlöök, öt rēhĕn michīl, ṙapkö ngam ṙô ngam Tēv, lökten i inmeuktö ngam kanô-en pöri, öi kētöre el kuilōn tarik, i kūö ngam Tēv,

³Yē ngam inhānga pöri aṅ in ih nö rāngikūö, rāngikūö an nö in cha yip tö ötkôlò:

⁴Yip tö tilupi ellōn, tö öp tēv ngih panam, töt ṙamātö ellōnre, pòn sōtu nö malīlöng nö in cha, ngam hanātö ngam kanôlò Kristū, ngam insā ngam Tēv.

⁵Pò ih öt höng ahangköre, tön Kristū Yēsū nö Mā, ngaich ihö sā kūön alaha yīö, tö pòkūö Yēsū.

⁶Yĕh meuk, tön ngam Tēv tö ngö ṙô, Yang an min ngam hanātö nö elsinngūlö, ngam töyang nö ellōn hī, nö kētö hanātö ngam inkaha ngam kanôlò ngam Tēv, nö i kūö Yēsū Kristū.

⁷El tanīöyö pöri ngih chehen nö in ih, hòṅ ngam kinröngö aṅ im minhôiṅyö nö aṅ im Tēv, rö-ö nö aṅ in ih;

⁸Keuheūtngöre lā-a kinrāchö, ngaich sön öt cheūkti, katöngaṙen, ngaich sön öt ṙā-ang lōnre;

⁹Lū-u, ngaich sön öt ṙā-ayö; fëlö, ngaich sön öt tiṙōli:

¹⁰Örheūheu aṅhav alaha tö ngam tö hòṅ kapah Yēsū, hòṅ ngam nômö inrē aṅ in Yēsū nö hameuktu nö i alaha ih.

¹¹Pò ih ihö tö aṅ, öi örheūheu kētu im kinpaha töpòkūö Yēsū, hòṅ ngam nômö inrē aṅ in Yēsū nö hameuktu nö im tökapah alaha ih.

¹²La-evṙen an ngam kinpaha nö in ih, nômö pöri in yīö.

¹³Īnu pöri töm tö hĕngren mikah sā ngam tö kūichiyö, Ṙātö ellōnre chin, lökten chu ngaich ṙô-òv; ṙātö ellōnre in ihö inrē, lökten ih inrē ṙô-òv;

¹⁴Akah töheichlōn tö Ò, ngam mahachohlen ngam Mā Yēsū, nö hachohlen ih min inrē hol Yēsū ngaich kēten ih min hol yīö.

¹⁵Pòn ṙòkhöre nö pòkūö yīö, hòṅ ngam inlōnti nö ṙūöhlöngö, lökten i tömaṙôngö, ngaich tī-iv tö ngam Nöinyö nö pōyen, nö kanôlò ngam Tēv.

¹⁶Lökten in öt ṙā-ang lōnre; pòrô pöri ngam lā-uk tarik in ih nö lëvngö, sön ap lātuhēt tarik in ih nö tumfömlöng i tumö sakāmö.

¹⁷Pò ngam töng höhöv chanöökö ih, ngam töng rahëichtaṙen, nö vītö nup tö ṙūöhlöre ṙôkentöt chanūhuvṙen lumngan kanôlò;

¹⁸Rö-ö in ihö ngëichkö nup tö meūkö, tön nup töt meūkö nöng tö rahëichtaṙen: tö örheūheu pöri nup töt meūkö.