Read Car_Nicobarese 2 KÒRIN 6 Bible Online

2 KÒRIN 6 - Car_Nicobarese bible

2 KÒRIN 6

¹Vë-ekūö yīö in, ihö tö la-evṙen hol Ò, ui höng tötöl kēḵ ngam inlōnti aṅ im Tēv.

²Tön ngö ṙô An, Hang ṙô meh chin, hē ap tö hoḵov ṙētak; holṙen meh inrē hē ap sakāmö inyööken. Ngaich ön töngamuh nö ṙētak tö hōḵov; ngaich ön töngamuh nö sakāmö inyööken.

³Rö-ö in kētö lökngen fanukngö, i tökeuheūttöre; hòṅ ngam la-en ih nö öt vinëkuvö.

⁴I nup tökeuheūttöre pöri ihö hameuktöre mahalanṙen ngam Tēv, im panītnyi, i kanihngen, i ötkanôlò, i öt huneū-en,

⁵I finôhòh, i kinlonghöt, i tinṙōlen, i chanëyö, i inahaṅti, i inhīkö,

⁶I hanëtö, i mikah, i manöiyö, i neūkölōn, im Töhet Fanöinylö, i hanāngenlōn tökô-en,

⁷Im ṙô kanô-en, i minhôiṅyö ngam Tēv; lök i nup aṅtī ngam lanöökö, lahāmö, lātavē inrē;

⁸I kanôlò, öt kanôlò inrē; i tötlöök ineūkö, tölöök ineūkö inrē; sā mahachīl, ngaich sön tökô-en;

⁹Sā töng ötmikahkūö, ngaich sön mikahkūö, sā tö kapah, ngaich yĕh meūkö ih aṅ; sā töchöken, ngaich öt kumpaha:

¹⁰Sā tö haṙīvölōn, ngaich sön tö-örheūheu ṙamölōn sā yāich, ngaich maṙôngö tī tö tökôlò; sā töt hĕng mihëṅṙö aṅ in, ngaich sön tö īnu tö tökeuheūttöre.

¹¹Ō yī-ö aṅ Kòrin, vāḵakkūö in in yīö, ṙūöhnyöre ṙôkö ellōn in.

¹²Rö-ö hangënhötvö in ih, tön hangënhötvö yin im hanāngenre.

¹³Hòṅ havahlöng an tö töngatī, sā ṙôre chin tö nyīö tö yīö, ṙūöhnyöre ṙôkö yin yēḵ yī-ö.

¹⁴Un haṙongtö kaheunre i töt ṙāmātö ellōnre: sitih innôltö ṙöng ngam lanöökö nö im öt lanöökö? Sitih inmūlti ngam hanātö nö im sinngūlö?

¹⁵Sitih ranòngta ṙöng Kristū nö in Pēli-al? Hēk asuh minchöḵö ngòh ṙamātö ellōnre nö im tötṙamātö ellōnre?

¹⁶Sitih hanô-òṅ ngam töhet chūök ngam Tēv tö ngam insā tēv? Pò hī ayī-ö töhet chūök ngam tö aṅ Tēv; sā ngam Tēv nö ngö ṙô, Iyöng in cha chin min, lök in cha inrē, ngaich tarik chu min cha-a.

¹⁷Lökten yin meutnyi ṙā-ang in cha, köhngen yin yēḵ yī-ö tö cha, ngö ṙô ngam Mā, un lūölkö töchōich, ngaich hōḵen yīö chu-ö min.

¹⁸Yöng yīö chin min, ngaich yī-ö sā kūön chu tö kikōnyö, kikānö inrē, ngö ṙô ngam Mā Tēv Tökeuheūttöre Chöngö?