Read Car_Nicobarese 2 KÒRIN 7 Bible Online

2 KÒRIN 7 - Car_Nicobarese bible

2 KÒRIN 7

¹Kahōlö, ngaich in īnu tö në kinlēḵngô, lökten ta-a töi halööktö nup chanôichö ngam alaha, ma-alaha inrē, hateungtö ngam hanëtö i pinhë-eṅkūö töm Tēv.

²Luvënyö kūö ellōnre yin in ih; öt tarīku tö chök tö tī ih, öt tarīkuvö tö hachōichi tö ih, öt tarīkuvö tö hakeūṙiṙen tö ih,

³Rö-ö an nö ṙô chu hachökö yīö: pò chu ngāichô lā-urĕh, tö yīö ellōn ih öi ṙongngen kapah, ṙōngen aṅ inrē.

⁴Kiröng an ngam öt pinyū-uṙô chu in yīö, kiröng an ngam ineū-euṅ chu tö pòkūö yīö: tööḵlö chin tö ṙinuhöl alaha, taṙēchi chin tö ṙanāmölōn i nup kanihngen ih.

⁵Pò ih pòrô ngaich i Makētòni, öt pinchöömtu në alaha ih, keuheūtngöre lā-a īhö kihngen; lā-uk nup kinyūngö, lātuhēt pinhe-eṅkūö.

⁶Ngaich pöri Anga-aṅ nö ṙuhöl alaha yāich, ngam Tēv, ṙuhöl alaha ih tö yanihih Taitös;

⁷Öt höng ngam yanihih ò tön ngam ṙinuhöl alaha inrē, ngam ṙinuhöl alaha ò tö yīö, hē ò nö vë-eny nang ih tö ngam mineūka tö yīö, miṙivlōn yīö, kumlēḵ lōn yīö in chu; lökten chu ṙuhölre ṙanāmölōn,

⁸Pò chu pòrô miṙivngö lōn yīö töng līpöre chu, öt haṙivhö e chin, pòrô öich hāṙivhö e ngaich: pò chu meuk ngam līpöre nö miṙivngölōn yīö, nö pòrô nöng rahëichtaṙen.

⁹Ṙāmölōn chin töngamuh, öt kūö yīö miṙīvilōn, tön kūö yīö miṙīvilōn im invöötö ellōn: pò yīö löökö minṙivngölōn hòṅ yīö öt yanëḵnguṙen tö tī ih.

¹⁰Pò ngam tölöök miṙivlōn nö vītö invöötö ellōn nö im inyööken, ngam tötkumtö miṙivlōn: tī tö kinpaha an ngam miṙivlōn ngih panam.

¹¹Yĕh ngëcha, ngam angū-ö, tö yīö miṙīvilōn im tölöök, yöng tī e tö tökô-en chumkūöṙen nö in yīö, hôṅ, yöng tinlöhnyö yīö, hôṅ, yöng kumnyahlōn, hôṅ, yöng pinhë-eṅkūö, hôṅ, yöng mineūka, hôṅ, yöng kumlēḵlōn, hôṅ, yöng invahalvah! Hameuktöre yin ngaich het in e, i tökeuheūttöre.

¹²Pòrô chin ngaich kūichhöti in yīö, öt kūö ap töchōichen, öt rēhĕn nö kūö ap tö hayëḵe, hòṅ ngam tökô-en pöri chumkūöṙen yīö tö ih, nö hameuktu nö in yīö nö i kūö ngam Tēv.

¹³Lökten in ngaich ṙuhölre alaha; im ṙinuhöl alaha ih, ngaich ṙuhölre ṙanāmölōn, tö ṙanāmölōn Tāitös, pò ngam lōn nö hangëḵlöngö tö yīö ṙòkhöre.

¹⁴Yē chu eū an tö pòkūö yīö, hö-ö chin sumrōngikūö, pò ih kô-òṙô in yīö tö në nö ṙòkhöre, ngatī inrē ngam ineū-euṅ nö kôti nö tökô-en, ngam ṙô chu i kūö Taitös.

¹⁵Ṙuhölre ṙôken ap hanāngen ò tö yīö nö ellōn ò, yē ò nö fēken öt minôṙô yīö ṙòkhöre; höngan yin ngaich holtö pinhë-eṅkūö, kinchëyöre inrē.

¹⁶Ṙāmölōn chin in yīö, tö chu inngëḵlu alaha i tökeuheūttöre.